បេក្ខជនខាងអ្នកទាមទារឯករាជ្យនៅហុងកុងបានជាប់ឆ្នោតជាសមាជិកសភាហុងកុងជាលើកដំបូង
នៅហុងកុងបន្ទាប់ពីការបោះឆ្នោតសភាកាលពីថ្ងៃអាទិត្យម្សិលមិញមក ចលនាយុវជនដែលជាអ្នកស្រែកទាមទារឯករាជ្យផ្តាច់ខ្លួនចេញពីចិនដីគោគ បានជាប់ឆ្នោតជាសមាជិកសភាហុងកុងជាលើកដំបូង។ ហុងកុង ដែលជាអតីតដែនដីអាណានិគមអង់គ្លេស ធ្លាប់បានស្គាល់វិបត្តិនយោបាយដ៏ធ្ងន់ធ្ងរកាលពីឆ្នាំ២០១៤ដោយសារមហាចលនាបាតុកម្មបិទខ្ទប់សង្កាត់នានាដឹកនាំដោយចលនានិន្នាការលិទ្ធិប្រជាធិបតេយ្យហុងកុង។
ចុះផ្សាយនៅថ្ងៃ៖
ស្តាប់ - ០២:៣៣
នៅក្នុងការបោះឆ្នោតសភាហុងកុងកាលពីថ្ងៃអាទិត្យម្សិលមិញ អ្នកចូលរួមបោះឆ្នោត មានចំនួនជាង២លាន២សែននាក់ ឬប្រមាណជា៦០% ចំនួនអ្នកចុះឈ្មោះបោះឆ្នោត ដែលជាចំនួនដ៏ច្រើនបំផុតមួយពុំធ្លាប់មានឡើយ។ ប្រជាជនហុងកុង បានធ្វើការបោះឆ្នោតរហូតដល់យប់ជ្រៅក្នុងថ្ងៃអាទិត្យឆ្លងមកដល់ថ្ងៃចន្ទ។ ការបោះឆ្នោតដែលមានការចូលរួមជាលើកដំបូងបង្អស់ដែរពីសំណាក់ក្រុមអ្នកទាមទារឯករាជ្យផ្តាច់ខ្លួនចេញពីប៉េកាំង។
សូមបញ្ជាក់ថា ការបោះឆ្នោតជ្រើសរើសសមាជិកក្រុមប្រឹក្សានីតិបញ្ញត្តិហុងកុងនេះ ត្រូវបានប្រព្រឹត្តទៅនៅខណៈពេលដែលប្រជាជនហុងកុងចំនួនដ៏ច្រើនបំផុត មានការព្រួយចិត្តយ៉ាងខ្លាំង ខ្លាចទីក្រុងប៉េកាំង ចង់ពង្រឹងការត្រួតត្រាអំណាចរបស់ខ្លួននៅលើទឹកដីរបស់ពួកគេ ទាំងនៅលើវិស័យនយោបាយ វប្បធម៌ ឬ ក៏ នៅលើវ័យអប់រំ។
បន្ទាប់ពីការរើរាប់សន្លឹកឆ្នោត លទ្ធផល បានឲ្យដឹងនៅថ្ងៃចន្ទនេះថា បេក្ខជន៤នាក់មកពីក្រុមអ្នកទាមទារផ្តាច់ខ្លួន ពីចិនដីគោគ បានជាប់ឆ្នោតជាសមាជិកក្រុមប្រឹក្សានីតិបញ្ញត្តិហុងកុង។ ក៏ប៉ុន្តែ គេនៅនឹកសង្ឃឹមដែរថា នឹងមានបេក្ខជនម្នាក់ទៀតខាងក្រុមអ្នកទាមទារឯករាជ្យ នឹងទទួលបានអសនៈមួយទៀត ។ លទ្ធផលឆ្នោតនេះ គឺ ជានិមិត្តរូបមួយដ៏ខ្លាំងក្លាបំផុត នៅដីហុងកុង បើទោះបីជា សភាហុងកុងនឹងនៅតែត្រូវស្ថិតនៅក្រោមការត្រួត្រារបស់អ្នកនយោបាយមួយចំនួនធំ ដែលស្និទ្ធនឹងទីក្រុងប៉េកាំងក៏ដោយក្តី។
ទន្ទឹមនេះបេក្ខជនបោះឆ្នោត Nathan Law នៅនាពេលរើរាប់សន្លឹកឆ្នោត បានថ្លែងដែរថា”ប្រជាជនហុងកុងទាំងមូលចង់ បានការផ្លាស់ប្តូរទាំងស្រុងនៅហុងកុង”ពីព្រោះ យុវជនហុងកុង ចង់បានអ្នកដឹកនាំនយោបាយដែលមានការគិតគូជាបន្ទាន់ អំពីអនាគតជោគវាសនារបស់ពួកគេ។
Nathan Law ដែលមាន អាយុ២៣ឆ្នាំ កាលពីសរទរដូវឆ្នាំ២០១៤ ជាមេដឹកនាំដ៏សំខាន់មួយរូបនៃមហាចលនាទាមទារប្រជាធិតេយ្យនៅហុងកុង។ កាលណោះ ចលនាប្រជាធិបេយ្យ បានបិទខ្ទប់សង្កាត់ទាំងអស់នៅហុងកុងដើម្បីទាមទារឲ្យមានការរៀបចំបោះឆ្នោតជ្រើសរើសប្រមុខដឹកនាំហុងកុងឆ្នាំ២០១៧ ដោយសេរី យុត្តិធម៌និងជាសកលដោយគ្មានការជ្រៀតជ្រែកពីប៉េកាំង។ ប៉ុន្តែប៉េកាំង មិនព្រឺនឹងមហាបាតុកម្មរបស់ចលនាប្រជាធិបតេយ្យហុងកុងនិងក៏មិនផ្តល់សម្បទានអ្វីបន្តិចបន្តួចដែរនៅលើវិស័យកំណែទម្រង់នយោបាយ។
ដោយឡែកលោក Joseph Cheng ដែលជាអ្នកវិភាគនយោបាយនៅហុងកុង បានវិភាគថា “ការបោះឆ្នោតលើកនេះ បានកំណត់ផងដែរពីការផ្លាស់ប្តូរមួយភាគធំ ក្នុងជំនាន់អ្នកដឹកនាំនយោបាយនៅហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ