អង្គការពលកម្មអន្តរជាតិ៖ ពាក់កណ្តាលនៃចំនួនមនុស្សចាស់ក្នុងពិភពលោកគ្មានប្រាក់និវត្តន៍
ជិតពាក់កណ្តាលនៃចំនួនមនុស្សចាស់នៅក្នុងពិភពលោក មិនបានទទួលសោធននិវត្តន៍ ក្នុងពេលអ្នកដែលបានទទួលបា្រក់ចូលនិវត្តន៍ប្រមាណ៥២ភាគរយមិនបានទទួលសេវាគាំពារគ្រប់គ្រាន់។ នេះបើតាមការចេញផ្សាយរបាយការណ៍ កាលពីថ្ងៃអង្គារទី ៣០កញ្ញា អង្គការពលកម្មអន្តរជាតិដែលមានទីតាំងនៅទីក្រុងហ្សឺណែវ ប្រទេសស្វ៊ីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ដោយសារតែគ្មានសុវត្ថិភាពហិរញ្ញវត្ថុ មនុស្សចាស់ភាគច្រើននៅក្នុងពិភពលោករស់នៅក្នុងជីវភាពខ្វះខាត។ ជាញឹកញយ មនុស្សចាស់ដែលមានការងារធ្វើ មិនអាចចូលនិវត្តន៍ និងត្រូវបង្ខំចិត្ត ធ្វើការដើម្បីរកប្រាក់បន្ថែមចិញ្ចឹមជីវិត។ នេះជាការកត់សំគាល់របស់អង្គការពលកម្មអន្តរជាតិ ដែលបានធ្វើការសិក្សាស្រាវជ្រាវ នៅក្នុងប្រទេសចំនួន ១៧៨ នៅក្នុងពិភពលោក។
នៅក្នុងចំណោមប្រទេស១៧៨ មានប្រទេសតែ ៤៥ប៉ុណ្ណោះ ដែលបានផ្តល់សោធននិវត្តន៍ច្រើនជាង ៩០ភាគរយទៅឲ្យមនុស្សចាស់។ ចំណែក ប្រទេសកំពុងអភិវឌ្ឍន៍ ចំនួន២០ បានជោគជ័យធ្វើឲ្យមនុស្សចាស់បានទទួលប្រាក់និវត្តន៍ សឹង១០០ភាគរយ។ ប្រទេសកំពុងអភិវឌ្ឍន៍ ចាប់ផ្តើមពង្រីកសេវាផ្គត់ផ្គង់ប្រាក់និវត្តន៍ទៅមនុស្សចាស់។ គេរកឃើញសញ្ញាវិជ្ជមាន នៅក្នុងប្រទេសចិន ជាទីដែលមនុស្ស២៥ភាគរយនៃប្រជាជនចិនសរុប បានទទួលប្រាក់សោធននិវត្តន៍ពីរដ្ឋ។
ជាទូទៅ រដ្ឋាភិបាលក្នុងប្រទេសដែលមានប្រាក់ចំណូលទាបគ្មាននយោបាយផ្តល់ប្រាក់និវត្តន៍ទៅឲ្យមនុស្សចាស់ ក្នុងពេលដែលប្រទេសខ្លះចំណាយ២ភាគរយនៃផលិតផលក្នុងស្រុកសរុប ទៅលើកេសប្រាក់សោធននិវត្តន៍។ ប្រទេសនៅអឺរ៉ុបបានចាត់ចែងរក្សាប្រាក់១១ភាគរយនៃផលិតក្នុងសរុប សម្រាប់កេសចូលនិវត្តន៍របស់មនុស្សចាស់។
មនុស្សចាស់ចិនបានទទួលប្រាក់និវត្តន៍តែ៧០ភាគរយប៉ុណ្ណោះ។ សម្រាប់ប្រធានផ្នែកការពារសង្គមរបស់អង្គការពលកម្មអន្តរជាតិ ផ្តល់ប្រាក់និវត្តន៍ទៅមនុស្សកាន់តែច្រើនជារឿងល្អមួយ ប៉ុន្តែ ការផ្តល់ប្រាក់និវត្តន៍ច្រើនដើម្បីឲ្យមនុស្សចាស់រស់នៅសមរម្យគឺជារឿងសំខាន់មួយទៀត។
តាមអង្គការពលកម្មអន្តរជាតិ មនុស្សចាស់ចូលនិវត្តន៍នៅសហភាពអឺរ៉ុបកំពុងជួបស្ថានភាពខ្វះខាត បើទោះបីជាពួកគេបានទទួលប្រាក់សោធននិវត្តន៍រួចហើយក្តី។ នយោបាយរឹតបន្តឹងថវិការបស់រដ្ឋាភិបាលនៅបណ្តាប្រទេសអឺរ៉ុប ដើម្បីកាត់បន្ថយឱនភាពថវិកាបានជំរុញឲ្យមនុស្សចាស់រស់នៅក្នុងភាពក្រីក្រ កាន់តែច្រើន និងត្រូវគេផាត់ចេញពីសង្គមទៀត។ នយោបាយកាត់បន្ថយចំណាយសាធារណៈបានធ្វើឲ្យប៉ះពាល់ដល់ជីវភាពរបស់មនុស្សចាស់អឺរ៉ុបប្រមាណ ១២៣លាននាក់ ស្មើនឹង២៤ភាគរយនៃប្រជាជនអឺរ៉ុបសរុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ