ការបន្តកេណ្ឌគ្នីគ្នាធ្វើកូដកម្មប្រឆាំងនឹងកំណែទម្រង់ប្រព័ន្ធចូលនិវត្តន៍បារាំង
រដ្ឋាភិបាលបារាំងចង់បញ្ចប់គម្រោងច្បាប់ស្តីពីកំណែទម្រង់ ប្រព័ន្ធចូលនិវត្តន៍ឲ្យបានឆាប់រហ័ស ហើយសង្ឃឹមថាអត្ថបទច្បាប់ទាំងនោះនឹងត្រូវអនុម័តដោយព្រឹទ្ធសភានៅ ថ្ងៃទី២២តុលានេះ។ ចំណែកឯក្រុមសហជីពបារាំងវិញ គេបានសម្រេចបន្តកេណ្ឌប្រមូលគ្នីគ្នាដើម្បីធ្វើកូដកម្មប្រឆាំងនឹង កំណែទម្រង់ប្រព័ន្ធចូលនិវត្តន៍ ដោយបានប្រកាសឲ្យដឹងពីទិវាសកម្មភាពថ្មីពីរទៀតគឺបន្តធ្វើបាតុកម្ម នៅថ្ងៃព្រហស្បតិ៍ទី២៨តុលាហើយនិងនៅថ្ងៃសៅរ៍ទី៦វិច្ឆិកា។ ទាំងនេះដើម្បីបង្ខំឲ្យរដ្ឋាភិបាលបារាំងប្តូរប្រែឥរិយាបថរបស់ ខ្លួន។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
នៅប៉ុន្មានថ្ងៃទៀត អត្ថបទច្បាប់ស្តីពីកំណែទម្រង់ប្រព័ន្ធចូលនិវត្តន៍នឹងត្រូវអនុម័តជាស្ថាពរ។ ក្រុមអន្តរសហជីពបារាំងសង្ឃឹមទៅលើប្រជាប្រិយភាពនិងការគាំទ្ររបស់ប្រជាជនដើម្បីធ្វើការទាមទារឲ្យមានកិច្ចចរចាជាមួយរដ្ឋាភិបាល។
សម្រាប់អគ្គលេខាធិការនៃសហជីពFSU ការចុះថ្នល់ធ្វើបាតុកម្មដោយយុវសិស្សវិទ្យាល័យនិងមហាវិទ្យាល័យជាមួយក្រុមសហជីព ហើយនិងឯកភាពនៃក្រុមអន្តរសហជីពគឺពិតជាកម្លាំងមួយដ៏សំខាន់។
បើយោងតាមការស្ទាបស្ទង់មតិមួយនៅពេលថ្មីៗនេះ សាធារណមតិបារាំងមានដល់ទៅ៧៩%ដែលគាំទ្រចលនាកូដកម្ម។ គេចោទជាសំណួរសួរថា តើហេតុអ្វីបានជារដ្ឋាភិបាលបារាំងនៅតែពុំព្រមបើកកិច្ចចរចាជាមួយក្រុមសហជីព?
ក្រុមសហជីពបារាំងបានសម្តែងឲ្យដឹងថា ទោះបីជាក្រោយពីមានការអនុម័ត អត្ថបទច្បាប់ស្តីពីកំណែទម្រង់ប្រព័ន្ធចូលនិវត្តន៍ ពីសំណាក់ព្រឹទ្ធសភាក៏ដោយ ក៏ពួកគេនៅតែបន្តធ្វើបាតុកម្មប្រឆាំងនឹងរដ្ឋាភិបាលបារាំងជានិច្ច។
សូមបញ្ជាក់ថា ក្រុមអន្តរសហជីពបារាំងនឹងត្រូវជួបប្រជុំគ្នាជាថ្មីម្តងទៀតនៅថ្ងៃទី៤វិច្ឆិកាខាងមុខនេះ ដើម្បីធ្វើការសម្រេចថាតើពួកគេនឹងត្រូវធ្វើយ៉ាងណាទៀតដើម្បីប្រឆាំងនឹងកំណែទម្រង់ប្រព័ន្ធចូលនិវត្តន៍របស់រដ្ឋាភិបាលបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ