អ.ស.ប.ដាក់គំនាបលើភូមាជុំវិញបញ្ហាសិទ្ធិជនជាតិរ៉ូហ៊ីងយ៉ា
អង្គការសហប្រជាជាតិបានអនុវត្តតាមសេចក្តីសម្រេចមួយ កាលពីថ្ងៃសុក្រម្សិលមិញ ជំរុញឲ្យប្រទេសភូមាផ្តល់សញ្ជាតិដល់ជនជាតិភាគតិចរ៉ូហ៊ីងយ៉ារបស់ខ្លួន ដោយដាក់សម្ពាធទៅលើក្រុងរ៉ង់ហ្គូន ឲ្យបោះបង់ចោលគម្រោងអត្តសញ្ញាណកម្មដ៏ចម្រូងចម្រាសរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៣៨
វិធានការនេះ ត្រូវបានដាក់ចេញដោយមានការឯកភាពពីគណៈកម្មការសិទ្ធិមនុស្ស មកពីអង្គការសហប្រតិបត្តិការអ៊ីស្លាម (OIC) ក្នុងបណ្តាប្រទេសចំនួន៥៧។ សេចក្តីសម្រចនោះបានបង្ហាញពីការព្រួយបារម្ភយ៉ាងខ្លាំង ជុំវិញស្ថានភាពប្រជាជនរ៉ូហ៊ីងយ៉ា នៅក្នុងរដ្ឋរ៉ាក់ឃីន ជាកន្លែងដែលមនុស្ស ១៤ម៉ឺននាក់ រស់នៅក្នុងជំរំដ៏កខ្វក់ បន្ទាប់ពីអំពើហិង្សាបានកើតមានឡើង កាលពីឆ្នាំ២០១២ រវាងអ្នកកាន់សាសនាព្រះពុទ្ធ និងសាសនាឥស្លាម។
នៅក្រោយផែនការដ៏ចម្រូងចម្រាសរបស់រដ្ឋាភិបាល ជនជាតិរ៉ូហ៊ីងយ៉ា ត្រូវបានបង្ខំឲ្យទទួលសញ្ជាតិដោយខ្លួនឯងជាជនជាតិ បេងហ្គាលី ដែលជាជនជាតិភាគតិចរស់នៅក្នុងភាគខាងកើតឧបទ្វីបឥណ្ឌា ហើយប្រសិនបើអ្នកណាបដិសេធមិនទទួលនោះ នឹងត្រូវបង្ខំឲ្យរស់នៅក្នុងជំរំដ៏កខ្វក់នោះ។
ប្រជាជនជាច្រើននៅក្នុងប្រទេសភូមា ហើយនិងអ្នកកាន់សាសនាព្រះពុទ្ធនៅក្នុងស្រុក បានចាត់ទុកជនជាតិភាគតិចរ៉ូហ៊ីងយ៉ាជាជនអន្តោរប្រវេសន៍ខុសច្បាប់ ដែលមកពីប្រទេសជិតខាងភូមា គឺបង់ក្លាដែស ក៏ប៉ុន្តែសហគមន៍ជនជាតិភាគតិចមួយនេះ បានអះអាងថា បុព្វបុរសរបស់ខ្លួនបានចាក់ឬសនៅក្នុងប្រទេសមួយនេះ។
សេចក្តីសម្រេចរបស់អង្គការសហប្រជាជាតិ បានជំរុញឲ្យរដ្ឋាភិបាលភូមា ជួយការពារសិទ្ធិដល់អ្នកស្រុក ក្នុងរដ្ឋរ៉ាក់ឃីន ហើយអនុញ្ញាតឲ្យពួកគេមានសិទ្ធិក្លាយទៅជាពលរដ្ឋស្របច្បាប់ សម្រាប់ជនជាតិភាគតិចរ៉ូហ៊ីងយ៉ា អនុញ្ញាតឲ្យពួកគេមានអត្តសញ្ញាណដោយខ្លួនឯង ហើយនឹងធានាថាពួកគេ មានសិទ្ធិប្រើប្រាស់សេវាសាធារណៈដូចជាពលរដ្ឋភូមាទូទៅដែរ។
វិធានការមួយនេះ បានអំពាវនាវឲ្យគណៈកម្មការទទួលបន្ទុកសិទ្ធិមនុស្សជាន់ខ្ពស់របស់អង្គការសហប្រជាជាតិត្រូវតែអនុវត្តភ្លាមៗ នៅក្នុងប្រទេសភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ