បែលហ្ស៊ិករំលឹកខួប១ឆ្នាំនៃភេរវកម្មនៅអាកាសយានដ្ឋានក្រុងព្រុចសែល
ចុះផ្សាយនៅថ្ងៃ៖
ស្តាប់ - ០៤:៣៥
ថ្ងៃពុធ២២មីនានេះ បែលហ្ស៊ិកបានរៀបចំទិវារំលឹកខួប១ឆ្នាំនៃភេរវកម្មនៅអាកាសយានដ្ឋាន អន្តរជាតិក្រុងព្រុចសែល ដោយមានវត្តមានចូលរួមរបស់ព្រះមហាក្សត្រPhilippe និងព្រះមហេសីMahtilde។ ថ្ងៃ២២មីនា ឆ្នាំមុននេះ ភេរវកម្មវាយប្រហារអាកាសយានដ្ឋាន Zaventem ក្រុងព្រុចសែល បានសម្លាប់មនុស្ស១៦នាក់ ហើយភេរវកម្មនៅចំណតរថភ្លើងក្រោមដី Maelbeek ថ្ងៃដដែល ក៏បានសម្លាប់មនុស្ស១៦នាក់ ដូចគ្នាដែរ។ មានមនុស្សរងរបួស៣២០នាក់ ក្នុងភេរវកម្មទាំង២នេះ។
បែលហ្ស៊ិកមិនដែលរងភេរវកម្មធ្ងន់ ក្នុងប្រវត្តិសាស្ត្រ ដូច្នេះទេ ។ ១ឆ្នាំក្រោយការវាយ ប្រហារ អាកាសយានដ្ឋានក្រុងព្រុចសែល គេនៅតែចោទសួរពីបញ្ហាសន្តិសុខតាមអាកាសយានដ្ឋាន ប្រឈមនឹងការគំរាមពីក្រុមភេរវជន ពិសេសក្រោយពេលមានការផ្ទុះអាវុធ នៅអាកាសយានដ្ឋានOrly នៅប៉ារីសប្រទេសបារាំង កាលពីថ្ងៃសៅរ៍១៨មីនាថ្មីៗនេះ។
គេមិនអាចការពារសុវត្ថិភាពតាមព្រលានយន្តហោះបានល្អឥតខ្ចោះទេ
នៅតាមប្រទេសជឿនលឿនដូចជាបារាំង និងបែលហ្ស៊ិក ការការពារសុវត្ថិភាពតាមអាកាសយានដ្ឋាន មានលក្ខណៈតឹងរ៉ឹងណាស់ តែក៏នៅតែមិនអាចចៀសផុតពីការវាយ ប្រហារផ្សេងៗបាន។ ដូចជានៅព្រលានយន្តហោះOrly នៅប៉ារីស កាលពីថ្ងៃ១៨មីនា។ ទាហានបារាំងបានបាញ់សម្លាប់ជនល្មើសម្នាក់ដែលបានឆក់កាំភ្លើងពីទាហាន។ ប៉ូលិសស្គាល់មុខបុរសនេះយូរហើយដែរ។
ការការពារអាកាសយានដ្ឋាន អោយបាន១០០ភាគរយគឺមិនអាចធ្វើបានទេ អ្វីក៏ដោយមិនដែលល្អឥតខ្ចោះទេ វាតែងមានចន្លោះប្រហោងជានិច្ច។ អាកាសយានដ្ឋាន សួនច្បារ ទីប្រជុំជននានាដែលជាទីសាធារណៈ តែងមានមនុស្សចុះឡើង មានមនុស្សគ្រប់ប្រភេទឆ្លងកាត់។ ត្រឺមតែមនុស្សម្នាក់កាន់តែកាំបិតតូចមួយ ក៏អាចចូលទៅកាន់ហ្វូងមនុស្ស ចាក់គេចាក់ឯងបានដែរ។ ដូច្នេះ ទោះជាដាក់ប្រព័ន្ធការពាររឺងមាំយ៉ាងណា ក៏គេពិបាកដឺងមុនពីហេតុការណ៍ងាយៗបែបនេះដែរ។
នេះគេមិនគិត ពីចន្លោះប្រហោងផ្នែកការពារ ឧទាហរណ៍ដូចជាខាងផ្នែកចារកិច្ច ដែលត្រូវផ្តល់ព័ត៌មានគ្នាទៅវិញទៅមកអោយគ្រប់ជ្រុងជ្រោយ រឺក៏ការសហការរវាងប៉ូលិស និងតុលាការផង។ បូករួមទាំងចន្លោះប្រហោងនេះទៀត វារឺតតែធ្វើអោយការការពារសុវត្ថិភាពពិបាកសម្រេចបានទាំងស្រុងណាស់។
អាកាសយានដ្ឋានបិន ហ្គួរីយ៉ុង Ben Gourion របស់អ៊ីស្រាអែល ជាអាកាសយានដ្ឋានគំរូផ្នែកការពារសុវត្ថិភាពសន្តិសុខ-អឺរ៉ុបមិនអាចធ្វើបានដូចអ៊ីស្រាអែល
អាកាសយានដ្ឋានបិន ហ្គួរីយ៉ុង Ben Gourion នៅអ៊ីស្រាអែល មានវិធានការការពារសុវត្ថិភាពខ្ពស់ណាស់ រហូតជាប់ឈ្មោះគំរូច្រើនដងទៀតផង។ សំណង់អាកាសយានដ្ឋានអ៊ីស្រាអែលនេះ គឺផ្តោតលើសន្តិសុខហ្នឺងតែម្តង។ នៅទីនោះ ការឆែកឆេរត្រួតពិនិត្យ មានតាំងពីច្រើនគីឡូម៉ែត្រ មុនចូលទៅដល់អគារព្រលានយន្តហោះម្ល៉េះ។ ហើយនៅក្នុងព្រលានវិញ ការឆែកឆេរអ្នកដំណើរក៏តឺងតែង តាមច្រើនកន្លែងដែរ។
ប៉ុន្តែ ហេតុអ្វីក៏ប្រទេសនៅអឺរ៉ុប ដូចជាបារាំង ធ្វើមិនបានដូចអ៊ីស្រាអែល? អាកាសយានដ្ឋាននៅអឺរ៉ុប ដូចជានៅបារាំង មានមនុស្សចេញចូលច្រើន ជាងអ៊ីស្រាអែលឆ្ងាយណាស់។ ឧទាហរណ៍ដូចជានៅប៉ារីស ព្រលានយន្តហោះអរលី មានអ្នកដំណើរ១ឆ្នាំៗ ដល់ទៅ៣០លាននាក់ ហើយបើនៅខាងព្រលានរ័សស៊ី ស្ហាល ដឺហ្គោល វិញ អ្នកដំណើរមួយឆ្នាំៗ មានដល់ទៅ៦៦លាននាក់។ អាកាសយានដ្ឋានអ៊ីស្រាអែល បិន ហ្គួរីយ៉ុង មានអ្នកដំណើរមិនដល់៦លាននាក់ទេ មួយឆ្នាំៗ។ ដូច្នេះ ការដែលមានអ្នកដំណើរតិច វាងាយស្រួលអោយអាជ្ញាធរពង្រឺងសុវត្ថិភាពបានហ្មត់ចត់ជាងការដែលមានអ្នកដំណើរចេញចូលច្រើន។
អាជ្ញាធរអាកាសយានដ្ឋាននៅក្រុងប៉ារីស លើកឡើងថា បើគេហ៊ានដាក់របាំងត្រួតពិនិត្យតាំងតែច្រើនគីឡូម៉ែត្រ មុនទៅដល់ព្រលានទៅហើយនោះ នោះអាចនឹងនាំអោយកកស្ទះរថយន្ត។ ហើយបើត្រួតមនុស្សគ្រប់រូប អោយហ្មត់ចត់តាំងតែពីទ្វារចូលអគារព្រលានទៅហើយនោះ ក៏នាំអោយមានមនុស្សតំរង់ជួរតកន្ទុយគ្នាវែងឆ្ងាយ ចាំយូរដែរ។ និយាយទៅ ការតំរង់ជួរនេះ វាអាចទាក់ភ្នែកក្រុមភេរវជនរឺទៅវិញទេ ងាយអោយមានការវាយប្រហារទៅលើអ្នកដំណើរ។ សមាជិកសភាបារាំងមួយរូបគិតថា វិធានការទាំងអស់នេះ គ្មានប្រសិទ្ធភាព ហើយនាំអោយខាតថវិកា និងពេលវេលាទៀតផង។
វិធានការពង្រឺងសន្តិសុខអាកាសយានដ្ឋាន ដែលសមស្រប គឺត្រូវចៀសបង្កការរាំងស្ទះដល់អ្នកដំណើរ
កងកម្លាំងការពារប្រឈមការគំរាមកំហែងភេរវកម្ម គឺត្រូវតែមានដូចធម្មតា បំផុត គេមិនត្រូវភ្លេចថា ធ្វើយ៉ាងណាក៏ដោយ ក៏កុំអោយការការពារសុវត្ថិភាព ហួសហេតុ រហូតដល់ទៅបង្អាក់ដំណើររបស់អ្នកធ្វើដំណើរ នៅតាមព្រលានយន្តហោះដែរ។ នេះជាវិធានការការពារដែលសមស្របចំពោះមុខ។
សូមបញ្ជាក់ថា បារាំងបានចេញផែនការពិសេស ការពារសន្តិសុខ នៅតាមអាកាសយានដ្ឋាន ប្រឈមនឹងការគំរាមកំហែងភេរវកម្ម តាំងតែពីឆ្នាំ២០១៣ម្ល៉េះ។ កងកម្លាំងទាហានប៉ូលិស និងភ្នាក់ងារសន្តិសុខច្រើនពាន់នាក់ ត្រូវបានដាក់ពង្រាយ ការពារអ្នកដំណើរ។ តាំងពីមានភេរវកម្មនៅបែលហ្ស៊ិក បារាំងបានពង្រឺងសន្តិសុខកាន់តែខ្ពស់ ពិសេសវិធានការតាមដានអ្នកដំណើរ រឺតាមដានមនុស្សដែលមានអាកប្បកិរិយាគួរសង្ស័យតែម្តង។ អាកាសយានដ្ឋាននៅប៉ារីសក៏គ្រោងដាក់ចេញប្រព័ន្ធចាប់អត្តសញ្ញាណមុខមនុស្សដែលប៉ូលិសចាត់ទុកថា គ្រោះថ្នាក់ដែរ។
បើនិយាយពីកាមេរាដាក់នៅតាមបណ្តាអាកាសយានដ្ឋាន នៅប៉ារីស វិញ ឥឡូវនេះ ឡើងចំនួនដល់៩០០០គ្រឿងឯណោះ ខុសពី១០ឆ្នាំមុន មានតែជាង១០០០គ្រឿង។ កងកម្លាំងបារាំងមានទាំងឆ្កែ ប្រើសម្រាប់ហិតគ្រឿងផ្ទុះ ហើយកងកម្លាំងមានសិទ្ធិឆែកឆេរកាបូបបានគ្រប់ពេល។
ឃើញថា ទោះជាអាជ្ញាធរបារាំងចាត់វិធានការសន្តិសុខតឺងតែងយ៉ាងណា ក៏នៅអឺរ៉ុប បារាំងរងគ្រោះភេរវកម្មច្រើនគួរសម ប៉ុន្មានឆ្នាំចុងក្រោយនេះ ប្រៀបនឺងបែលហ្ស៊ិក រឺក៏អាល្លឺម៉ង់។ ដូច្នេះ ការការពារសុវត្ថិភាពសន្តិសុខអោយបានល្អ១០០ភាគរយគឺមិនអាចធ្វើបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ