បារាំង ៖ អាកាសយានដ្ឋានបារាំងនៅOrly បិទក្រោយមានការផ្ទុះអាវុធ
កងកម្លាំងសន្តិសុខបារាំងបានបាញ់សម្លាប់ជនម្នាក់ បន្ទាប់ពីជននេះបានស្ទុះទៅឆក់លួចកាំភ្លើងពីដៃទាហាន ដែលកំពុងដើរល្បាត ក្នុងក្របខ័ណ្ឌប្រយុទ្ធប្រឆាំងនឹងអំពើភេរវនិយម ក្នុងអាកាសយានដ្ឋានអ័រលី ក្រុងប៉ារីស នៅព្រឹកថ្ងៃសៅរ៍ទី ១៨ មីនា នេះ។ ជាសំណាងល្អ គ្មានមនុស្សណាម្នាក់ត្រូវរងគ្រោះ តែចរាចរណ៍ហោះហើរនៅព្រលានត្រូវបិទទាំងស្រុងនៅពេលនេះ ដំណើរណាជាងបីពាន់នាក់ត្រូវជម្លៀស។ តើជាទង្វើភេរវកម្មឬ ?
ចុះផ្សាយនៅថ្ងៃ៖ កែប្រែថ្ងៃទី៖
នៅពុំទាន់មានចម្លើយបញ្ជាក់អ្វីទាំងអស់ ! អ្នកនាំពាក្យក្រសួងមហាផ្ទៃបារាំង បានត្រឹមតែប្រកាសថា នៅវេលាម៉ោង៨កន្លះព្រឹកថ្ងៃសៅរ៍នេះ បុរសម្នាក់បានឆក់កាំភ្លើងពីទាហានកំពុងដើរល្បាត រួចរត់ទៅលាក់ខ្លួនក្នុងហាងទំនិញក្នុងអាកាសយានដ្ឋាន មុននឹងត្រូវភ្នាក់ងារសន្តិសុខបាញ់សម្លាប់។ បើតាមប៉ូលិស ជននេះមានជាប់ក្នុងបញ្ជីខ្មៅរបស់ភ្នាក់ងារស៊ើបការណ៍សំងាត់។
ហេតុការណ៍មានទំនាក់ទំនងជាមួយនឹងឧប្បត្តិហេតុបាញ់ប៉ូលិសឱ្យរបួសមួយករណីទៀត នៅចម្ងាយប្រមាណ៤០គីឡូម៉ែត្រពីគ្នា និងខុសត្រូវម៉ោងគ្នាប្រមាណជាមួយម៉ោង។ នេះបើតាមប្រភពដដែល ដែលអះអាងថាខ្មាន់កាំភ្លើងទំនងជាជនតែម្នាក់។
ពេលចរាចរណ៍ផ្លូវអាកាសមកកាន់និងចេញពីព្រលានត្រូវផ្អាកទាំងស្រុង ! មានប្រតិបត្តិការស្វែងចាប់រកជាតិផ្ទុះ ក្រែងខ្មាន់កាំភ្លើងមានពាក់ខ្សែក្រវ៉ាត់ផ្ទុះ។ ប៉ូលិលជាច្រើនត្រូវបានបញ្ចូនមកជាជំនួយសុវត្ថិភាព មនុស្សជិតបីពាន់នាក់ត្រូវជម្លៀសចេញពីអាកាសយានដ្ឋាន។
សូមបញ្ជាក់ថា តាំងពីមានផ្ទុះភេរវកម្មខែមករាឆ្នាំ២០១៥មក បារាំងបានចាត់វិធានការពង្រាយទាហានដើរល្បាតពេញផ្ទៃខេត្តក្រុង ជាពិសេសនៅតាមតំបន់ទេសចរណ៍ ចំណុចប្រជុំជន សាលារៀន អាគាររដ្ឋបាល... ប៉ុន្តែជាញឹកញយ ទាហានល្បាតទាំងនោះបានក្លាជាទិសដៅនៃការវាយប្រហារវិញ។ កាលពីដើមខែកុម្ភៈ ជនអេហ្ស៊ីបម្នាក់ បានជិះយន្តហោះពីអេមៀរ៉ាអារ៉ាប់រួម មកវាយប្រហារលើទាហានបារាំង ដោយប្រើកាំបិត។
រងគ្រោះភេរវកម្មជាបន្តបន្ទាប់ ប្រធានាធិបតីបារាំងបានសម្រេចដាក់ប្រទេសក្នុងភាពអាសន្ន និងពន្យាររហូតដល់ថ្ងៃទី ១៥កក្កដា ក្រោមការរិះគន់យ៉ាងខ្លាំង។ កាលពីថ្ងៃព្រហស្បតិ៍ម្សិលម្ង៉ៃ ក្រោយពីមានការផ្ទុះកញ្ចប់បញ្ញើមានផ្ទុកជាតិផ្ទុះ តាមប្រៃសណីទៅឱ្យអង្គការមូលនិធិរូបិយវត្ថុ នៅទីក្រុងប៉ារីស។ ហេតុការណ៍នេះបញ្ជាក់ថា ការគំរាមកំហែងនៅធ្ងន់ធ្ងរ បារាំងត្រូវរក្សាប្រទេសក្នុងភាពអាសន្នសិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ