បែលហ្ស៊ិករងការវាយប្រហារភេរវកម្មអត្តឃាតនៅស្ថានីយរថភ្លើងនិងអាកាសយានដ្ឋាន
នៅព្រលឹមថ្ងៃអង្គារទី ២២ មីនានេះ ព្រលានយន្តហោះ និងស្ថានីយរថភ្លើងក្រោមដីក្នុងទីក្រុងព្រុចសែល ប្រទេសបែលហ្ស៊ិកបានទទួលរងការវាយប្រហារភេរវកម្មអត្តឃាត ស្ទើរទន្ទឹមពេលគ្នា។ តុល្យការបណ្តោះអាសន្នចុងក្រោយឲ្យដឹងថា មានស្លាប់យ៉ាងតិច ២៨នាក់ ព្រមទាំងមានអ្នករងរបួសជាច្រើននាក់ផ្សេងទៀត។ ខណៈនេះ គេនៅមិនទាន់ដឹងពីអត្តសញ្ញាណរបស់ជនរងគ្រោះនៅឡើយទេ។
ចុះផ្សាយនៅថ្ងៃ៖ កែប្រែថ្ងៃទី៖
នៅវេលាម៉ោងប្រមាណ ៨ព្រឹក មានស្នូរផ្ទុះពីរបានកើតឡើង នៅអាកាសយានដ្ឋានអន្តរជាតិក្រុងព្រុចសែល ត្រង់ច្រកចេញដំណើរ ដែលមានអ្នកដំណើររង់ចាំចុះឈ្មោះឡើងយន្តហោះ Americain airlines ទៅអាមេរិក។ បើតាមសំដីសាក្សី មានសម្រែកជាភាសាអារ៉ាប់ មុនស្នូរផ្ទុះបានលាន់ឡើង ដែលទំនងជាសំឡេងរបស់អត្តឃាតជន និងដែលបន្តដោយការបាញ់រះគ្នាមួយប្រាវទៀត។ ភាពស្លន់ស្លោបានកើតមានពេញផ្ទៃព្រលានយន្តហោះ ដែលមានផ្សែងខ្មៅខ្មួលខ្ញាញ់ ពិដានបាក់រលំ អ្នកដំណើររត់ប្រសេចប្រសាចបោះបង់ចោលអីវ៉ាន់យកប្រាសអាយុ។
រំលងមិនដល់មួយម៉ោងក្រោយ នៅចម្ងាយប្រមាណ១១គីឡូម៉ែត្រពីគ្នា ពោលគឺនៅកណ្តាលក្រុងព្រុចសែលតែម្តង ស្រាប់តែមានការបំផ្ទុះមួយទៀត នៅក្នុងស្ថានីយរថភ្លើងក្រោមដីត្រង់សង្កាត់សហភាពអឺរ៉ុប ចំងាយតែប្រមាណ៣០០ម៉ែត្រ ពីទីស្នាក់ការគណៈកម្មការអឺរ៉ុប។ ក្រុមអ្នកសង្គ្រោះ បានលើកឡើងអំពីចំនួនជនបាត់បង់ជីវិតជាច្រើននាក់។
ប្រឈមមុខនឹងស្ថានភាពបែបនេះ បែលហ្ស៊ិកបានប្រកាសអាសន្នខ្ពស់បំផុត និងបង្កើនការប្រុងប្រយ័ត្នកាន់តែខ្លាំង ព្រោះការគំរាមកំហែងនៅមិនទាន់ចង់ទេ។ គ្រប់ជើងយន្តហោះហើរអន្តរជាតិ ត្រូវបង្វែរទៅចុះចតនៅក្រុងប៉ារីស។ មធ្យោបាយដឹកជញ្ជូនសាធារណៈត្រូវផ្អាក។ អាជ្ញាធរបានណែនាំពលរដ្ឋមិនឱ្យប្រើប្រាស់ទូរស័ព្ទ។ ទាហានជាច្រើនរយនាក់ ត្រូវបានដាក់ពង្រាយនៅក្រុងព្រុចសែល។
ភេរវកម្មចំបេះដូង អឺរ៉ុបពង្រឹងសន្តិសុខ
វាយប្រហារភេរវកម្មប្រឆាំងក្រុងព្រុចសែល គឺដូចជាប្រឆាំងនឹងអឺរ៉ុប ! ប្រឆាំងនឹងបណ្តាប្រទេសនៅអឺរ៉ុប។ ប្រតិកម្មសាមគ្គីភាពចំពោះបែលហ្ស៊ិកបានធ្លាក់មកជាបន្តបន្ទាប់ ! ប្រធានក្រុមប្រឹក្សាអឺរ៉ុប បានប្រកាសថ្កោលទោសភា្លម ចំណែកក្រុងបែរឡាំង បានចាត់ទុកថ្ងៃអង្គារនេះថ្ងៃអប្រិយសម្រាប់អឺរ៉ុប។
គ្រប់ប្រទេសជាសមាជិកអឺរ៉ុប បានកោះប្រជុំជាបន្ទាន់ ដើម្បីរឹតបន្តឹងសន្តិសុខក្នុងផ្ទៃប្រទេស ជាពិសេសនៅតាមព្រំដែន ជាក់ស្តែងនៅប្រទសបារាំងដែលធ្លាប់រងគ្រោះធ្ងន់ធ្ងរ ភ្លាមមួយរំពេច បានចេញវិធានការភ្លាមដែរ បញ្ចេញបន្ថែមកម្លាំងប៉ូលិសនគរបាល ចំនួន ១៦០០នាក់ ដើម្បីពង្រឹងសន្តិសុខ នៅតាមទីសាធារណៈ ជាពិសេសនៅតាមស្ថានីយ និងប្រព័ន្ធដឹកជញ្ជូនសាធារណៈ ឡានក្រុង រថភ្លើងក្រោមដី កំពង់ផែ អាកាសយានដ្ឋាន ...
ភេរវកម្មព្រុចសែលនិងប៉ារីស មានពាក់ព័ន្ធគ្នា?
ភេរវកម្មនៅក្រុងព្រុចសែលនេះ កើតឡើងតែប៉ុន្មានថ្ងៃក្រោយ ការចាប់ខ្លួន សាឡា អាប់ដេស្លាម ជនដៃដល់ម្នាក់ដែលបង្កភេរវកម្មនៅក្រុងប៉ារីស កាលពីថ្ងៃទី ១៣វិច្ឆិកា២០១៥។ តាមរយៈចម្លើយបឋម សាឡាអាប់ដេស្លាម បានបញ្ជាក់ថាមានគម្រោងធ្វើភេរវកម្មនៅព្រុចសែលទៀត ក្រោយភេរវកម្មនៅប៉ារីស។
បើតាមគ្រប់អ្នកវិភាគ ភេរវកម្មនេះគឺអាចជាការសងសឹក នឹងការចាប់ខ្លួន សាឡាអាប់ដេស្លាម ពីសំណាក់ពួកជីហាតដែលមិនទាន់ចាប់ខ្លួនបាន ឬ ក៏ពីសំណាក់បណ្តាញក្រុមផ្សេង។ តើជាផែនការបរាជ័យ ឬក៏បានសម្រេចនៅថ្ងៃនេះ ជាគម្រោងតែមួយ ជាគម្រោងដាច់ដោយឡែក ឬជាស្នាដៃរបស់ក្រុមជំនិតនឹងអាប់ដេស្លាម ឬជាក្រុមភេរវជនផ្សេង ? នេះសំណួរដែលពុំទាន់អាចកំណត់ចម្លើយបាននៅឡើយ ក្នុងដំណាក់កាលនេះ។
ប៉ុន្តែកាលពីថ្ងៃចន្ទម្សិលមិញ អាជ្ញាធរបែលហ្សិក បានប្រកាសស្វែងរកសាក្សី ស្វែងរកព័ត៌មាននិងដំណឹងដែលទាក់ទងទៅជនផ្សំគំនិតនឹងសាឡាអាប់ដេស្លាមពីរនាក់ ថាជាមនុស្សដែល គ្រោះថ្នាក់បំផុតសម្រាប់អឺរ៉ុប និងដែលអាចបញ្ចេញសកម្មភាពបានគ្រប់ពេលវេលា។ ប៉ូលិសបែលហ្ស៊ិក កំណត់អត្តសញ្ញាណបានម្នាក់ ដែលមានឈ្មោះថា ស៊ូហ្វីយ៉ាន កាយាល់ (Soufiane Kayal) តែឈ្មោះពិតគឺ ណាជីម ឡាឆ្រាវី (Najim Laachraoui) អាយុ២៤ឆ្នាំ និងធ្លាប់បានធ្វើដំណើរទៅស៊ីរី នៅឆ្នាំ២០១៣។
ជននេះធ្លាប់បានផ្តល់ជំរកឱ្យសាឡាអាប់ដេស្លាម យ៉ាងហោចបីអាទិត្យពេលរត់ពីប៉ូលិសរយៈពេលបួនខែ និងទំនងជាមេចាត់ចែង បញ្ជាលើភេរវកម្មនៅប៉ារីសផង ព្រោះគេឃើញមានស្នាមក្រយៅដៃនៅលើស្ទើរគ្រប់ខ្សែក្រវ៉ាត់គ្រាប់បែករបស់ភេរវជនអត្តឃាតផ្សេងៗ។ លេខទូរស័ព្ទប្លែកមួយហៅមកពីបែលហ្សិក ក្នុងថ្ងៃភេរវកម្មនៅប៉ារីស ១៣វិច្ឆិកា មកកាន់កងកម្មង់ដូភេរវកម្មដ៏ទំនងជារបស់ ណាជីប ឡាឆ្រាវីនេះឯង។
ការស្វែងរកដាន និងចាប់ពួកភេរវជននេះ ជួបការលំបាកខ្លាំង ក៏ព្រោះតែពួកនេះបើឈ្មោះពីរបី និងប្រើឯកសារក្លែងក្លាយគ្រប់ប្រភេទ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ