ការសិក្សាថាក្មេងជំនាន់ក្រោយលែងសូវចង់ធ្វើជាគិលានុបដ្ឋាក
ថ្ងៃទី១២ឧសភានេះ ជាទិវាគិលានុបដ្ឋាកអន្តរជាតិ។ គិលានុបដ្ឋាកជាធនធានមនុស្សដែលមិនអាចខ្វះបានក្នុងវិស័យសុខាភិបាល និងដែលពិភពលោកត្រូវការកាន់តែច្រើនឡើងៗ។ ប៉ុន្តែបើតាមការសិក្សារបស់អង្គការសហប្រតិបត្តិការនិងអភិវឌ្ឍន៍សេដ្ឋកិច្ច (ហៅកាត់ថា OCDEអូសេដេអឺ) ចេញផ្សាយនៅថ្ងៃសុក្រទី១០ឧសភា ២០២៤ ក្មេងជំនាន់ក្រោយ មិនសូវចាប់អារម្មណ៍ចង់ប្រកបអាជីពនេះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៦
ការសិក្សារបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ច ផ្អែកទាំងស្រុងទៅលើការអង្កេតវាយតម្លៃអំពីសមត្ថភាពផ្នែកគណិតវិទ្យា អំណាន និងវិទ្យាសាស្ត្ររបស់យុវវ័យអាយុ១៥ឆ្នាំ នៅក្នុងប្រព័ន្ធអប់រំ៨១ប្រទេស នៅចន្លោះពីឆ្នាំ២០១៨ដល់ឆ្នាំ២០២២។ ជាលទ្ធផល ចំនួនយុវវ័យចង់ក្លាយជាគិលានុបដ្ឋាកបានធ្លាក់ចុះ ពី២,៣%នៅឆ្នាំ២០១៨ ទៅ២,១% នៅឆ្នាំ២០២២។ សមាជិកអង្គការចំនួនពាក់កណ្តាល កំពុងឆ្លងកាត់និន្នការនេះ ហើយការធ្លាក់ចុះសម្គាល់ឃើញមានខ្លាំងជាងពិសេស នៅតាមបណ្តាប្រទេសអ្នកមាននិងប្រទេសឧស្សាហកម្មលូតលាស់ខ្លាំងដូចយ៉ាងសហរដ្ឋអាមេរិក កាណាដា ន័រវែស ដាណឺម៉ាក ឬអង់គ្លេស។ ចេតនាចង់សិក្សាដើម្បីបានក្លាយជាគិលានុបដ្ឋាក មានកំណើនតែក្នុងប្រទេសមួយចំនួនតូចប៉ុណ្ណោះ គឺជប៉ុន កូរ៉េខាងត្បូង ឬអេស្ប៉ាញ។
បើតាមម្ចាស់សំណេរ វិបត្តិកូវីដ១៩ បានគាស់កកាយឱ្យឃើញថាពិភពលោកខ្វះកម្លាំងគិលានុបដ្ឋាក យ៉ាងរ៉ាំរ៉ៃបំផុត។ ដើម្បីបំពេញកង្វះខាតនិងដើម្បីឆ្លើយតបទៅនឹងសេចក្តីការកាន់តែច្រើនឡើងៗសម្រាប់ពេលបច្ចុប្បន្នភ្លាមផង និងត្រៀមក្រែងមានហេតុការណ៍រាតត្បាតសកលនៅថ្ងៃក្រោយផង ប្រទេសជាសមាជិកអង្គការអូសេដេអឺជាច្រើន បានសម្រេចដំឡើងបរិមាណសិស្សឱ្យចូលរៀនក្នុងវិស័យសុខាភិបាល។ ជានយោបាយទាក់ទាញយុវវ័យពេញសមត្ថភាព។ ប៉ុន្តែវិបត្តិកូវីដ ក៏បានលាតត្រដាងឱ្យឃើញអំពីលក្ខខណ្ឌការងារដ៏លំបាក ដ៏នឿយហត់ ជាមួយនឹងកម្រៃឬប្រាក់បៀរវត្សរ៍ដ៏តិចតួច ដែលជំរុញគិលានុបដ្ឋាកមិនតិចទេសុំលាលែងពីតំណែងនិងបោះបង់អាជីពមួយនេះ។
ហេតុដូច្នេះហើយបានជាក្រុមអ្នកដឹកនាំសិក្សា យល់ថា ប្រទេសនីមួយៗចាំបាច់ត្រូវដំឡើងប្រាក់ខែរបស់គិលានុបដ្ឋាក ឬបុគ្គលិកពេទ្យមានការសិក្សាប្រហាក់ប្រហែលគ្នា យ៉ាងហោចឱ្យសមមាត្រទៅនឹងវិបត្តិអតិផរណា និងគិតគូរមើលលក្ខខណ្ឌការងាររបស់ក្រុមគិលានុបដ្ឋាក ឱ្យបានប្រសើរឡើង។ ត្រូវទាក់ទាញបេក្ខជនភេទប្រុសឱ្យចូលមកបម្រើការងារផ្នែកគិលានុបដ្ឋាកដែល៩០%ជាស្ត្រី។ នេះបើតាមសេចក្តីណែនាំរបស់អង្គការOCDEដើម្បីលុបបំបាត់គំនិតរើសអើង និងប្រកាន់ភេទ ព្រមទាំងជំនឿចាស់គំរិលថាគិលានុបដ្ឋាកជាអាជីពរបស់មនុស្សស្រី។ ការទៅជ្រើសរើសគិលានុបដ្ឋាកពីបរទេស មិនមែនជាដំណោះស្រាយដ៏ប្រពៃឡើយ ព្រោះប្រទេសដើមអាចជួបហានិភ័យខ្វះគិលានុបដ្ឋាក។ អង្គការបានរំលឹកថាសមត្ថភាពនាំចេញកម្លាំងគិលានុបដ្ឋាករបស់ប្រទេសនីមួយៗតែងមានកំរិត។ ហ្វីលីពីន ឬឥណ្ឌាដែលមានប្រជាជនច្រើនជាងគេលើពិភពលោក មិនអាចផលិតគិលានុបដ្ឋាកជាអនន្តបានទេ។ ដូច្នេះត្រូវតែមានច្បាប់ជ្រើសរើសអន្តរជាតិប្រកបដោយសមភាពនិងសីលធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ