ទស្សនកិច្ចលើកទី១របស់លោកហ្សេឡេនស្គី នៅប៉ូឡូញ ដើម្បីអរគុណចំពោះអន្តរាគមន៍ជួយអ៊ុយក្រែន
លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានទៅធ្វើទស្សនកិច្ចនៅក្រុងវ៉ាសូវី ប្រទេសប៉ូឡូញ ជាលើកទី១ កាលពីព្រឹកថ្ងៃពុធម្សិលមិញ។ ក្រៅពីដើម្បីថ្លែងអំណរអរគុណ ចំពោះប៉ូឡូញ ដែលបានជួយខ្នះខ្នែងគាំទ្រអ៊ុយក្រែន ដែលរងការធ្វើសង្គ្រាមឈ្លានពានពីសំណាក់រុស្ស៊ី លោកហ្សេឡេនស្គី មានបំណងនិយាយជាមួយភាគីប៉ូឡូញដែរ អំពីទំនាក់ទំនងសេដ្ឋកិច្ចនៅថ្ងៃខាងមុខ ដើម្បីកសាងអ៊ុយក្រែនឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
ក្រោមការយាមកាមសន្តិសុខដ៏តឹងតែងបំផុត លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី និងភរិយា បានទៅដល់រដ្ឋធានីវ៉ាសូវី នៅថ្ងៃពុធទី៥មេសា។ ជាដំណើរទស្សនកិច្ចដែលគេបានលាក់ការណ៍សម្ងាត់ រហូតដល់នាទីចុងក្រោយ។ វិមានប្រធានាធិបតីប៉ូឡូញ បានក្រាលព្រំក្រហម ទទួលស្វាគមន៍លោកហ្សេឡេនស្គី អមដោយសំឡេងកងរំពងនៃបទភ្លេង ប្រគុំដោយពលទាហាន។
យោងតាមលោក Sergueï Nykyforov អ្នកនាំពាក្យប្រធានាធិបតីអ៊ុយក្រែន គឺលោកហ្សេឡេនស្គី បានចូលទៅ លោកប្រធានាធិបតីប៉ូឡូញ Andrzej Duda និងលោកនាយករដ្ឋមន្ត្រីប៉ូឡូញ Mateusz Morawiecki ព្រមទាំងមានការចុះហត្ថលេខាលើកិច្ចព្រមព្រៀងទ្វេរភាគីមួយចំនួន។ នៅថ្ងៃព្រហស្បតិ៍ លោកហ្សេឡេនស្គី នឹងចូលទៅជួបជាមួយប្រធានសភាទាំង២របស់ប៉ូឡូញ ជួបជាមួយតំណាងវិស័យជំនួញ ប៉ូឡូញនិងអ៊ុយក្រែន ព្រមទាំងជួបក្រុមអ្នកស្ម័គ្រចិត្តធ្វើការមនុស្សធម៌ ជួយប្រជាជនអ៊ុយក្រែននៅតាមព្រំដែនផងដែរ។
អ្នកនាំពាក្យវិមានប្រធានាធិបតីអ៊ុយក្រែនដដែល អះអាងថា ភាគីទាំងសងខាង និងផ្តោតការនិយាយគ្នាច្រើន ទៅលើវិស័យសេដ្ឋកិច្ចពាណិជ្ជកម្ម ព្រមទាំងនិយាយអំពីកិច្ចការអឺរ៉ុប និងការដាក់ទណ្ឌកម្មទៅលើរុស្ស៊ី។ ដោយឡែក ផ្អែកតាមទីប្រឹក្សាម្នាក់របស់ប្រធានាធិបតីប៉ូឡូញ គឺភាគីប៉ូឡូញ ចង់ជជែកអំពីការរៀបចំផែនការទៅថ្ងៃអនាគត ដើម្បីអនុញ្ញាតឲ្យអ្នកជំនួញប៉ូឡូញ អាចចូលរួមជួយក្នុងការសាងសង់អ៊ុយក្រែនឡើងវិញ នៅពេលចប់សង្គ្រាម។
គួរបញ្ជាក់ថា តាំងតែពីពេលផ្ទុះសង្គ្រាមមក ប៉ូឡូញបានដើរតួនាទីយ៉ាងសំខាន់ ក្នុងការជួយអ៊ុយក្រែន។ ប៉ូឡូញគឺជាដែនដីឆ្លងកាត់ របស់ថ្នាក់ដឹកនាំសម្ព័ន្ធមិត្តលោកខាងលិច ដើម្បីឆ្លងទៅអ៊ុយក្រែន ប៉ូឡូញជាដែនដីឆ្លងកាត់នៃការដឹកជញ្ជូនអាវុធទៅជួយអ៊ុយក្រែន និងជាទីកន្លែងហ្វឹកហាត់ទាហានអ៊ុយក្រែន ហើយប៉ូឡូញបានទទួលជនភៀសខ្លួនអ៊ុយក្រែន ជាច្រើនម៉ឺននាក់។ ប៉ូឡូញដឹងខ្លួនយ៉ាងច្បាស់ ថាវីរៈភាពតស៊ូរបស់អ៊ុយក្រែន ក្នុងការយុទ្ធតទល់ជាមួយរុស្ស៊ី គឺវាផ្តល់ការការពារមកឲ្យខ្លួនដែរ។
យ៉ាងណាមិញ រដ្ឋាភិបាលប៉ូឡូញ បានប្រឹងប្រែងជំរុញឲ្យក្រុមប្រទេសសម្ព័ន្ធមិត្តលោកខាងលិច ព្រមប្រគល់គ្រឿងសព្វាវុធធុនធ្ងន់ទៅឲ្យអ៊ុយក្រែន។ ប៉ូឡូញបានប្រគល់រថពាសដែក Leopard 2 ចំនួន១៤គ្រឿង និងបានប្រគល់យន្តហោះចម្បាំងប្រភេទ MiG-29 ជាច្រើនគ្រឿងរួចហើយទៅឲ្យអ៊ុយក្រែន។ នៅក្នុងឱកាសទស្សនកិច្ចរបស់លោកហ្សេឡេនស្គី នៅរដ្ឋធានីវ៉ាសូវី លោកប្រធានាធិបតីប៉ូឡូញបានប្រកាសបញ្ជាក់ថា ប៉ូឡូញនឹងបន្តប្រគល់យន្តហោះចម្បាំង MiG-29 ដែលខ្លួនមានទាំងអស់ ទៅឲ្យអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ