អ៊ុយក្រែន និងរុស្ស៊ីកំពុងបន្តចង្អុលមុខដាក់គ្នានៅក្នុងរឿងមីស៊ីលធ្លាក់លើប៉ូឡូញសម្លាប់មនុស្ស ២នាក់
សង្រ្គាមពាក្យសម្តីកំពុងបន្តមានយ៉ាងផុសផុលរវាងអ៊ុយក្រែន និងរុស្ស៊ីទាក់ទងនឹងការធ្លាក់មីស៊ីលសម្លាប់មនុស្ស ២នាក់លើទឹកដីប៉ូឡូញកាលពីរសៀលថ្ងៃអង្គារ ទី១៥ វិច្ឆិកា។ អ៊ុយក្រែនបន្តចង្អុលមុខរុស្ស៊ីដោយបញ្ជាក់ក្នុងថ្ងៃពុធ ទី១៦ វិច្ឆិកាថា ខ្លួនមានភស្តុតាងដែលបញ្ជាក់ជាទង្វើរបស់រុស្ស៊ី និងបានទាមទារចូលទៅកាន់កន្លែងដែលមីស៊ីលបានធ្លាក់ក្នុងទឹកដីប៉ូឡូញ និងសុំខ្លួនចូលរួមស៊ើបអង្កេត។ ក៏ប៉ុន្តែពេលនេះ ប្រទេសលោកខាងលិចខ្លះ ពិសេសអាមេរិក រួមទាំងអង្គការអូតង់បានលើកឡើងផ្ទុយពីអ៊ុយក្រែន។ ប្រមុខអង្គការអូតង់លោកយែន ស្តុលទែនប៊ែរបានថ្លែងនៅក្រោយកិច្ចប្រជុំបន្ទាន់ថ្នាក់ឯកអគ្គរដ្ឋទូតថា ឧបទ្ទវហេតុទំនងជាបណ្តាលមកពីមីស៊ីលនៃប្រព័ន្ធការពារដែនអាកាសរបស់អ៊ុយក្រែនដែលបានបាញ់ដើម្បីប្រឆាំងនឹងមីស៊ីលរុស្ស៊ី។ ចំណែកប្រធានាធិបតីអាមេរិកលោកបៃដិនបានចាត់ទុកជារឿងមិនគួរឲ្យជឿដែលមីស៊ីលត្រូវបានបាញ់ដោយរុស្ស៊ី។ យ៉ាងណាក៏ដោយ រុស្ស៊ីបានបន្តបដិសេធពីការគ្មានជាប់ពាក់ព័ន្ធនឹងរឿងមីស៊ីលធ្លាក់លើទឹកដីប៉ូឡូញ។ ចំណែកអ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវបានសាទរពីភាពប្រយ័ត្នប្រយែងរបស់លោកបៃដិន និងឆ្លៀតវាយប្រហារលើប៉ូឡូញដែលបានលើកឡើងពីមីស៊ីលរបស់រុស្ស៊ី។
ចុះផ្សាយនៅថ្ងៃ៖
ស្តាប់ - ០១:១០
« វាគ្មានហេតុផលអ្វីដែលមានកំណើនភាពតានតឹងឡើយ។ អស់លោកយល់ទេថា ប៉ូឡូញមានមធ្យោបាយគ្រប់យ៉ាងក្នុងដៃរបស់ខ្លួនដើម្បីរាយការណ៍ភ្លាមថា វាជាបំណែកមីស៊ីលប្រឆាំងយន្តហោះប្រភេទ S ៣០០។ ហើយអ្នកជំនាញទាំងអស់ប្រហែលជាយល់ថា វាមិនមែនជាមីស៊ីលរបស់កម្លាំងទ័ពរុស្ស៊ីទេ។ ជាថ្មីម្តងទៀត ខ្ញុំចង់អញ្ជើញអស់លោកឲ្យចាប់អារម្មណ៍លើប្រតិកម្មរបស់អាមេរិកដែលចេះប្រមាណ និងមានការថ្លឹងថ្លែង។
ប្រតិកម្មរបស់អាមេរិក គឺផ្ទុយនឹងប្រតិកម្មហួសហេតុ និងខឹងច្រឡោតរបស់ភាគីប៉ូឡូញ និងរបស់ប្រទេសមួយចំនួន។ ហេតុអ្វីបានជាគេឈានមកដល់ចំណុចនេះ?។ សំណួរនេះគួរតែត្រូវសួរទៅទីក្រុងវ៉ាសូវី ហើយអ្នកទទួលខុសត្រូវប៉ូឡូញគួរណាស់តែត្រូវបង្ហាញភាពអត់ធ្មត់ឲ្យបានច្រើន និងមានតុល្យភាពនៅពេលដែលពួកគេនិយាយពីប្រធានរឿងដែលរសើប និងប្រកបដោយគ្រោះថ្នាក់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ