បារាំងស្វែងរករួបរួមជាតិនិងផ្តល់ភាពកក់ក្តៅដល់អ្នកវិនិយោគក្រោយភេរវកម្មនៅព្រុចសែល
ប្រធានាធិបតីបារាំង លោក ហ្វ្រង់ស័រ ហូឡង់ បានអំពាវនាវនៅរសៀលថ្ងៃអង្គារនេះ ឱ្យមានរួបរួមជាតិ និងការប្រមូលផ្តុំប្រឆាំងនឹងការគំរាមកំហែងភេរវកម្ម ក្រោយការវាយប្រហារភេរវកម្មដ៏ស្មោគគ្រោក។ សម្រាប់លោក ហូឡង់ ភេរវកម្មអត្តឃាតនៅព្រុចសែល គឺជាការវាយប្រហារអឺរ៉ុបទាំងមូល ដែលទាមទារឱ្យមានដំណោះស្រាយរួម ប៉ុន្តែមិនត្រូវចុះញមនឹងការគំរាមកំហែងនេះទេ ត្រូវតែមានទំនុកចិត្តលើអនាគត និងហ៊ានធ្វើវិនិយោគបន្តទៀតនៅបារាំង ក៏ដូចជានៅអឺរ៉ុប។ នេះជារបស់លោកប្រធានាធិបតី នៅចំពោះមុខប្រធានក្រុមហ៊ុននិងសហគាសមកពីគ្រប់ប្រទេស។
ចុះផ្សាយនៅថ្ងៃ៖
លោកហ្វ្រង់ស័រ ហូឡង់ ៖
“ពួកភេរវជនបានវាយប្រហារបែលហ្ស៊ិក តែទិសដៅគឺអឺរ៉ុប ! គ្រប់គ្នាសុទ្ធតែប៉ះពាល់ដោយភេរវកម្មនេះ។ គ្រប់គ្នាត្រូវតែមានស្មារតីយល់អំពីទំហំនិងភាពធ្ងន់ធ្ងរនៃការគំរាមកំហែងភេរវកម្ម។ ការវាយប្រហារនេះ បានកើតឡើង ក្រោយភេរវកម្មនៅប៉ារីស កាលពីខែមករា និងវិច្ឆិកា ឆ្នាំ២០១៥ ក្រោយភេរវកម្មនៅលើទ្វីបដទៃទៀត ទ្វីបអាហ្វ្រិក ជាដើម ...
យើងកំពុងស្ថិតក្រោមការគំរាមកំហែងជាទូទៅ ដែលទាមទារឱ្យមានចំណាត់ការតបវិញបែបទូទៅដែរ។ បារាំងនិងបែលហ្ស៊ិក មានចំណងយ៉ាងស្អិតល្មួត និងទើបបានឆ្លងកាត់ចែករំលែករឿងរន្ធត់ដូចគ្នា ... ហើយខ្ញុំបានធានារ៉ាប់រងប្រាប់រដ្ឋាភិបាលបែលហ្ស៊ិកហើយថានឹងផ្តល់ការគាំទ្រគ្រប់យ៉ាង និងគ្រប់មធ្យោបាយដែលចាំបាច់។”
ក្រោយពីបានថ្លែងសុន្ទរកថានេះ ហើយលោកហ្វ្រង់ស័រហូឡង់ក៏បានទូរស័ព្ទ ទៅលោកនាយករដ្ឋមន្ត្រីបែលហ្ស៊ិកភ្លាម លោងលោម និងសម្តែងសាមគ្គីភាពជាភារៈរបស់បារាំងចំពោះបែលហ្ស៊ិក។
សូមបញ្ជាក់ថា ប្រសាសន៍របស់ប្រធានាធិបតីបារាំងនេះ ធ្វើឡើងនៅចំពោះមុខប្រធានក្រុមហ៊ុន និងសហគ្រាសជាតិនិងអន្តរជាតិ ជាច្រើន មកពី១៦ប្រទេស មានជាអាទិ៍ក្រុមហ៊ុនអាមេរិក ជប៉ុន កាតា ជាដើម។ល។ លោកបានឆ្លៀតថ្លែងធានាអះអាង និងបញ្ចុះបញ្ចូល ក្រុមអ្នកវិនិយោគកុំឱ្យចាញ់សំឡុតពួកភេរវនិយម។ បារាំងនិងអឺរ៉ុបមានគ្រប់មធ្យោបាយដើម្បីធានាសន្តិសុខនិងសុវត្ថិភាព ព្រោះបារាំងយល់ច្បាស់ណា ប្រសិនបើគ្មានសុខសុវត្ថិភាពទេ នោះក៏គ្មានដែរការអភិវឌ្ឍន៍សេដ្ឋកិច្ច ការវិនិយោគយូរអង្វែង។ គ្មានអ្វីដែលធ្វើឱ្យបារាំងនិងអឺរ៉ុបចុះញ៉មឡើយ។ សំខាន់គឺយើងត្រូវទុកចិត្តលើអនាគត លើការវិនិយោគ លើការធ្វើទំនើបកម្ម ធ្វើអ្វីដែលជាជម្រើសរបស់យើង និងបោះបង់ចោលកណ្តាលទី ព្រោះកត្តាមកពីក្រៅ។ នេះជាការគូសបញ្ជាក់របស់លោកប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ