ប៉ូឡូញ រឹបអូស«វិទ្យាល័យរុស្ស៊ី»នៅក្រុងវ៉ាសូវី ដោយសង្ស័យថាជា«ជំរំចារកម្ម»
ថ្ងៃសៅរ៍ នៅរដ្ឋធានីវ៉ាសូវី អាជ្ញាធរប៉ូឡូញ បានរឹបអូសអគារសាលាបង្រៀនមធ្យមសិក្សារុស្ស៊ី ដោយសំអាងហេតុផលផ្លូវច្បាប់ថា ជាទ្រព្យសម្បត្តិរដ្ឋ។ មន្ត្រីទូតរុស្ស៊ី ច្រឡោតខឹង និងថា ទង្វើរបស់ប៉ូឡូញបំពានច្បាប់ការទូត ហើយរុស្ស៊ីសន្យាឆ្លើយតបវិញឲ្យសក្តិសម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
បណ្តាអគារ ដែលត្រូវ ក្រុមប៉ូលិសប៉ូឡូញ ឡោមព័ទ្ធ គឺជា វិទ្យាល័យរុស្ស៊ី ឋិតនៅប៉ែកខាងត្បូងក្រុងវ៉ាសូវី។ អគារខ្លះ មានកំពស់បួនដប់ជាន់ផង។ កាលពីមុន ទីកន្លែងនេះ ជា អគាររបស់មន្ត្រីទូតរុស្ស៊ីប្រើប្រាស់ មុននឹងត្រូវធ្វើជាស្ថានទូតរុស្ស៊ីផង នាកាលពីអតីតកាល។
ថ្ងៃសៅរ៍ ទី២៩មេសា ប៉ូលិសប៉ូឡូញនិងក្រុមរក្សាសណ្តាប់ធ្នាប់ បានទៅឈរនៅត្រៀមត្រាជុំវិញមុខរបងអគារ។ នៅច្រកទ្វារចូល ត្រូវបិទ តែគេអាចមើលតាមចម្រឹងដែកឃើញថាខាងក្នុង មានឡានពាកស្លាកលេខការទូត។ បើតាមសារព័ត៌មានក្នុងស្រុកប៉ូឡូញ មន្ត្រីទូតរុស្ស៊ីត្រូវចេញពីកន្លែងនេះ មុនម៉ោង ៦ ល្ងាច ម៉ោងនៅប៉ូឡូញ។
ក្នុងថ្ងៃដដែល ពួកអ្នកកាសែតអន្តរជាតិ សុំការពន្យល់ពីអាជ្ញាធរប៉ូឡូញដែរ តែគ្មានប្រតិកម្មតប ឬគ្មានសេចក្តីអត្ថាធិប្បាយអ្វីច្រើនទេ។ ប៉ូលិសនៅកន្លែងកើតហេតុ បានត្រឹមតែស្រដីថា«ធ្វើតាមនីតិវិធីច្បាប់» ហើយចំណែក អ្នកនាំពាក្យក្រសួងការបរទេសប៉ូឡូញ លោក Lukasz Jasina គ្រាន់តែនិយាយថា «អគារនេះ ជាកម្មសិទ្ធិរបស់សាលាក្រុងវ៉ាសូវី »។
ផ្ទុយទៅវិញ លោក Sergueï Andreïev ឯកអគ្គរដ្ឋទូតរុស្ស៊ីប្រចាំប៉ូឡូញ ក្តៅស្លឹកត្រចៀក ប្រតិកម្មតាមបណ្តាញព័ត៌មានរដ្ឋរុស្ស៊ី ថា ប៉ូឡូញ ធ្វើខុសច្បាប់ការទូត រំលោភបំពានលើ អនុសញ្ញាទីក្រុងវីយែន ស្តីពីទំនាក់ទំនងការទូត ឆ្នាំ១៩៦១ ហើយនិងថា អាជ្ញាធររុស្ស៊ីនឹងវាយបកវិញឲ្យសមនឹងទង្វើរបស់ប៉ូឡូញ។
ទោះជាយ៉ាងនេះក្តី ជាដំណោះស្រាយបណ្តោះអាសន្ន ស្ថានទូតរុស្ស៊ីថានឹងស្វះស្វែងរកអគារថ្មី ដើម្បីឲ្យកូនសិស្សបានរៀនសូត្រ និងត្រៀមប្រលងបញ្ចប់ឆ្នាំសិក្សាឲ្យចប់ស្រួលបួល។
ពាក់ព័ន្ធនឹងអគារដ៏ចម្រូងចម្រាសនេះ គឺរុស្ស៊ីនិងប៉ូឡូញ ប៉ះសម្តីគ្នាម្តងហើយកាលពីឆ្នាំមុន។ ខែមីនា ឆ្នាំ២០២២ នៅពេលដែលសង្គ្រាមឈ្លានពានរុស្ស៊ីលើអ៊ុយក្រែន ផ្ទុះឡើងពីដំបូងៗ គឺ រដ្ឋាភិបាលប៉ូឡូញ បានចាត់ទុកទីកន្លែងនេះ ថាជា«ជំរំចារកម្មរុស្ស៊ី» ហើយអាជ្ញាធរប៉ូឡូញ ចង់យកអគារនេះ ឲ្យ អ៊ុយក្រែន ប្រើប្រាស់ជាប្រយោជន៍។ តុលាការប៉ូឡូញ ក៏បានចេញដីកាសេចក្តីសម្រេចឲ្យ ស្ថានទូតរុស្ស៊ី ប្រគល់អគារទាំងនោះ ឲ្យរដ្ឋាភិបាលប៉ូឡូញវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ