កំណែទម្រង់ច្បាប់ចូលនិវត្តន៍៖ បរិយាកាសសង្គមកំពុងបន្តតានតឹង
តំាងតែពីរដ្ឋាភិបាលបានចាប់ផ្តើមធ្វើកំណែទម្រង់ច្បាប់ចូលនិវត្តន៍មក ស្ថានការណ៍ក្នុងសង្គមហាក់ដូចជាបានតានតឹងឡើងជាលំដាប់។ កំណែទម្រង់ច្បាប់ចូលនិវត្តន៍ត្រូវបានសភា ពិនិត្យ អនុម័តរួចហើយ និងដែលខណៈនេះ កំពុងស្ថិតក្នុងដៃសមាជិកព្រឹទ្ធសភា។ តាមគម្រោង ព្រឹទ្ធសភានឹងពិនិត្យ សម្រេចនៅថ្ងៃពុធ ទី២០ តុលាសប្តាហ៍ក្រោយ។ បន្ទាប់មក ទើបគណៈកម្មការចម្រុះសភា និងព្រឹទ្ធសភាអនុម័តចុងក្រោយ។ តែរហូតមកដល់ថ្ងៃសៅរ៍ ទី១៦ តុលានេះទៀត ក្បួនបាតុកម្មប្រឆំាងនឹងកំណែទម្រង់ច្បាប់ចូលនិវត្តន៍នេះមានសន្ទុះកាន់តែខ្លំាងឡើងៗ និងតានតឹង។
ចុះផ្សាយនៅថ្ងៃ៖ កែប្រែថ្ងៃទី៖
បទអន្តរាគមន៍របស់ គួច គន្ធារ៉ា
បើគិតតំាងពី ៦សប្តាហ៍មក បាតុកម្មនៅថ្ងៃនេះ គឺជាក្បួនបាតុកម្មធំលើកទី៥ហើយ។ គឺជាក្បួនបាតុកម្មដែលរៀបចំដោយសហជីពចម្រុះបារំាង ដើម្បីទាមទារឲ្យរដ្ឋាភិបាលដកចេញវិញនូវកំណែទម្រង់ច្បាប់ចូលនិវត្តន៍។ ដំបូងឡើយ ពលរដ្ឋបារំាងភាគច្រើនដែលចូលរួមដង្ហែក្បួនបាតុកម្មនៅតាមខេត្ត ក្រុងទូទំាងប្រទេស ច្រើនជាបុគ្គលិករដ្ឋ ដូចយ៉ាងគ្រូបង្រៀន បុគ្គលិកនៅក្នុងក្រុមហ៊ុនដឹកជញ្ជូនសាធារណៈ ។ល។ និង។ល។ បន្ទាប់មកទៀត ក្បួនបាតុកម្មក៏បានចូលរួមដោយបុគ្គលិក កម្មករនៅតាមក្រុមហ៊ុន និងរោងចក្រសហគ្រាសឯកជន។ ជាទូទៅ ក្បួនបាតុកម្មរបស់ពួកគេទំាងនេះ មិនសូវបង្កចេញនូវអំពើហិង្សាជាដុំកំភួនអ្វីទេ។ តែគ្រប់សកម្មភាពក្នុងស្រុកហាក់ដូចជាបានជាប់គំាងមួយកន្លែង សេវាដឹកជញ្ជូនសាធារណៈមានដំណើរការយ៉ាងរអាក់រអួល សាលារៀនបិទទ្វារ រោងចក្រចម្រាញ់ប្រេងជាច្រើនកន្លែងត្រូវបានបិទខ្ទប់ ដែលជាហេតុនំាឲ្យស្ថានីយ៍លក់ប្រេងខ្វះប្រេងលក់ កម្មវិធីផ្សាយនៅតាមទូរទស្សន៍ និងវិទ្យុមានការរអាក់រអួល ដូចយ៉ាងកម្មវិធីផ្សាយតាមរលកវិទ្យុបារំាងអន្តរជាតិ ជាឧទាហរណ៍ជាក់ស្តែង។
ឥឡូវនេះ ស្ថានការណ៍បានធ្លាក់កាន់តែដុនដាបមួយកំរិតទៀតនារយៈពេល៣ថ្ងៃចុងក្រោយនេះ ព្រោះថា ចលនាប្រឆំាងបានចូលរួមដោយក្រុមសិស្ស និស្សិតនៅតាមវិទ្យាល័យ និងមហាវិទ្យាល័យមួយចំនួននៅទូទំាងប្រទេស។ នៅថ្ងៃសុក្រម្សិលមិញ ក្បួនបាតុកម្មរបស់សិស្ស និស្សិតមានទំហំកាន់តែខ្លាំងក្លាបន្ថែមទៀត ដោយមានការចូលរួមពីសិស្ស និស្សិតរាប់សិបពាន់នាក់មកពីវិទ្យាល័យប្រមាណជា ៩០០ នៅសឹងតែគ្រប់ខេត្ត ក្រុងទូទាំងប្រទេស។
អ្វីជាការកត់សម្គាល់ និងខុសពីក្បួនបាតុកម្មរបស់បុគ្គលិក កម្មករ ក្បួនបាតុកម្មរបស់សិស្ស និស្សិតដែលមានបង្កប់ដោយក្រុមខិលខូច អ្នកវាយបំផ្លិចបំផ្លាញ ច្រើនបង្កចេញនូវមហន្តរាយ និងអំពើហិង្សាយ៉ាងខ្លំាងក្លាជាមួយក្រុមប៉ូលីស។ រហូតមកទល់ពេលនេះ ប៉ូលីសបានចាប់ខ្លួន ២៦៤នាក់។ មួយវិញទៀត អន្តរាគមន៍របស់ក្រុមប៉ូលីសបានបណ្តាលឲ្យរងរបួសកូនសិស្សជាច្រើននាក់ទៀតផង។
គឺវត្តមានរបស់សិស្ស និស្សិត ឬយើងអាចនិយាយថា ក្រុមយុវវ័យនៅក្នុងក្បួនបាតុកម្មនាពេលនេះឯង ដែលបាននិងកំពុងធ្វើឲ្យរដ្ឋាភិបាលឈឺក្បាលយ៉ាងខ្លំាង។
មេរៀនជូរចត់កាលពី ៤ឆ្នំាមុន ដែលត្រូវចៀសវាង
អ្វីដែលជាក្តីបារម្ភរបស់រដ្ឋាភិបាលនោះ គឺខ្លាចតែចលនាងើបបះបោររបស់ក្រុមយុវវ័យនាពេលនេះ រីករាលដាលកាន់តែធំទៅៗ។ មួយវិញទៀត ការប្រើកម្លំាងបាយដើម្បីបង្រ្កាបលើក្រុមយុវវ័យ ដែលយើងតែងហៅថាក្រុមក្មេងឈាមរាវ វារឹតតែបញ្ឆេះកំហឹង និងជម្រុញឲ្យពួកគេកាន់តែហ៊ានធ្វើអ្វីៗគ្រប់បែបយ៉ាង ដោយមិនខ្លាចស្លាប់ទៀតផង។ អ៊ីចឹងបានជាក្រោយពីមានការបង្រ្កាបយ៉ាងចាស់ដៃដែលបណ្តាលឲ្យរបួសកូនសិស្សម្នាក់អាយុ ១៦ត្រង់ភ្នែកដោយគ្រាប់កំាភ្លើងជ័រមក ក្រសួងមហាផ្ទៃបានសម្រេចព្យួរការប្រើប្រាស់កំាភ្លើងគ្រាប់ជ័រក្នុងការបង្រ្កាបលើបាតុករ ពិសេស បញ្ជាឲ្យកងសមត្ថកិច្ចអត់ធ្មត់នៅចំពោះមុខការញុះញង់របស់ក្រុមសិស្ស និស្សិត។
តើអ្នកណាដែលបានអំពាវនាវឲ្យសិស្ស និស្សិតចូលរួមនៅក្នុងក្បួនបាតុកម្មប្រឆំាងនឹងកំណែទម្រង់ច្បាប់ចូលនិវត្តន៍នាពេលនេះ ?
នេះហើយជាសំណួរ ដែលបាននិងកំពុងបង្កឲ្យមានសង្រ្គាមពាក្យសំដីរវាងរដ្ឋាភិបាល និងគណបក្សប្រឆំាង រវាងរដ្ឋាភិបាល និងក្រុមសហជីព និងរវាងក្រុមសហជីព និងក្រុមសហជីពដូចគ្នា។
ការដែលរដ្ឋាភិបាលបារម្ភពីការចូលរួមរបស់សិស្ស និស្សិតក្នុងការប្រឆំាងនឹងកំណែទម្រង់ច្បាប់ចូលនិវត្តន៍របស់ខ្លួននាពេលនេះ មកពីរដ្ឋាភិបាលធ្លាប់មានបទពិសោធន៍ដ៏ល្វីងជូរចត់មួយកាលពី ៤ឆ្នំាមុន។ ៤ឆ្នំាមុន ដែលរដ្ឋអំណាចក៏ស្ថិតក្នុងកណ្តាប់ដៃគណបក្សស្តំានិយមដូចបច្ចុប្បន្ន តែប្រធានាធិបតីកាលណោះ គឺលោក Jacque Chirac និងនាយករដ្ឋមន្រ្តី លោក Dominique de Villepin។ កាលពី៤ឆ្នំាមុន ពោលគឺក្នុងឆ្នំា ២០០៦ រដ្ឋាភិបាលរបស់លោក Villepin បានបង្កើតឲ្យមានប្រភេទកិច្ចសន្យាការងារថ្មីមួយ ដែលមានឈ្មោះថា កិច្ចសន្យាចូលធ្វើការដំបូង ឬភាសាបារំាងហៅថា Contrat Première Embauche ហៅកាត់ថា CPE។ លោក Villepin បានបង្កើត CPE ឡើងក្នុងគោលដៅជួយសម្រួលការចូលប្រឡូកក្នុងទីផ្សារការងារលើកដំបូងរបស់ក្រុមយុវវ័យដែលមានអាយុក្រោម ២៦ឆ្នំា។
ក៏ប៉ុន្តែ នេះមិនមែនជាការយល់ឃើញរបស់ក្រុមសិស្ស និស្សិត និងក្រុមយុវវ័យជាទូទៅទេ។ ពួកគេក៏បានផ្តើមចុះផ្លូវធ្វើបាតុកម្មយ៉ាងភ្លូកទឹក ភ្លូកដី ដែលនៅទីបំផុត លោក Villepin ក៏បានសម្រេចចិត្តដក CPE នោះចេញវិញជាបន្ទាន់ភ្លាមៗដែរ។
រដ្ឋាភិបាលមិនចុះញ៉មចំពោះមុខក្បួនបាតុកម្ម
រហូតមកទល់ម៉ោងនេះ រដ្ឋាភិបាលនៅបន្តរក្សាជំហរបស់ខ្លួនដដែល ដោយមិនព្រមដកថយទេ។ ទំាងលោកប្រធានាធិបតី ទំាងលោកនាយករដ្ឋមន្រ្តី និងសមាជិករដ្ឋាភិបាលគ្រប់ជាន់ថ្នាក់របស់បក្សកាន់អំណាច បាននិងកំពុងបន្តព្យាយាមពន្យល់បកស្រាយប្រាប់ពលរដ្ឋបារំាងទំាងអស់ អំពីផលប្រយោជន៍នៃកំណែទម្រង់ច្បាប់ចូលនិវត្តន៍ដែលមិនអាចខ្វះបាន។ យោងតាមរដ្ឋាភិបាល ប្រសិនបើគ្មានកំណែទម្រង់ច្បាប់ចូលនិវត្តន៍ទេ ក្នុង រយៈពេល ២០ឆ្នំា ខាងមុខ អ្នកចូលនិវត្តន៍ម្នាក់ក្នុងចំណោមអ្នកចូលនិវត្តន៍ ៦នាក់ នឹងគ្មានបានទទួលប្រាក់ចូលនិវត្តន៍ទេ។
លោកប្រធានាធិបតីសាកូហ្ស៊ីបានប្រកាសយ៉ាងដាច់ណាត់ថា លោកនឹងមិនព្រមចុះញ៉មនៅចំពោះមុខក្បួនបាតុកម្មទេ។ ចំពោះលោក សាកូហ្ស៊ី បើឲ្យតែមានបាតុកម្មម្តងៗ រដ្ឋាភិបាលត្រូវតែដកថយនោះ គេមិនបាច់ធ្វើកំណែទម្រង់អ្វីទំាងអស់នៅក្នុងប្រទេសបារំាង។
អ៊ីចឹងសួរថា បើក្បួនបាតុកម្មនៅតែបន្តខ្លំាងឡើង តើអាចជម្រុញឲ្យរដ្ឋាភិបាលដកកំណែទម្រង់ចេញវិញដែរ ឬទេ ?
ចម្លើយគឺមិនអាចថាបាន។ តែក្នុងពេលនេះ មានពលរដ្ឋបារំាងភាគច្រើនបានគំាទ្រក្បួនបាតុកម្ម ដោយពួកគេបានចាត់ទុកកំណែទម្រង់ច្បាប់ចូលនិវត្តន៍របស់រដ្ឋាភិបាល ថាមិនយុត្តិធម៌ និងគ្មានប្រសិទ្ធិភាព។ សម្រាប់អ្នកខ្លះទៀត បានអំពាវនាវរដ្ឋាភិបាលឲ្យបើកកិច្ចចរចាជាមួយក្រុមសហជីព ដើម្បីស្វែងរកដំណោះស្រាយសមស្របមួយ ទទួលយកបានទំាងអស់គ្នា។
តែយ៉ាងណាក៏ដោយ ការពិតនឹងស្តែងឲ្យឃើញនៅថ្ងៃខាងមុខ ព្រោះថា ក្បួនបាតុកម្មដ៏ធំមួយទៀតនឹងគ្រោងរៀបចំនៅថ្ងៃអង្គារ ទី១៩ តុលាសប្តាហ៍ក្រោយ ពោលគឺ១ថ្ងៃ មុនព្រឹទ្ធសភាបោះឆ្នោតសម្រេច។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ