អ្នកជំនាញថាការដែលប៉ូឡូញនិងហុងគ្រី ហាមឃាត់ការនាំចូលទិន្នផលកសិកម្មអ៊ុយក្រែន មិនប៉ះពាល់ធំដុំទេ
ការនាំចេញទិន្នផលគ្រាប់ធញ្ញជាតិរបស់អ៊ុយក្រែនយ៉ាងសន្ធឹកសន្ធាប់ ឆ្លងកាត់ប្រទេសក្បែរខាង បាននឹងកំពុងបង្កបញ្ហា នៅលើអត្រាតម្លៃទីផ្សារ ព្រមទាំងការចាល់ស្តុកជាដើម។ ប្រទេសអឺរ៉ុបមួយចំនួន ដូចជាប៉ូឡូញ និងហុងគ្រី ទើបតែបានប្រកាសថា គេនឹងហាមឃាត់ការនាំចូលគ្រាប់ធញ្ញជាតិ និងទិន្នផលកសិកម្មផ្សេងទៀត មកពីអ៊ុយក្រែន។ ប៉ូឡូញ និងហុងគ្រី គិតថា ទិន្នផលកសិកម្មអ៊ុយក្រែន ដែលឆ្លងកាត់តាមប្រទេសគេ កំពុងធ្វើបាបកសិករ របស់គេ។
ចុះផ្សាយនៅថ្ងៃ៖
គួរបញ្ជាក់ថា តាមធម្មតា អ៊ុយក្រែននាំចេញទិន្នផលកសិកម្ម តាមច្រកកំពង់ផែសមុទ្រខ្មៅ។ ក៏ប៉ុន្តែដោយសារតែបញ្ហាសង្គ្រាមជាង១ឆ្នាំមកនេះ ទិន្នផលទាំងនេះត្រូវកកកុញមិនអាចនាំចេញបាន។ ក្រោយការប្រកាសបិទច្រកពីប៉ូឡូញ រដ្ឋាភិបាលអ៊ុយក្រែនកំពុងព្យាយាមចរចា ដើម្បីឲ្យប៉ូឡូញបើកច្រកឡើងវិញ។ យ៉ាងណាក៏ដោយ យោងតាមការវិភាគរបស់លោក ហ្វ្រង់ស្វ័រ លូហ្កេណូ(François Luguenot) អ្នកជំនាញផ្នែកទីផ្សារទិន្នផលកសិកម្ម គឺការបិទទ្វារពីប៉ូឡូញ និងហុងគ្រី ប្រហែលជាមិនប៉ះពាល់ខ្លាំងណាស់ណា ដល់ការនាំចេញទិន្នផលគ្រាប់ធញ្ញជាតិរបស់អ៊ុយក្រែននោះទេ។
សម្រង់ប្រសាសន៍លោក François Luguenot ដែលបានផ្តល់បទសម្ភាសន៍ឲ្យវិទ្យុបារាំងអន្តរជាតិ RFI៖
"ខ្ញុំថាក្នុងកំឡុងពេលបច្ចុប្បន្ន នាពាក់កណ្តាលខែមេសានេះ ផលប៉ះពាល់បើតាមខ្ញុំមើលទៅគឺបានថយចុះហើយ។ ការដឹកជញ្ជូននាំចេញក្នុងទំហំធំ បានធ្វើរួចរាល់ហើយកន្លងមក ហើយពេលនេះជាដំណាក់កាលចុងក្រោយនៃប្រតិបត្តិការនាំចេញហើយ។ វានៅតែមានសល់ទិន្នផលដែលត្រូវនាំចេញអញ្ចឹង គ្រាន់តែថាវាសល់មិនច្រើនប៉ុន្មានទេ។ ត្រូវដឹងដែរ ថាទិន្នផលកសិកម្មរបស់អ៊ុយក្រែន នៅឆ្នាំ២០២២ បានតិចជាងឆ្នាំ២០២១។
ដរាបណា ច្រកផ្លូវនាំចេញនៅតែត្រូវបានការពារ គឺគេនៅតែអាចនាំចេញបាន បើទោះបីកន្លងមក ភាគីរុស្ស៊ីគំរាមញឹកញាប់មែន ថាចង់បិទច្រកផ្លូវនាំចេញនេះ ប្រសិនបើគេមិនដកទណ្ឌកម្មចេញពីលើខ្លួន។ តែយ៉ាងណា សម្រាប់ពេលនេះ ច្រកផ្លូវនាំចេញទិន្នផលអ៊ុយក្រែននេះ នៅតែបើកចំហរ ហើយជាច្រកដែលអនុញ្ញាតឲ្យអ៊ុយក្រែន នាំចេញទិន្នផលគ្រាប់ធញ្ញជាតិបានមួយផ្នែកធំ។ មកទល់ពេលនេះ ពាក់កណ្តាលខែមេសា ខ្ញុំមិនទាន់ដឹងច្បាស់ថា វិធានការហាមឃាត់ពីខាងហុងគ្រី និងប៉ូឡូញ ចូលជាធរមានហើយឬនៅនោះទេ ក៏ប៉ុន្តែខ្ញុំជឿថា វាប៉ះពាល់តិចតួចណាស់ ទៅលើការនាំចេញទិន្នផលកសិកម្មរបស់អ៊ុយក្រែន។"
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ