ប៉ូឡូញនឹងបញ្ជូនយន្តហោះចម្បាំង MiG-29 ចំនួន៤គ្រឿង ទៅឲ្យអ៊ុយក្រែន
លោកប្រធានាធិបតីប៉ូឡូញ បានប្រកាសកាលពីថ្ងៃព្រហស្បតិ៍ទី១៦មីនាថា ប៉ូឡូញនឹងបញ្ជូនយន្តហោះចម្បាំង MiG-29 ចំនួន៤គ្រឿង ទៅឲ្យកងទ័ពអ៊ុយក្រែន។ នេះគឺជាលើកទី១ហើយ ដែលប្រទេសសមាជិកអូតង់ សម្រេចបញ្ជូនយន្តហោះចម្បាំងទៅជួយអ៊ុយក្រែនបែបនេះ។ គួរបញ្ជាក់ថា ភាគីអ៊ុយក្រែនបានអំពាវនាវស្នើសុំច្រើនដងមកហើយ ចង់បានយន្តហោះចម្បាំងទំនើប ដោយសង្ឃឹមថានឹងអាចទទួលបាន នូវយន្តហោះចម្បាំង F-16 របស់អាមេរិក។ តែយ៉ាងណា ភាគីអាមេរិកបានប្រកែកដាច់ខាត ថាមិនអាចធ្វើបានទេ។
ចុះផ្សាយនៅថ្ងៃ៖
ស្តាប់ - ០២:០៥
លោកAndrzej Duda ប្រធានាធិបតីប៉ូឡូញ បានប្រកាសឲ្យដឹងថា ជំហានដំបូងប៉ូឡូញ នឹងបញ្ជូនយន្តហោះចម្បាំង ប្រភេទ MiG-29 ចំនួន៤គ្រឿង ទៅឲ្យកងទ័ពអ៊ុយក្រែន។ យន្តហោះទាំងនេះ គឺវាដំណើរការធម្មតាបានទាំងស្រុង ទោះបើមានអាយុចំណាស់បន្តិចមែន។ លោកបន្ថែមថា ជំហានបន្ទាប់ ប៉ូឡូញនឹងបញ្ជូនយន្តហោះប្រភេទនេះបន្ថែមទៀត ទៅឲ្យអ៊ុយក្រែន នៅពេលណាជួសជុលរួចរាល់។ លោកប្រធានាធិបតីប៉ូឡូញអះអាងថា អត្ថប្រយោជន៍នៃយន្តហោះចម្បាំង MiG-29 គឺថាទាហានអ៊ុយក្រែនចេះប្រើវាស្ទាត់ជំនាញស្រាប់ ដោយមិនចាំបាច់ធ្វើការហ្វឹកហាត់អ្វីបន្ថែមនោះទេ។
ភ្លាមៗក្រោយដំណឹងប្រកាសពីប៉ូឡូញ អ្នកនាំពាក្យនៃក្រសួងការពារជាតិអ៊ុយក្រែន បានថ្លែងអំណរគុណ និងបានលើកឡើងថា យន្តហោះចម្បាំងនេះ នឹងអាចជួយពង្រឹងសមត្ថភាពរបស់កងទ័ពអ៊ុយក្រែន ក្នុងការប្រយុទ្ធ។ តែយ៉ាងណា វានៅតែមិនទាន់គ្រប់គ្រាន់ ដើម្បីដោះស្រាយបញ្ហានោះទេ ព្រោះកងទ័ពអ៊ុយក្រែន ពិតជាត្រូវការយន្តហោះចម្បាំង F-16 របស់អាមេរិកខ្លាំងណាស់ ដើម្បីប្រយុទ្ធយកឈ្នះ។
គួររំលឹកថា ជាច្រើនខែមកហើយ ដែលអ៊ុយក្រែន ព្យាយាមស្នើសុំយន្តហោះចម្បាំងទំនើប ប្រភេទ F-16 ពីក្រុមប្រទេសសម្ព័ន្ធមិត្ត។ នៅក្រោយការប្រកាសរបស់ប៉ូឡូញ លោក John Kirby អ្នកនាំពាក្យសេតវិមានអាមេរិក បានអះអាងថា វានឹងមិនធ្វើឲ្យប្រែប្រួលដល់គោលជំហររបស់អូតង់ជាដាច់ខាត។ លោកបានសង្កាត់បញ្ជាក់ថា លោកប្រធានាធិបតី ចូ បៃដិន បានកំណត់ច្បាស់ហើយ ថាអាមេរិកមិនអាចបញ្ជូនយន្តហោះចម្បាំង ទៅឲ្យអ៊ុយក្រែនបានជាដាច់ខាត។
សូមបញ្ជាក់ថា បច្ចុប្បន្ននេះ ប៉ូឡូញមានយន្តហោះចម្បាំងប្រភេទ MiG-29 ចំនួនប្រមាណ១៥គ្រឿង ដែលភាគច្រើននៅប្រើការបាន។ យន្តហោះនេះសល់តាំងពីទសវត្សឆ្នាំ១៩៩០ បានមកពីអតីតអាល្លឺម៉ង់ខាងកើត។ កងទ័ពប៉ូឡូញកំពុងតែធ្វើទំនើបកម្ម ដោយបានទិញមកជំនួស នូវយន្តហោះចម្បាំងថ្មីរបស់កូរ៉េខាងត្បូង ប្រភេទ FA-50 និងយន្តហោះចម្បាំងអាមេរិក F-35។ ផ្អែកតាមលោករដ្ឋមន្ត្រីការពារជាតិប៉ូឡូញ ប្រទេសស្លូវ៉ាគី ក៏អាចពិចារណាបញ្ជូនយន្តហោះ MiG-29 ទៅជួយអ៊ុយក្រែនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ