ឡេតូនីចោទរុស្ស៊ីថា ចេះតែវាតការឃោសនាមួលបង្កាច់
ការនេះ មានចែងក្នុងរបាយការណ៍ប្រចាំឆ្នាំ ទើបចេញផ្សាយព្រឹកមិញ ដោយ “ការិយាល័យឡេតូនីខាងការពាររដ្ឋធម្មនុញ្ញ” ដែលបំពេញមុខងារ ខាងឈ្លបយកការសម្ងាត់ និង ខាងប្រតិចារកិច្ច។ របាយការណ៍ ចាត់ទុកគោលដៅ ដែល”បង្កប់” នៅក្នុងនយោបាយក្រៅប្រទេសរុស្ស៊ី គឺ ជាការគំរាមដល់ផលប្រយោជន៍ជាតិរបស់ ឡេតូនី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
ជាបឋម គួររំលឹកថា ឡេតូនីស្ថិតក្នុងចំណោម ៣ប្រទេសនៃអតីតសហភាពសូវៀត នៅមាត់សមុទ្របាល់ទិក ហៅថា “ប្រទេសបាល់ទ៏” ដែលត្រូវបានរាជាណាចក្រកម្ពុជា តាំង ទំនាក់ទំនងការទូតជាមួយ ក្រោយពីសហភាពសូវៀត រលំរលាយទៅក្នុងឆ្នាំ១៩៩១។
ចំណែករបាយការណ៍របស់ ការិយាល័យឡេតូនីខាងការពាររដ្ឋធម្មនុញ្ញ លើកឡើងជាអាទិ៍៖
- នយោបាយក្រៅប្រទេសរុស្ស៊ី គឺសំដៅ ផ្លុំបញ្ឆេះ ការឃោសនាមួលបង្កាច់ប្រឆាំងរដ្ឋឡេតូនី ដោយចោទឡេតូនីថា កំពុងប្រស់ លទ្ធិហ្វាស្ស៊ីសឲ្យរស់ឡើងវិញ នៅឡេតូនី ដោយកំពុងសរសេរ ប្រវត្តិសាស្ត្រឡើងវិញ ទាំងខំស្វះស្វែងបង្ហាញឲ្យពិភពលោកឃើញថា ឡេតូនី ជា “រដ្ឋពេញលក្ខណៈ” ដោយសង្កត់ធ្ងន់ទៅលើចំណុចដែលថា ឡេតូនីចេះតែធ្វើនយោបាយរើសអើង ចំពោះបណ្តាជនដែលនិយាយភាសារុស្ស៊ី។
- ពួកមន្ត្រីរុស្ស៊ី តែងសំដែងជាសាធារណៈ ពីបំណងពង្រឹងជាធ្លុងមួយ សហគមន៍ជនជាតិរុស្ស៊ី ដែលមានចំនួនប្រមាណ ១/៣ នៃបណ្តាជន នៅទូទាំងប្រទេសឡេតូនី ប៉ុន្តែ តាមធាតុពិតទៅ “គោលដៅភាគច្រើននៃនយោបាយក្រៅប្រទេសរុស្ស៊ី គឺឥតមាននិស្ស័យ ពាក់ព័ន្ធ ទៅនឹងការជួយឈឺឆ្អាល ដល់ស្ថានភាពជនរួមឈាមរុស្ស៊ីទាំងនោះឡើយ”។
- ម៉្លោះហើយ បានជា ភាពមិនស្របគ្នា រវាងគោលដៅដែលមានថ្លែង និង គោលដៅមែនពិត នៃនយោបាយក្រៅប្រទេសរុស្ស៊ី វា ជាហានិភ័យធំបំផុត ពាំនាំជាគ្រោះថ្នាក់ ដល់ សន្តិសុខជាតិឡេតូនី។
ជាការកត់សម្គាល់ ឡេតូនីដែលតាំងពីឆ្នាំ២០០៤មក ក្លាយជាសមាជិក បក្សសម្ព័ន្ធ អូតង់ និង សហភាពអឺរ៉ុប តែងដំឡើងសំឡេង ដោយមិនញញើតឡើយ ទល់នឹង មហាប្រទេសរុស្ស៊ី ជិតខាង ដែលកាលមុន ខ្លួនធ្លាប់បានចំណុះ។
គួរនិយាយថា ក្នុងខែកុម្ភៈកន្លងទៅ ក្នុងប្រជាមតិនៅឡេតូនី មានបណ្តាជនម្ចាស់ឆ្នោត ដល់ទៅ ៧៤,៨% បានច្រានចោល សំណើរបស់សហគមរុស្ស៊ីនៅទីនោះ ឲ្យប្រែភាសារុស្ស៊ីទៅជា ភាសាផ្លូវការទី២ នៅឡេតូនី បន្ទាប់ពីភាសាជាតិឡេតូនីផ្ទាល់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ