តើមីស៊ីលធ្លាក់លើប៉ូឡូញសម្លាប់មនុស្ស ២នាក់ជាមីស៊ីលរបស់អ្នកណា និងអ្នកណាជាអ្នកបាញ់?
ចុះផ្សាយនៅថ្ងៃ៖
ស្តាប់ - ០៥:៥៦
នៅថ្ងៃពុធ ទី១៦ វិច្ឆិកានេះ គ្រប់គ្នាកំពុងផ្តោតចក្ខុលើព្រឹត្តិការណ៍ធ្លាក់មីស៊ីលលើទឹកដីប្រទេសប៉ូឡូញនារសៀលថ្ងៃអង្គារ ទី១៥ វិច្ឆិកាដែលបានបណ្តាលឲ្យស្លាប់ពលរដ្ឋប៉ូឡូញចំនួនពីរនាក់។ ព្រឹត្តិការណ៍មួយនេះបានបង្កឲ្យមានការភ្ញាក់ផ្អើល ភិតភ័យ និងការបញ្ចេញប្រតិកម្មជាបន្តបន្ទាប់។ អ៊ុយក្រែនបានចង្អុលមុខរុស្ស៊ីភ្លាម ហើយរុស្ស៊ីក៏បានចេញមុខបដិសេធភ្លាមភ្លែត។ ចំណែកក្រុមប្រទេសបស្ចិមលោកនៅមិនទាន់ហ៊ានសន្និដ្ឋានយ៉ាងម៉េចដោយរង់ចាំលទ្ធផលស៊ើបអង្កេតស៊ីជម្រៅ។ អង្គការអូតង់បានកោះប្រជុំបន្ទាន់ថ្នាក់ឯកអគ្គរដ្ឋទូតនាព្រឹកថ្ងៃពុធ ទី១៦ វិច្ឆិកានេះ ព្រោះប៉ូឡូញជាប្រទេសសមាជិកម្នាក់។
នៅរសៀលថ្ងៃអង្គារ ទី១៥ វិច្ឆិកាវេលាម៉ោង ៤ល្ងាចម៉ោងក្នុងប្រទេសប៉ូឡូញ មីស៊ីលមួយគ្រាប់បានធ្លាក់លើភូមិឈ្មោះ ភ្ជេវូដូវ (Przewodow) ដែលមានចម្ងាយប្រមាណជា ៧គីឡូម៉ែត្រពីខ្សែព្រំដែនប្រទេសអ៊ុយក្រែន។ តាមរដ្ឋអំណាចប៉ូឡូញ មីស៊ីលនោះបានផ្តាច់ជីវិតប្រជាជនប៉ូឡូញចំនួន ២នាក់។ ប្រតិកម្មភ្លាមៗតាំងពីក្រោយត្រូវគ្រាប់មីស៊ីលរហូតដល់ថ្ងៃពុធ ទី១៦ វិច្ឆិកា រដ្ឋាភិបាលប៉ូឡូញបានប្រកាសដាក់ប្រទេសក្នុងភាពអាសន្នកម្រិតខ្ពស់ និងបានកោះប្រជុំក្រុមប្រឹក្សាសន្តិសសុខជាតិ។ ទន្ទឹមគ្នានេះ ប៉ូឡូញក្នុងនាមជាសមាជិកអឺរ៉ុប និងសមាជិកអង្គការអូតង់បានជូនព័ត៌មាននេះជាបន្ទាន់ភ្លាមៗទៅថ្នាក់ដឹកនាំអឺរ៉ុប និងថ្នាក់ដឹកនាំអូតង់។
ព្រឹត្តិការណ៍ថ្មីមួយនេះបានធ្លាក់មកចំពេលដែលថ្នាក់ដឹកនាំគ្រាក់ៗក្នុងលោកកំពុងជួបជុំគ្នានៅក្នុងកិច្ចប្រជុំកំពូល G២០ ក្នុងប្រទេសឥណ្ឌូណេស៊ី។ អ៊ីចឹងហើយបានជានៅក្នុងថ្ងៃទី២ នៃកិច្ចប្រជុំកំពូល G២០ ថ្ងៃពុធ ទី១៦ វិច្ឆិកា រឿងរ៉ាវមីស៊ីលធ្លាក់លើប៉ូឡូញបានក្លាយជាប្រធានបទក្តៅផង និងក្តីបារម្ភផង។ ក្តៅ និងក្តីបារម្ភ ព្រោះវាបានកើតមានឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន និងដែលសង្រ្គាមមួយនេះកំពុងបង្កឲ្យមានភាពតានតឹងខ្លាំងរវាងរុស្ស៊ី និងបស្ចិមលោក។ តាំងពីយប់ថ្ងៃអង្គារ ទី១៥ឆ្លងចូលថ្ងៃពុធ ទី១៦ វិច្ឆិកា ប្រតិកម្ម និងសំណួរកំពុងបន្តធ្លាក់មកជាបន្តបន្ទាប់។
មីស៊ីលរបស់អ្នកណា បាញ់ចេញពីទីកន្លែងណា ហើយអ្នកណាជាអ្នកបាញ់មីស៊ីលនោះ?
តាំងពីយប់ថ្ងៃអង្គារ ទី១៥ឆ្លងចូលថ្ងៃពុធ ទី១៦ វិច្ឆិកា ក្រុមប្រទេសលោកខាងលិចមានការប្រយ័ត្នប្រយែងខ្លាំងណាស់ដោយពួកគេនៅមិនទាន់ហ៊ាននិយាយអ្វី ឬសន្និដ្ឋានអ្វីឲ្យបានច្បាស់លាស់ទេ។ ចំណែកប៉ូឡូញដែលជាប្រទេសរងគ្រោះផ្ទាល់ដោយមីស៊ីលក៏មានការប្រយ័ត្នប្រយែងដោយត្រឹមបញ្ជាក់ថា អត្តសញ្ញាណរបស់មីស៊ីលប្រហែលជាមីស៊ីលផលិតនៅរុស្ស៊ី។ តែប៉ូឡូញបានចៀងវាងនិយាយពីឈ្មោះប្រទេសអ្នកបាញ់មីស៊ីលនោះ។ គឺខុសពីអ៊ុយក្រែនដែលក្នុងថ្ងៃអង្គារ ទី១៥ វិច្ឆិកា ប្រធានាធិបតីលោកហ្សេឡេនស្គីបាននិយាយលឿន និងសន្និដ្ឋានរហ័សដោយទម្លាក់កំហុសដាក់រុស្ស៊ី។
ក្នុងថ្ងៃពុធ ទី១៦ វិច្ឆិកា លោកហ្សេឡេនស្គីបានថ្លែងតាមវីដេអូទៅកាន់កិច្ចប្រជុំកំពូល G២០ ក្នុងប្រទេសឥណ្ឌូណេស៊ីថា មីស៊ីលធ្លាក់លើប៉ូឡូញជាសញ្ញាដែលរុស្ស៊ីចង់បញ្ជូនឲ្យ G២០។ ពីខាងរុស្ស៊ីវិញ ក្រុងមូស្គូបានចេញមុខបដិសេធភ្លាមៗតាំងពីយប់ថ្ងៃអង្គារ ទី១៥ វិច្ឆិកាថា ខ្លួនមិនបានបាញ់មីស៊ីលសំដៅទឹកដីប៉ូឡូញទេ និងថា ការចោទរុស្ស៊ីជាការចង់បង្ករឿងដើម្បីរុញស្ថានការណ៍ឲ្យធ្លាក់ធ្ងន់ធ្ងរកាន់តែខ្លាំង។ ទន្ទឹមគ្នានេះ រុស្ស៊ីក៏បានចោទអ៊ុយក្រែនត្រឡប់វិញថាជាអ្នកបាញ់មីស៊ីលលើទឹកដីប៉ូឡូញ។ តើជាស្នាដៃរបស់រុស្ស៊ី របស់អ៊ុយក្រែន ឬរបស់ប្រទេសផ្សេង?។ ការស៊ើបអង្កេតបានចាប់ផ្តើម ហើយបស្ចិមលោកកំពុងរង់ចាំលទ្ធផលស៊ើបអង្កេត មុននឹងសន្និដ្ឋានអ្វីឲ្យបានច្បាស់លាស់។
លោកបៃដិន៖រឿងរុស្ស៊ីបាញ់មីស៊ីលលើទឹកដីប៉ូឡូញជារឿងមិនគួរឲ្យជឿសោះ
ក្រសួងស៊ើបការណ៍សម្ងាត់អាមេរិកបានផ្តល់ព័ត៌មានបឋមថា មីស៊ីលធ្លាក់លើទឹកដីប៉ូឡូញអាចជាមីស៊ីលដែលអ៊ុយក្រែនបានបាញ់ ហើយសម្មតិកម្មមួយនេះហាក់កំពុងត្រូវបានលើកឡើងជាបន្តបន្ទាប់។ នេះស បញ្ជាក់ឲ្យឃើញថា ការសំឡឹងផ្តោតតែទៅលើរុស្ស៊ីមួយនៅក្នុងរឿងនេះហាក់កំពុងឃ្លាតចេញបន្តិចវិញ។ តាមពិតទៅ គេមិនបានចង្អុល ឬចោទត្រង់លើអ៊ុយក្រែនថាជាអ្នកបាញ់មីស៊ីលលើប៉ូឡូញទេ។ អ្វីដែលគេចង់និយាយ មីស៊ីលធ្លាក់លើទឹកដីប៉ូឡូញអាចជាមីស៊ីលដែលអ៊ុយក្រែនបានបាញ់ទៅកម្ទេចមីស៊ីលរុស្ស៊ី។ តែប្រហែលជាបាញ់ខុសគោលដៅ ឬមួយក៏មានកំហុសបច្ចេកទេសអ្វីក៏មីស៊ីលនោះបែរជាធ្លាក់ទៅលើដីប៉ូឡូញវិញ។
ការហ៊ានលើកឡើងដូចនេះ ព្រោះក្នុងថ្ងៃអង្គារ ទី១៥ វិច្ឆិកា រុស្ស៊ីបានបាញ់មីស៊ីលប្រមាណជា ១០០គ្រាប់ស្រោចលើអ៊ុយក្រែន ហើយដើម្បីទប់ទល់នឹងមីស៊ីលរុស្ស៊ីវិញ អ៊ុយក្រែនក៏បានព្យាយាមប្រើមីស៊ីលទៅបាញ់កម្ទេចមីស៊ីលរុស្ស៊ី។ ចំណែកប្រធានាធិបតីអាមេរិកលោកបៃដិនបានបញ្ជាក់ពីប្រទេសឥណ្ឌូណេស៊ីដែលលោកកំពុងចូលរួមនៅក្នុងកិច្ចប្រជុំកំពូល G២០ ថា រឿងរុស្ស៊ីបាញ់មីស៊ីលលើទឹកដីប៉ូឡូញជារឿងមិនគួរឲ្យជឿសោះ។ យ៉ាងណាក៏ដោយ គ្រប់គ្នាកំពុងបន្តប្រយ័ត្នប្រយែងខ្លាំងណាស់ និងបាននាំគ្នាអំពាវនាវឲ្យរក្សាភាពស្ងប់ស្ងាត់ចំពោះរឿងនេះ។
តែក្នុងពេលជាមួយគ្នា ក្រុមប្រទេសលោកខាងលិចក៏មិនបានធ្វេសប្រហែស និងមើលស្រាលលើរឿងមួយនេះដែរ។ ក្នុងថ្ងៃពុធ ទី១៦ វិច្ឆិកា អង្គការអូតង់បានកោះប្រជុំបន្ទាន់ថ្នាក់ឯកអគ្គរដ្ឋទូតដើម្បីជជែក និងពិគ្រោះគ្នាលើរឿងនេះមុននឹងសម្រេចវិធានការណាមួយ។ ចូរកុំភ្លេចថា ប៉ូឡូញជាសមាជិកអឺរ៉ុប និងសមាជិកអូតង់។ មាត្រាទី៥ នៃសន្ធិសញ្ញាអូតង់បានចែងច្បាស់ៗថា អូតង់នឹងចូលជួយសមាជិកណាដែលរងការវាយប្រហារពីអ្នកផ្សេង។ ឧបមាថាការធ្លាក់មីស៊ីលលើប៉ូឡូញជាស្នាដៃរុស្ស៊ី សង្រ្គាមអ៊ុយក្រែនអាចប្រែក្លាយទៅជាសង្រ្គាមលោកលើកទី៣ ផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ