ទោះបីបានឯករាជ្យ២០ឆ្នាំទៅហើយក្តីក៏ឡេតូនីនៅតែចងគំនុំនឹងរុស្ស៊ី
ឥរិយាបថនេះ ទើបរំលេចឲ្យឃើញ ដោយរដ្ឋមន្ត្រីការពារជាតិឡេតូនី ដែលថ្លែងថា រូបសំណាកឧទ្ទិសដល់វិញ្ញាណក្ខ័ន្ធយុទ្ធជនសូវៀត ដែលក្នុងឆ្នាំ១៩៤៤ សម័យសង្គ្រាមលោកលើកទី២ ចេះរំដោះទីក្រុង Riga រដ្ឋធានីឡេតូនី ចេញផុតពីការកាន់កាប់ នៃកងទ័ពហ្វាស៊ីសអាល្លឺម៉ង់ គួរតែគាស់រំលើងចេញទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៨
ជាការកត់សម្គាល់ រូបសំណាកនេះក្រោមឈ្មោះថា “បូជនីយស្តម្ភជ័យជំនះ” ដែលស្ថិតនៅចំកណ្ដាលក្រុង Riga រដ្ឋធានីឡេតូនី ត្រូវបានសម្ពោធ កាលក្នុងឆ្នាំ១៩៨៥ គឺ សម័យអំណាចសូវៀត។ វាមានកំពស់ដល់ទៅ ៧៩ម៉ែត្រ ហើយលំអ ទៅដោយកម្រងរូបចម្លាក់“មាតុភូមិ-មាតា និង យុទ្ធជនរំដោះ”។ តាំងពីពេលនោះមក រៀងរាល់ថ្ងៃបុណ្យជ័យជំនះ គឺទិវា៩ឧសភា ដែលកាលពីក្នុងឆ្នាំ ១៩៤៥ មេទ័ពរបស់ Hitler បានចុះហត្ថលេខាសុំចុះចាញ់ នៅពីមុខមេទ័ពសូវៀត តែងមានមនុស្សទាំងពាន់ៗនាក់ ទៅជួបជុំគ្នា នៅលើទីលាន ជុំវិញរូបសំណាកនេះ ប្រារព្ធបុណ្យជ័យជំនះ។
ឲ្យសម្ភាសន៍ទៅកាសែតក្នុងស្រុក Neatkariga លោករដ្ឋមន្ត្រីការពារជាតិឡេតូនី Artis Pabriks ថ្លែងថា ការប្រារព្ធបុណ្យជ័យជំនះថ្ងៃ៩ឧសភា ក្នុងរូបភាពសព្វថ្ងៃ គឺធ្វើឲ្យគាត់ទើសចិត្តណាស់។ ដ្បិត តាមសំដីគាត់ របស់ដែលហៅថា “បូជនីយស្តម្ភជ័យជំនះ” បច្ចុប្បន្ន វាលែងជានិមិត្តរូបនៃវិញ្ញាណក្ខ័ន្ធទាហានរំដោះទៀតឡើយ តែវាជាវត្ថុដក់ជាប់ដោយន័យនយោបាយដ៏ធំទៅវិញ។ ពីព្រោះ គោលដៅមនុស្សភាគច្រើន ដែលទៅជួបជុំគ្នានៅទីនោះ គឺមិនមែន ដើម្បីនឹកចងចាំ ទៅដល់អ្នកដែលអភ័ព្វស្លាប់ទៅ ក្នុងសង្គ្រាមលោកលើកទី២ឡើយ តែគឺដើម្បីក្តោបក្តាប់ឡេតូនី ឲ្យស្ថិតនៅក្នុង “វិស័យភូមិសាស្ត្រ-នយោបាយ” ម្យ៉ាង ដែលលែងមានអត្ថិភាព២០ឆ្នាំមកហើយ។ ព្រមជាមួយនេះ លោករដ្ឋមន្ត្រីការពារជាតិឡេតូនី ក៏សារភាពថា ការគាស់រំលើងបូជនីយស្តម្ភនេះ មុខជានឹងបង្កជាផលវិបាកដ៏គ្រោះថ្នាក់យ៉ាងច្រើនឥតគណនា។
ឥឡូវ មានទៅហើយ ប្រតិកម្មពីខាងអភិបាលក្រុង Riga ដែលរុស្ស៊ីនិយមទេតើ គឺលោក Nil Oushakov ដែលចាត់ទុកសំណើរបស់រដ្ឋមន្ត្រីការពារជាតិ ថាជា“គំនិតភ្លីភ្លើរកលេខដាក់គ្មាន”។
អំពីវាសនាក្រុង Riga គឺថា ថ្ងៃ១៧មិថុនាឆ្នាំ១៩៤០ វាបានធ្លាក់ទៅនៅក្រោមការកាន់កាប់ នៃកងទ័ពក្រហមសូវៀត ប៉ុន្តែ១ឆ្នាំក្រោយមក នៅថ្ងៃ១កក្កដាឆ្នាំ១៩៤១ កងទ័ពនេះបានបង្ខំចិត្តដកចេញទៅក្រោមសម្ពាធទ្រាំមិនបាន នៃការវាយប្រហារពីខាងកងទ័ពអាល្លឺម៉ង់របស់ Hitler។ លុះថ្ងៃទី ១៣តុលាឆ្នាំ១៩៤៤ រដ្ឋធានីឡេតូនីនេះ ក៏ត្រូវបានរំដោះរួច ហេតុដែលហុចលទ្ធភាពដល់កងទ័ពក្រហមសូវៀត ឲ្យវិលត្រឡប់ទៅកាន់កាប់ក្រុងនេះវិញ។
Lettonie ផ្ទាល់ ក៏ដូចជាប្រទេស២ទៀត នៅមាត់សមុទ្របាល់ទិក គឺ Estonie និង Lituanie បានក្លាយជារដ្ឋឯករាជ្យ ស្របនឹងកិច្ចព្រមព្រៀងចុះខែមករា ឆ្នាំ១៩៩១ រវាងអតីតសាធារណរដ្ឋសូវៀតទាំង៣នេះ និងប្រធានាធិតីទី១នៃប្រទេសរុស្ស៊ីសម័យថ្មី គឺលោក Boris Yeltsine៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ