បណ្តាជនឡេត្តូនីបំផុសចលនាប្រឆាំងនឹងការបង្រៀនជាភាសារុស្ស៊ី
និយាយឲ្យចំគឺគេនាំគ្នាអង្គាសហត្ថលេខាប្រឆាំងនឹងការផ្តល់ ហិរញ្ញប្បទានចេញពីថវិការដ្ឋទៅផ្គត់ផ្គង់ឧបត្ថម្ភដល់សាលារៀនណា នៅឡេត្តូនីដែលបង្រៀនសិស្សមិនមែនជាភាសាជាតិឡេត្តូនីដោយក្នុង បុព្វហេតុនេះ គឺតម្រង់ជាពិសេសទល់នឹងសាលាណាដែលបង្រៀនជាភាសារុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
តាមដែល “គណៈកម្មការជាតិរៀបចំការបោះឆ្នោត”ហៅថា គ.ជ.ប. ប្រកាសឲ្យដឹងមកទល់ឥឡូវនៅឡេត្តូនីមានបណ្តាជនម្ចាស់ឆ្នោត ចេះអង្គាសបានហត្ថលេខាជាង១សែននាក់ហើយ ពោលគឺ១១២.៦០៨នាក់។ គោលដៅនៃការអង្គាសហត្ថលេខានេះ គឺ ដើម្បីទាមទារពីអាជ្ញាធរឲ្យបើកធ្វើប្រជាមតិ ជុំវិញសាច់រឿងដែលមាន។ ប៉ុន្តែ ដើម្បីឲ្យប្រជាមតិបែបនេះអាចប្រព្រឹត្តទៅកើតស្របនឹងច្បាប់បោះឆ្នោតនៅឡេត្តូនីគឺតម្រូវឲ្យអង្គាសហត្ថលេខាបានយ៉ាងហោចណាស់ក្នុងចំនួន ១១៣.២៣២នាក់។
ចលនាអង្គាសហត្ថលេខានេះគឺបានត្រូវផ្តួចផ្តើមឡើងដោយសម្ព័ន្ធជាតិនិយមដែលមានឈ្មោះថា “ រាល់អ្វីៗទាំងអស់ គឺសម្រាប់មាតុភូមិនិងសេរីភាពឡេត្តូនី “។
ប្រសិនបើប្រជាមតិអាចសម្រេចដោយលទ្ធផលជាវិជ្ជមានមែន នោះ វិសោធនកម្មនឹងត្រូវបញ្ចូលទៅក្នុងមាត្រាទី១១២នៃរដ្ឋធម្មនុញ្ញ ហើយកំណត់ថា៖
នៅឡេត្តូនីហិរញ្ញប្បទានពីខាងថវិការដ្ឋនឹងផ្តល់ឲ្យតែសាលារៀនណា ដែលបង្រៀនតែជាភាសាឡេត្តូនីប៉ុណ្ណោះ។ តាមតួលេខចេញខែមករាឆ្នាំ២០១១នេះ ឡេត្តូនី មានបណ្តាជន ជិត២លាន៣សែននាក់ពីក្នុងនោះជាង៥៩%ជាជាតិឡេត្តូនីសុទ្ធនិងជាង២៧%ជាជាតិរុស្ស៊ីដែលជាប់ចំណាត់ថ្នាក់ទី២។
ភាសារុស្ស៊ីត្រូវចាត់ទុកជា”ភាសាកំណើតទី២” របស់បណ្តាជនដល់ទៅ៣២,៥%ហើយជា “ភាសាយាន” ជាប់លេខ១ដែលនិយមប្រើដោយបណ្តាជនដល់ទៅ៨១,២%ទោះបីឡេត្តូនីបានឯករាជ្យផ្តាច់ខ្លួនពីរុស្ស៊ីតាំងពី២០ឆ្នាំមុនក្តី។
គួរនិយាយថា ពីក្នុងចំណោម១៥អតីតសាធារណរដ្ឋនៃសហភាពសូវៀតដែលរលាយទៅក្នុងឆ្នាំ ១៩៩១ សព្វថ្ងៃរាជាណាចក្រកម្ពុជាមានទំនាក់ទំនងការទូត ក្រៅពីជាមួយសហព័ន្ធរុស្ស៊ីផ្ទាល់ក៏ទាំងជាមួយ៣ប្រទេសនៅមាត់សមុទ្របាល់ទិកគឺឡេត្តូនី លីទុយអានី អេស្តូនីដែលបច្ចុប្បន្នសុទ្ធតែក្លាយជា សមាជិកបក្សសម្ព័ន្ធអូតង់និងសហភាពអឺរ៉ុបទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ