ហុងកុង៖ចិនប៉េកាំងបានហាមតំណាងរាស្រ្តហុងកុងឯករាជ្យនិយមពីរនាក់មិនឲ្យចូលអង្គុយក្នុងសភាហុងកុង
នៅហុងកុង ចិនប៉េកាំងបានលូកដៃកាន់តែជ្រៅនៅក្នុងកិច្ចការផ្ទៃក្នុងហុងកុងដោយនៅថ្ងៃចន្ទ ទី៧ វិច្ឆិកានេះ សភាចិនប៉េកាំងបានសម្រេចឲ្យមិនឲ្យអ្នកតំណាងរាស្រ្តហុងកុងនិយមឯករាជ្យពីរនាក់ធ្វើសច្ចាប្រណិធានលើកទី២ ចូលអង្គុយក្នុងសភាឡើយ។ គួរជម្រាបជូនថា អ្នកតំណាងរាស្រ្តហុងកុងនិយមឯករាជ្យទាំងពីរនាក់ធ្លាប់បានធ្វើសច្ចាប្រណិធានម្តងហើយ តែបានធ្វើមិនត្រឹមត្រូវដោយពួកគេឆ្លៀតយកវេទិកានាឱកាសនោះដើម្បីប្រឆាំងនឹងការលូកដៃរបស់ចិនប៉េកាំង។
ចុះផ្សាយនៅថ្ងៃ៖
ស្តាប់ - ០១:៥១
អ្នកតំណាងរាស្រ្តហុងកុងឯករាជ្យនិយមទាំងពីរនាក់ គឺកញ្ញា Yau Wai-ching និងលោក Baggio Leung ហើយអ្នកទាំងពីរបានជាប់ឆ្នោតជាតំណាងរាស្រ្តនាការបោះឆ្នោតកាលពីខែកញ្ញាកន្លងទៅ។ តាមពិតទៅ កញ្ញា Ching និងលោក Leung ត្រូវចូលក្នុងសភាតាំងពីប៉ុន្មានសប្តាហ៍មុនម្ល៉េះ តែត្រូវបានអាក់ខានទៅវិញដោយសារតែសភាទាត់ចោលការធ្វើសច្ចាប្រណិធានរបស់អ្នកទាំងពីរ។ សភាបានយល់ឃើញថា អ្នកតំណាងរាស្រ្តហុងកុងឯករាជ្យនិយមវ័យក្មេងទាំងពីរនាក់បានឆ្លៀតប្រើវេទិកាធ្វើសច្ចាប្រណិធានដើម្បីបរិហារលើការលូកដៃរបស់ចិនប៉េកាំងដោយនិយាយថា ហុងកុងមិនមែនចិនទេ។
ជាមួយនឹងទង្វើចេតនារបស់អ្នកតំណាងរាស្រ្តហុងកុងឯករាជ្យនិយមទាំងពីរនាក់បានបញ្ឆេះកំហឹងចិនប៉េកាំងដែលនៅទីបំផុត បានលូកដៃអន្តរាគមន៍ដោយហាមមិនឲ្យកញ្ញា Ching និងលោក Leung ចូលអង្គុយក្នុងសភាហុងកុងទេ។ ក្រោមភ្នែក ច្រមុះរបស់ចិនប៉េកាំង ទង្វើរបស់កញ្ញា Ching និងលោក Leung បានរំលោភបំពានលើច្បាប់រដ្ឋធម្មនុញ្ញរបស់ហុងកុងដែលត្រូវបានអង់គ្លេសប្រគល់ឲ្យក្នុងឆ្នាំ ១៩៩៧។ ចំណែកប្រមុខដឹកនាំហុងកុងមានទំនោររកចិនប៉េកាំងលោក Leung Chun-ying បានបញ្ជាក់ថា លោកនឹងអនុវត្តន៍តាមអនុសាសន៍របស់ចិនប៉េកាំង និងថា កញ្ញា Ching និងលោក Leung មិនអាចធ្វើសច្ចាប្រណិធានជាលើកទី២ បានទេ។
អ្វីជាការកត់សម្គាល់ វិបត្តិដែលកើតចេញពីទង្វើរបស់អ្នកតំណាងរាស្រ្តហុងកុងឯករាជ្យនិយមវ័យក្មេងទាំងពីរបាន និងកំពុងរុញហុងកុងឲ្យធ្លាក់ក្នុងវិបត្តិនយោបាយជាថ្មីដូចក្នុងឆ្នាំ ២០១៤។ នៅយប់ថ្ងៃអាទិត្យ ទី៦ វិច្ឆិកា មានពលរដ្ឋហុងកុងជាច្រើនពាន់នាក់បានចុះផ្លូវធ្វើបាតុកម្មប្រឆាំងនឹងការលូកដៃរបស់ចិនប៉េកាំងនៅក្នុងកិច្ចការផ្ទៃក្នុងហុងកុង។ ក្បួនបាតុកម្មដែលត្រូវបានកម្លាំងប៉ូលិសវាយបំបែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ