ទិវាសិទ្ធិនារីអន្តរជាតិលើកទី១០៥៖ អ.ស.ប ជំរុញការគោរពសិទ្ធិស្ត្រីជនបទ
ស្របទៅនឹងខួបលើកទី១០៥ នៃទិវាសិទ្ធិនារីអន្តរជាតិ ៨មីនា ឆ្នាំ២០១៦ គណៈកម្មាធិការទទួលបន្ទុកការលុបបំបាត់រាល់ទម្រង់នៃការរើសអើងប្រឆាំងនឹងស្ត្រីភេទ (ស៊ី.ដ) បានចេញសេចក្តីថ្លែងការណ៍អំពាវនាវឲ្យមានការផ្តោត ការគោរពសិទ្ធិ និងលើកកម្ពស់ស្ថានភាពស្ត្រី និងកុមារីនៅតាមទីជនបទ។ ស្ត្រី និងកុមារីជនបទ ដែលអ្នកជំនាញការអង្គការសហប្រជាជាតិ នៅតែមើលថា កំពុងតែប្រឈមនឹងការរើសអើង និងមិនទទួលបានសិទ្ធិគ្រប់គ្រាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ទោះបីជាសន្និសីទអង្គការសហប្រជាជាតិជាច្រើន បានទទួលស្គាល់ការរួមចំណែកដ៏សំខាន់របស់ស្ត្រីជនបទ ក្នុងការអភិវឌ្ឍជនបទ ស្បៀងអាហារ និងអាហាររូបត្ថម្ភ ព្រមទាំងកាត់បន្ថយភាពក្រីក្រក៏ដោយ ប៉ុន្តែស្ត្រី និងកុមារី នៅតាមទីជនបទ ដែលមានចំនួន ១ភាគ៤នៃចំនួនប្រជាជនសរុបលើពិភពលោក បានបន្តជួបប្រទះបញ្ហាប្រឈមជាច្រើន រាប់ទាំងរបាំងដ៏រឹងរុស និងជាប្រព័ន្ធ ដល់ការអនុវត្តសិទ្ធិស្ត្រីឲ្យបានពេញលេញ។
តាមការឃ្លាំមើលរបស់គណៈកម្មាធិការទទួលបន្ទុកការលុបបំបាត់រាល់ទម្រង់នៃការរើសអើងប្រឆាំងនឹងស្ត្រីភេទ ហៅកាត់ថាស៊ី. ដ នៅប្រទេសជាច្រើន តម្រូវការជាក់លាក់របស់ស្ត្រី មិនត្រូវបានដោះស្រាយត្រឹមត្រូវ ក្នុងច្បាប់ គោលនយោបាយថវិកាជាតិ និងថវិកាមូលដ្ឋានឡើយ។ ហើយពួកគេ ថែមទាំងត្រូវបានផាត់ចេញពីភាពជាអ្នកដឹកនាំ និងមុខតំណែងធ្វើការសម្រេចនៅគ្រប់កម្រិតទៀតផង។
នៅកម្ពុជាវិញ រដ្ឋាភិបាល ក៏បានទទួលស្គាល់ដែរថា ស្ត្រីក្នុងតំបន់ទាំងនេះ នៅតែទទួលបានការរើសអើង ការរំលោភបំពានសិទ្ធិជាមូលដ្ឋានគ្រឹះ។ ពួកគេ នៅតែត្រូវបានបុរស ដែលជាប្តី ឬជាសង្សារ ប្រើអំពើហិង្សាធ្វើបាប ហើយក្នុងនោះ មានទាំងការរំលោភ រួចសម្លាប់ចោល ផងដែរ។ ប្រមុខរដ្ឋាភិបាលកម្ពុជា បានចាត់ទុកថា ទាំងនេះ ជាកង្វះសីលធម៌សង្គមធ្ងន់ធ្ងរ ដែលត្រូវការការចូលរួមទាំងអស់គ្នា ដើម្បីលើកស្ទួយស្ត្រី ជាពិសេសស្ត្រីទន់ខ្សោយ នៅតាមទីជនបទនានា។
ចំពោះបញ្ហាទាំងនេះ (ស៊ី ដ) បានជម្រុញឲ្យសហគមន៍អន្តរជាតិ រួមទាំងរដ្ឋាភិបាលផង ត្រូវធ្វើឲ្យប្រាកដ តាមរយៈការផ្តល់សិទ្ធិអំណាចឲ្យស្ត្រី និងកុមារី នៅតាមជនបទ។ សិទ្ធិអំណាច ចំនួន ១០ដែល(ស៊ី ដ) ចង់ឲ្យស្ត្រីជនបទ ទទួលបានរួមមាន ការអនុម័តក្របខ័ណ្ឌគតិយុត្តិដែលមិនរើសអើង និងការផ្តល់ភាពងាយស្រួល ព្រមទាំងលទ្ធភាពសមរម្យដល់ស្រី្តជនបទ ក្នុងការស្វែងរកយុត្តិធម៌។ ត្រូវផ្តោតលើតម្រូវការពិសេសរបស់ក្រុមស្ត្រីបាត់បង់ឱកាស និងដែលគេមិនសូវយកចិត្តទុកដាក់គិតគូ។ ក្នុងនោះ ក៏ត្រូវតែលុបបំបាត់ផ្នត់គំនិតអវិជ្ជមាន ទំនៀមទម្លាប់ ការអនុវត្តដែលគ្រោះថ្នាក់ និងការបង្ខិតបង្ខំអាពាហ៍ពិពាហ៍។ លើសពីនេះ (ស៊ី ដ) បានអំពាវនាវផងដែរ ឲ្យផ្តល់លទ្ធភាព ដល់ស្ត្រី និងកុមារីជនបទ ទទួលបានការអប់រំ សម្ភារៈបរិក្ខារ និងសេវាគាំពារសុខភាព ដែលមានគុណភាព និងតម្លៃសមរម្យ សម្រាប់ជីវិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ