អាជ្ញាធរភូមាដកហូតអត្តសញ្ញាណប័ណ្ណពីប្រជាជនរ៉ូហ៊ីងយ៉ា
ប្រជាជនភាគតិច រ៉ូហ៊ីងយ៉ាកំពុងឈានរកការបាត់អត្តសញ្ញាណផ្ទាល់ខ្លួន។ តាមការអះអាងកាលពីថ្ងៃពុធ របស់មន្រ្តីភូមា អាជ្ញាធរកំពុងដើរប្រមូល ដកហូតយកវិញ កាតពណ៌ស ដែលរដ្ឋាភិបាលភូមាធ្លាប់បានចែក សម្រាប់ការសំគាល់ខ្លួនបណ្តោះអាសន្ន ឲ្យជនជាតិរ៉ូហ៊ីងយ៉ា។ មន្រ្តីរបស់អង្គការសហប្រជាជាតិ ព្រួយបារម្ភ និងព្រមានថា ចំណាត់ការរបស់រដ្ឋាភិបាលភូមា កំពុងធ្វើឲ្យជនជាតិ រ៉ូហ៊ីងយ៉ាឈានទៅរកការបាត់បង់ឯកសារសំខាន់ ដែលអាចបញ្ជាក់អត្តសញ្ញាណរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
មន្រ្តីថ្នាក់ខេត្តភូមា បាននិយាយកាលពីថ្ងៃពុធថា អាជ្ញាធរដែលមានអមដំណើរដោយយោធា បានដើរប្រមូលយកកាតពណ៌ស ពីក្រុមប្រជាជន រ៉ូហ៊ីងយ៉ា ដែលកំពុងរស់នៅ ក្នុងជំរំជនភៀសខ្លួន ចំនួន ១១ ក្នុងរដ្ឋរ៉ាគីន។
ចលនាដើរប្រមូលយកកាតពណ៌ស ពីក្រុមប្រជាជនភាគតិច រ៉ូហ៊ីងយ៉ា ធ្វើឡើង បន្ទាប់ពីប្រធានាធិបតី ភូមា លោកថេន សេន បានប្រកាសដំណឹង គួរឲ្យរន្ធត់ កាលពីខែកុម្ភៈថា កាតពណ៌ស របស់ជនជាតិ រ៉ូហ៊ីងយ៉ានឹងអស់សុពលភាព នៅថ្ងៃទី ៣១ ខែមីនា។ ប្រមុខដឹកនាំភូមាបានប្រកាសបញ្ចប់សុពលភាពកាតពណ៌ស របស់ជនជាតិភាគតិច រ៉ូហ៊ីងយ៉ា ក្រោយពីមានការជជែកតវ៉ា យ៉ាងចម្រូងចម្រាស នៅក្នុងសភា ស្តី ពីការផ្តល់សិទ្ធិបោះឆ្នោត ទៅឲ្យក្រុមជនជាតិ រ៉ូហ៊ីងយ៉ា។ សមាជិកសភា មកពីគណបក្សប្រឆាំង គឺគណបក្សប្រជាធិបតេយ្យជាតិ ដើម្បីអភិវឌ្ឍ ដែលចេញមុខ ទាមទារ ការពារសិទ្ធិឲ្យជនជាតិរ៉ូហ៊ីងយ៉ា បានតវ៉ាសុំឲ្យសភា ផ្តល់សិទ្ធិឲ្យក្រុម រ៉ូហ៊ីងយ៉ាអាចចូលរួមបោះឆ្នោត ប្រជាមតិ លើវិសោធនកម្មច្បាប់រដ្ឋធម្មនុញ្ញភូមា។ ការទាមទាររបស់បក្សប្រឆាំង ដុតរោល ក្រុមពុទ្ធសាសនិកដែលមានចំនួនភាគច្រើន នៅភូមា ឲ្យងើបតវ៉ាប្រឆាំង។
ក្រុម រ៉ូហ៊ីងយ៉ាត្រូវបានអង្គការសហប្រជាជាតិចាត់ទុកជាជនជាតិភាគតិច ដែលរងការធ្វើទុកម្នេញ ខ្លាំងជាងគេ នៅក្នុងពិភពលោក។ នៅភូមាជនជាតិរ៉ូហ៊ីងយ៉ា ជាង ១លាន ៣សែននាក់ រស់នៅក្នុងស្ថានភាពខ្ចាត់ព្រាត់។ ទោះជាពួកគេមានវត្តមាននៅភូមា តាំងពីសម័យអាណានិគមអង់គ្លេស រដ្ឋាភិបាលភូមានៅតែចាត់ទុកក្រុម រ៉ូហ៊ីងយ៉ា ថា ជាជនអន្តោប្រវេសន៍មកពីប្រទេសបង់ក្លាដែស និងរស់នៅខុសច្បាប់ ក្នុងប្រទេសភូមា។ នៅឆ្នាំ ២០១២ ជម្លោះហិង្សា រវាងសហគមន៍ អ្នកកាន់សាសនាអ៊ីស្លាម រ៉ូហ៊ីងយ៉ា ជាមួយក្រុមពុទ្ធសាសនិក ភូមាបានធ្វើឲ្យក្រុមជនជាតិ រ៉ូហ៊ីងយ៉ាត្រូវរត់ទៅភៀសខ្លួន ក្នុងជំរំរបស់អង្គការសហប្រជាជាតិ។
គ្មានផ្ទះសម្បែង ឥលូវត្រូវអាជ្ញាធរភូមា ដកហូតយកកាតពណ៌សរបស់ខ្លួន។ កាតពណ៌ស ដែលជាអត្តសញ្ញាណបណ្តោះអាសន្ន ផ្តល់ដោយរដ្ឋាភិបាល ភូមា ជាក្តីសង្ឃឹមតែមួយ សម្រាប់ក្រុមរ៉ូហ៊ីងយ៉ា ដើម្បីដាក់ពាក្យសុំសញ្ជាតិ។ នៅពេលនេះ គេនៅមិនទាន់ច្បាស់ថា តើប្រជាជន រ៉ូហ៊ីងយ៉ាដែលត្រូវគេដកហូតកាតពណ៌ស នឹងត្រូវបាត់បង់សិទ្ធិ សុំសញ្ជាតិភូមាដែរឬទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ