លោកហ្សេឡេនស្គី៖អ៊ុយក្រែនចង់បានសន្តិភាព តែមិនមែនជាសន្តិភាពនៅក្នុងតម្លៃណាក៏បាននោះទេ
សង្រ្គាមរុស្ស៊ីឈ្លានពានអ៊ុយក្រែនបានក្លាយជាប្រធានរឿងមួយនៅក្នុងកិច្ចប្រជុំកំពូល G២០ រៀបចំក្នុងប្រទេសឥណ្ឌូណេស៊ី។ ប្រមុខការទូតរុស្ស៊ីលោកស៊ែរហ្កី ឡាវរ៉ូហ្វដែលបានទៅចូលរួមនៅក្នុងកិច្ចប្រជុំកំពូល G២០ បានថ្លែងថា លក្ខខណ្ឌដែលអ៊ុយក្រែនបានស្នើដើម្បីផ្តើមកិច្ចចរចាឈានទៅបញ្ចប់សង្រ្គាមជាលក្ខខណ្ឌមិនប្រាកដនិយម។ គួរបញ្ជាក់ថា អ៊ុយក្រែនបានទាមទារឲ្យរុស្ស៊ីដកទ័ពទាំងអស់ចេញពីអ៊ុយក្រែន និងការត្រឡប់វិញនូវបូរណៈភាពទឹកដីទាំងស្រុងរបស់អ៊ុយក្រែន។ ដោយឡែក និងជាថ្មីម្តងទៀត លោកឡាវរ៉ូហ្វបានចោទបស្ចិមប្រទេសពីបទធ្វើសង្រ្គាមលាក់មុខប្រឆាំងរុស្ស៊ីដោយយកអ៊ុយក្រែនធ្វើជាកូនអុក។ ខណៈដែលរុស្ស៊ីបានចូលរួមផ្ទាល់នៅក្នុងកិច្ចប្រជុំកំពូល G២០ អ៊ុយក្រែនបានចូលរួមពីចម្ងាយតាមរយៈអន្តរាគមន៍របស់ប្រធានាធិបតីលោកហ្សេឡេនស្គី។ នៅក្នុងសុន្ទរកថាតាមវីដេអូ លោកហ្សេឡេស្គីបានបញ្ជាក់ថា វាល្មមដល់ពេលដែលត្រូវបិទបញ្ចប់សង្រ្គាមបំផ្លិចបំផ្លាញរបស់រុស្ស៊ី។ លោកហ្សេឡេនស្គីបានស្នើឲ្យមានការដោះដូរអ្នកទោសទាំងអស់រវាងអ៊ុយក្រែន និងរុស្ស៊ី។ តាមលោកហ្សេឡេនស្គី អ៊ុយក្រែនចង់បានសន្តិភាព តែមិនមែនជាសន្តិភាពនៅក្នុងតម្លៃណាក៏បាននោះឡើយ។
ចុះផ្សាយនៅថ្ងៃ៖
ស្តាប់ - ០១:៣៤
« យើងចង់ឲ្យសង្រ្គាមឈ្លានពានរបស់រុស្ស៊ីបិទបញ្ចប់នៅក្នុងភាពយុត្តិធម៌ នៅក្នុងក្របខណ្ឌធម្មនុញ្ញអង្គការសហប្រជាជាតិ និងនៅក្នុងច្បាប់អន្តរជាតិ។ អ៊ុយក្រែនមិនគួរត្រូវបានគេស្នើសុំឱ្យសម្របសម្រួល ឬធ្វើសម្បទានជាមួយមនសិការ ជាមួយអធិបតេយ្យភាព ជាមួយទឹកដី និងជាមួយឯករាជ្យភាពរបស់ខ្លួនឡើយ។ យើងគោរពច្បាប់ ហើយប្រជាជនរបស់យើងជាប្រជាជនដែលប្រកាន់ពាក្យសម្តី។
អ៊ុយក្រែនតែងតែជាអ្នកនំាមុខគេនៅក្នុងកិច្ចខិតខំប្រឹងប្រែងរក្សាសន្តិភាព ហើយពិភពលោកបានធ្វើជាសាក្សីនៅក្នុងរឿងនេះ។ ហើយបើរុស្ស៊ីបញ្ជាក់ថាខ្លួននឹងបិទបញ្ចប់សង្រ្គាមមួយនេះ រុស្ស៊ីត្រូវតែបង្ហាញតាមរយៈទង្វើជាប់ស្តែងរបស់ខ្លួន។ តាមមើលទៅ ប្រហែលគ្មានអ្នកណាម្នាក់អាចជឿលើអ្វីដែលរុស្ស៊ីនិយាយនោះទេ។ វានឹងគ្មានកិច្ចព្រមព្រៀងក្រុងមីនស្កិ៍លើកទី៣ ឡើយ ព្រោះរុស្ស៊ីច្បាស់ជារំលោភភ្លាមក្រោយពីបានចុះហត្ថលេខា។
ប្រសិនបើគ្មានសកម្មភាពជាក់ស្តែងពីក្រុងមូស្គូក្នុងការស្តារសន្តិភាពឡើងវិញទេ អ្វីដែលរុស្ស៊ីបាននិយាយមានន័យថា រុស្ស៊ីគ្រាន់តែចង់បញ្ឆោតអស់លោកទាំងអស់គ្នា និងចង់ដាក់សង្រ្គាមពេលនេះឲ្យនៅទ្រឹងមួយកន្លែង ខណៈពេលដែលរុស្ស៊ីកំពុងប្រឈមនឹងបរាជ័យនៅលើសមរភូមិ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ