ប្រមុខការទូតឡេតូនីនិងរុស្ស៊ីពិភាក្សានៅម៉ូស្គូអំពីសហប្រតិបត្តិការរុស្ស៊ី-អឺរ៉ុប
ការពិភាក្សានេះ គឹក្នុងបរិបទដែល ឡេតូនីបានឡើងធ្វើជាប្រធានផ្លាស់វេន ជា លើកដំបូង របស់សហភាពអឺរ៉ុប សម្រាប់ឆមាសទី១ឆ្នាំ២០១៥នេះ។ ឧទ្ទិសដល់ជំនួបថ្ងៃនេះ ក្រសួងការបរទេសរុស្ស៊ី បានចេញសេចក្តីថ្លែងការណ៍ថា ប្រធានបទគន្លឹះ គឹជុំវិញដំណោះស្រាយវិបត្តិនៅអ៊ុយក្រនទំនាក់ទំនងពាណិជ្ជកម្មទ្វេភាគី ចំណែកប្រមុខការទូត ឡេតូនី បានថ្លែងថា បញ្ហាមួយជាក្តីកង្វល់ សម្រាប់ប្រទេសគាត់ គឺនាពេលចុងក្រោយ ឧស្សាហ៏ មានយន្តហោះយោធារុស្ស៊ី ហោះសសៀរតាមព្រំដែនឡេតូនី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ក្រសួងការបរទេសរុស្ស៊ី រំពឹងថា លក្ខន្តិកៈឡេតូនីជាប្រធានសហភាពអឺរ៉ុប មុខជានឹងជម្រុញដល់ការលុបទៅវីញឧបសគ្គជាសិប្បនិម្មិតដែលរាំងរាផ្លូវនៃសហប្រតិបត្តិការរវាងរុស្ស៊ីនិងសហភាពអឺរ៉ុបគ្រាន់នឹងអនុគ្រោះដល់ដំណោះស្រាយបញ្ហាណាដែលជាគុណប្រយោជន៍ទៅវិញទៅមក។
តាមយោបល់ក្រុងម៉ូស្គូ គូភាគីផ្តោតលើប្រធានបទអន្តរជាតិជាគន្លឹះ ដោយភ្ជុងស្មារតី ទៅលើការពុះពារជំនះដោយសន្តិវិធី លើវិបត្តិនយោបាយលង់ជ្រៅផ្ទៃក្នុងអ៊ុយក្រែន។ ទាក់ទង នឹងសាច់រឿងនេះ លោកប្រមុខការទូតឡេតូនី Edgar Renkovich មុននឹងចេញដំណើរមក បំពេញទស្សនកិច្ច បានថ្លែងថា ប្រទេសគាត់ ត្រៀមគាំទ្រដល់ការលុបទៅវិញទណ្ឌកម្ម ប្រឆាំងរុស្ស៊ី ប៉ុន្តែសម្រាប់គោលដៅនេះ ម៉ូស្គូចាំបាច់ ត្រូវតែជួយជ្រោមជ្រែងឲ្យ ស្ថានការណ៍នៅតំបន់បះបោរខាងកើតអ៊ុយក្រែន វិវឌ្ឍបានល្អឡើង។ ប្រសាសន៍លោក Renkovich គឺ សាមគ្គីជាមួយល័ក្ខខ័ណ្ឌដាក់ចេញដោយ លោកប្រធានាធិបតី អាមេរិក បារ៉ាក់ អូបាម៉ានិងលោកស្រីនាយរដ្ឋមន្ត្រីអាល្លឺម៉ង់ អង់ហ្កែឡា ម៊ែកេល ។
រដ្ឋមន្ត្រីការបរទេសឡេតូនីក៏គូសបញ្ជាក់ថា រុស្ស៊ីមានភារៈមិនគ្រាន់តែជួយរៀបរយ ឲ្យមាន កិច្ចសន្ទនានយោបាយរវាងភាគីបដិបក្ខនៅតំបន់ខាងកើតអ៊ុយក្រែនប៉ុណ្ណោះទេ តែ ក៏ត្រូវរែកលើស្មាខ្លួននូវនាទីទទួលខុសត្រូវចំពោះដំណើរប្រព្រឹត្តទៅនៃកិច្ចសន្ទនានេះ។
ចំណែកបញ្ហាជាក្តីកង្វល់ផ្ទាល់របស់ឡេតូនី នោះតាមសម្តីលោក Renkovich ក្នុងប៉ុន្មានខែចុងក្រោយនៃឆ្នាំ២០១៤កន្លងផុតទៅ ឧស្សាហ៍មានយន្តហោះយោធារុស្ស៊ី ហោះសសៀរ តាមព្រំដែនឡេតូនី។ គាត់សង្ឃឹមថា ជាលទ្ធផលនៃកិច្ចចរចានៅម៉ូស្គូ ជាមួយសមភាគីរុស្ស៊ីលោក Serguei Lavrov ស្ថានការណ៍ក្នុងវិស័យនេះ ដែលងំជាប់តាំងពីឆ្នាំមុនមកច្បាស់ជា ជានឹងបានធូរស្រាលវិញពុំខាន។
តាមការសង្កេតឃើញរបស់ក្រុងម៉ូស្គូ ទោះបីការផ្តោះប្តូរពាណិជ្ជកម្ម រវាងរុស្ស៊ីនិងឡេតូនី ក្នុងឆ្នាំ២០១៤បានកើនឡើង ៣០,៤% បើប្រៀបទៅនឹងឆ្នាំ ២០១៣ លុះដល់ទឹកប្រាក់ ជាង ១២.០០០លានដុល្លារក្តីក៏បរិយាកាសនៃទំនាក់ទំនងទ្វេភាគី រុស្ស៊ី-ឡេតូនី បន្តស្ថិតនៅ អវិជ្ជមាន ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ