ផ្ទុយពីអាមេរិក និងអូតង់ ប្រធានាធិបតីអ៊ុយក្រែននៅតែអះអាងថា មីស៊ីលធ្លាក់នៅប៉ូឡូញ ជាមីស៊ីលរុស្ស៊ី
អ៊ុយក្រែននៅតែរក្សាការចោទប្រកាន់រុស្ស៊ី នៅក្នុងរឿងធ្លាក់មីស៊ីល ក្នុងទឹកដីប៉ូឡូញ ដែលបានសម្លាប់មនុស្ស២នាក់ កាលពីល្ងាចថ្ងៃអង្គារ។ មានជំហរផ្ទុយពីសម្ព័ន្ធមិត្តអាមេរិក និងអូតង់ ប្រធានាធិបតី អ៊ុយក្រែន លោកហ្សេឡេនស្គីនៅតែនិយាយថា មីស៊ីលដែលធ្លាក់ នៅទឹកដីប៉ូឡូញ ជាមីស៊ីលរុស្ស៊ី។ នៅក្រោយ កិច្ចប្រជុំបន្ទាន់ នៅថ្ងៃអង្គារ ប្រមុខអង្គការអូតង់ បានលើកឡើង មីស៊ីលដែលធ្លាក់នៅប៉ូឡូញ ទំនងជាមីស៊ីលនៃប្រព័ន្ធការពារដែនអាកាសរបស់អ៊ុយក្រែន ដែលកងទ័ពអ៊ុយក្រែនប្រើសម្រាប់បាញ់ទម្លាក់មីស៊ីលរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
អ៊ុយក្រែន និងសម្ព័ន្ធមិត្តមានជំហរមិនដូចគ្នា នៅក្នុងរឿងធ្លាក់មីស៊ីលនៅលើទឹកដីប៉ូឡូញដែលសម្លាប់មនុស្ស២នាក់។ នៅទូរទស្សន៍ជាតិអ៊ុយក្រែន កាលពីយប់ថ្ងៃពុធ លោកប្រធានាធិបតី ហ្សេឡេនស្គីនៅតែនិយាយជឿជាក់ថា មីស៊ីលដែលធ្លាក់ក្នុងទឹកដីប៉ូឡូញ មិនមែនជាមីស៊ីលអ៊ុយក្រែន។
តាមប្រធានាធិបតីអ៊ុយក្រែន របាយការណ៍របស់កងទ័ពបង្ហាញថា មីស៊ីលដែលធ្លាក់នៅប៉ូឡូញ ជាមីស៊ីលរុស្ស៊ី ពោលគឺផ្ទុយពីការវាយតម្លៃរបស់អាមេរិក និងអូតង់ដែលថា មីស៊ីល ធា្លក់នៅទឹកដីប៉ូឡូញ ជាមីស៊ីលរបស់ប្រព័ន្ធការពារដែនអាកាសអ៊ុយក្រែន។
នៅក្នុងបទអន្តរាគមន៍តាមទូរទស្សន៍ជាតិ ប្រធានាធិបតីអ៊ុយក្រែនបានទាមទារផងដែរឲ្យអ្នកជំនាញអ៊ុយក្រែនចូលរួមក្នុងការស៊ើបអង្កេតនៅកន្លែងកើតហេតុ។ តាមលោកហ្សេឡេនស្គី ភាគីអ៊ុយក្រែនគួរទទួលបានគ្រប់ទិន្នន័យពីប្រទេសលោកខាងលិច ទាក់ទងនឹងការធ្លាក់មីស៊ីលនៅទឹកដីប៉ូឡូញ។
ប្រធានាធិបតីប៉ូឡូញបាននិយាយកាលពីថ្ងៃអង្គារថា មានតែប៉ូឡូញ និងអាមេរិកដែលមានសិទ្ធិសម្រេចថា តើភាគីណាដែលអាចចូលរួមក្នុងការស៊ើបអង្កេត។ នៅក្រោយមីស៊ីលធ្លាក់ទៅលើកសិដ្ឋានមួយកន្លែងនៅទឹកដីប៉ូឡូញ ក្បែរព្រំដែនអ៊ុយក្រែន ដែលបានសម្លាប់មនុស្ស២នាក់ ទាំងប៉ូឡូញ និងប្រទេសលោកខាងលិច ប្រយ័ត្នប្រយែង មិនទាន់សន្និដ្ឋានដូចអ៊ុយក្រែន ដែលបានទម្លាក់កំហុសភ្លាមៗលើរុស្ស៊ី។
នៅថ្ងៃពុធ Andrienne Watsonអ្នកនាំពាក្យរបស់ទីប្រឹក្សាសន្តិសុខជាតិអាមេរិកបាននិយាយថា គេមិនឃើញមានហេតុផលអ្វីដែល អាមេរិកត្រូវនិយាយផ្ទុយ ពីការលើកឡើងរបស់រដ្ឋាភិបាលប៉ូឡូញនោះទេ។ តាមការសន្និដ្ឋានដំបូងរបស់ភាគីប៉ូឡូញ មីស៊ីលធ្លាក់នៅ ទឹកដីប៉ូឡូញ ជាមីស៊ីលរបស់ប្រព័ន្ធការពារដែនអាកាស ដែលកងទ័ពអ៊ុយក្រែនប្រើសម្រាប់បាញ់ប្រឆាំងមីស៊ីលរុស្ស៊ី។ ប្រធានាធិបតីប៉ូឡូញ ផ្ទាល់បានលើកឡើងពីគ្រោះថ្នាក់អាក្រក់ ចំណែក ប្រមុខអង្គការអូតង់ក៏បានលើកឡើងពីឧបទ្ទវហេតុ ដែលបណ្តាលមកពីមីស៊ីលនៃប្រព័ន្ធការពារដែនអាកាសអ៊ុយក្រេន។
សម្រាប់អ្នកនាំពាក្យអាមេរិក ទោះលទ្ធផលនៃការស៊ើបអង្កេតចុងក្រោយចេញមកយ៉ាងណាក៏ដោយ ក៏ច្បាស់ណាស់ថា រុស្ស៊ី គឺជាអ្នកទទួលខុសត្រូវលើហេតុការណ៍ធ្លាក់មីស៊ីលកាលពីថ្ងៃអង្គារ ព្រោះថា ហេតុការណ៍ធ្លាក់មីស៊ីលនៅប៉ូឡូញ កើតឡើងនៅថ្ងៃដែលរុស្ស៊ីបាញ់សាច គ្រាប់មីស៊ីល ទៅលើហេដ្ឋារចនាសម្ព័ន្ធស៊ីវិលរបស់អ៊ុយក្រែន។ ដូច្នេះ "អ៊ុយក្រែនក៏បានប្រើសិទ្ធិការពារខ្លួន"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ