សភាភូមាចោទលោកបាន គីមូនថា បានលូកដៃក្នុងកិច្ចការផ្ទៃក្នុងរបស់ភូមា
សភាភូមា កាលពីថ្ងៃសុក្របានបោះឆ្នោតប្រឆាំងនឹងការប្រើពាក្យពេជន៍របស់លោក បាន គីមូន អគ្គលេខាធិការអង្គការសហប្រជាជាតិ។ នៅក្នុងទស្សនកិច្ចផ្លូវការក្នុងប្រទេសភូមា កាលពីថ្ងៃព្រហស្បតិ៍ លោកបាន គីមូនបានលើកឡើងពីវិបត្តិសិទ្ធិមនុស្សដ៏ធ្ងន់ធ្ងរ ជាពិសេសការបិទសិទ្ធិដល់ជនជាតិភាគតិច រូហ៊ីងយ៉ា។ គឺពាក្យរូហ៊ីងយ៉ានេះហើយ ដែលធ្វើឲ្យសភាភូមាក្តៅស្លឹកត្រចៀក និងបានចោទលោកអគ្គលេខាធិការអង្គការសហប្រជាជាតិថា បានលូកដៃ ចូលកិច្ចការផ្ទៃក្នុងភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ការផ្តល់អត្តសញ្ញាណ ឬនិយាយដល់ជនជាតិរូហ៊ីងយ៉ា ត្រូវគេចាត់ទុកដូចជាការនាំភ្លើងទៅដុតបញ្ឆេះ នៅក្នុងប្រទេសភូមា។ ទាំងរដ្ឋាភិបាល និងប្រជាជនភូមាភាគច្រើនមិនបានចាត់ទុកក្រុម រូហ៊ីងយ៉ា ជាជនជាតិភាគតិចរបស់ភូមាទេ ប៉ុន្តែ ជាក្រុមជនអន្តោប្រវេសន៍ ដែលបានចូលទៅរស់នៅខុសច្បាប់ក្នុងទឹកដីភូមា។ ប៉ុន្តែ កាលពីថ្ងៃព្រហស្បតិ៍ នៅក្នុងអំឡុងទស្សនកិច្ចក្នុងប្រទេសភូមា លោកអគ្គលេខាធិការអង្គការសហប្រជាជាតិ បាន គីមូនបានលើកឡើងពីបញ្ហារំលោភសិទ្ធិមនុស្សទៅលើក្រុមជនជាតិ រូហ៊ីងយ៉ា ដែលរហូតមកដល់ពេលនេះត្រូវបានកាត់ផ្តាច់ទាំងស្រុងចេញពីសង្គមភូមា។
តាមសមាជិកសភាភូមាម្នាក់ ដែលជាម្ចាស់ពាក្យបណ្តឹងទៅសភា ការលើកនិយាយពីឈ្មោះ រូហ៊ីងយ៉ា របស់លោកបាន គីមូន អាចនឹងញុះញង់បង្កឲ្យមានអំពើហិង្សាសាជាថ្មី នៅរដ្ឋរ៉ាគីន។ សមាជិកសភាភូមារូបនេះបានចាត់ទុកការហៅឈ្មោះជនជាតិរូហ៊ីងយ៉ា ដែលប្រជាជនភូមាមិនទទួលស្គាល់ ថា ការជេរប្រមាថដល់ប្រជាជនភូមា។ ហើយការលើកឡើងពីជនជាតិមួយដែលគ្មានវត្តមានទាល់តែសោះ នៅក្នុងទឹកដីភូមា គឺត្រូវចាត់ទុកដូចជាការរំលោភច្បាប់ភូមា។
នៅភូមា អាជ្ញាធរបានផ្តល់ឈ្មោះដល់ក្រុមជនអន្តោប្រវេសន៍ថា បង់ហ្កាលី ដែលមានប្រភពដើម មកពីប្រទេសបង់ក្លាដែស ប៉ុន្តែ មិនមែនជាជនជាតិភាគតិចភូមា ឈ្មោះ រូហ៊ីងយ៉ា ដូចដែលសហគមន៍អន្តរជាតិបានចាត់ទុកនោះទេ។ រដ្ឋាភិបាលភូមានៅបានបដិសេធមិនផ្តល់សញ្ជាតិដល់ជនជាតិ រូហ៊ីងយ៉ា នោះបើទោះបីមានភស្តុតាងជាច្រើនបង្ហាញថា ជនជាតិនេះ ធ្លាប់មានបុព្វបុរសរបស់ខ្លួនធ្លាប់ចូលរួមនៅក្នុងរដ្ឋាភិបាលរបស់របបសឹកភូមាក៏ដោយ។
កាលពីថ្ងៃសុក្រ ដោយគ្មានឧបសគ្គ សភាភូមាបានបោះឆ្នោតចេញសេចក្តីថ្លែងការណ៍មួយរិះគន់ជំហររបស់លោកអគ្គលេខាធិការបាន គីមូន ដែលបានប្រើពាក្យរូហ៊ីងយ៉ា សម្រាប់សំគាល់ជនជាតិភាគតិច កាន់សាសនាអ៊ីស្លាមនៅភូមា។ លោកបាន គីមូន ជាមនុស្សតែម្នាក់គត់ដែលបាននិយាយចំៗពីក្រុមជនជាតិ រូហ៊ីងយ៉ា នៅក្នុងពេលដែលប្រធានាធិបតីអាមេរិក លោកបារ៉ាក់ អូបាម៉ាឯណោះវិញ ដែលបានចូលរួមនៅក្នុងជំនួបកំពូលក្នុងទីក្រុងណៃពីដរ បានត្រឹមតែទាមទារឲ្យរដ្ឋាភិបាលគោរពជនជាតិភាគតិច ដោយមិនបានបញ្ជាក់ច្បាស់ពីឈ្មោះជនជាតិ រូហ៊ីងយ៉ា។
សូមបញ្ជាក់ថា ចាប់តាំងពីជម្លោះហិង្សាជាមួយក្រុមអ្នកកាន់សាសនាព្រះពុទ្ធ ប្រជាជន រូហ៊ីងយ៉ា ដែលភាគច្រើនជាអ្នកកាន់សាសនាអ៊ីស្លាម ប្រមាណ១សែន ៤ម៉ឺននាក់ ត្រូវជម្លៀសចេញពីផ្ទះសម្បែង និងត្រូវអាជ្ញាធរចាប់ប្រមូលផ្តុំឲ្យរស់នៅក្នុងជំរំភៀសខ្លួន រហូតធ្វើឲ្យពួកគេ មិនបានទទួលសេវាសាធារណៈ សេវាសុខភាព និងការងារពីរដ្ឋាភិបាល។
កាលពីពេលថ្មីៗនេះ លោកប្រធានាធិបតីភូមា ថេន សេនធ្លាប់បាននិយាយប្រាប់អ្នកកាសែតថា ជនជាតិរ៉ូហ៊ីងយ៉ានឹងត្រូវបន្តរស់នៅក្នុងជំរំភៀសខ្លួនដ៏យូរអង្វែងតទៅទៀត គឺរហូតដល់ពេលមានប្រទេសដទៃណាមួយស្ម័គ្រចិត្តទទួលយកពួកគេទៅធ្វើជាជនជាតិរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ