OMS/WHO៖ វិបត្តិកូវីដ បានធ្វើឲ្យចំនួនមនុស្សស្លាប់ដោយជម្ងឺរបេង កើនឡើងគួរឲ្យបារម្ភ
ចំនួនមនុស្ស ស្លាប់ដោយជម្ងឺរបេង បានស្ទុះកើនឡើង គួរឲ្យបារម្ភ នៅក្នុងឆ្នាំ២០២០កន្លងទៅ។ នេះបើផ្អែកតាមរបាយការណ៍ របស់អង្គការសុខភាពពិភពលោក។ អង្គការនេះ អះអាងថា វិបត្តិកូវីដ គឺជាប្រភពបញ្ហា ធ្វើឲ្យការតាមដានសុខភាព និងការព្យាបាលជម្ងឺរបេង មានការធ្លាក់ចុះខ្លាំង នៅតាមប្រទេសមួយចំនួន។ ស្ថានភាពនឹងកាន់តែធ្ងន់ធ្ងរ សម្រាប់ពេលខាងមុខ ព្រោះអាចមានអ្នកជម្ងឺរបេងជាច្រើននាក់ មានជម្ងឺនេះ តែមិនបានដឹងខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៤
ជាលើកទីមួយ ក្នុងរវាង១០ឆ្នាំចុងក្រោយនេះ ដែលចំនួនមនុស្សស្លាប់ដោយជម្ងឺរបេង បានស្ទុះកើនឡើង។ វិបត្តិកូវីដ១៩ បានធ្វើឲ្យការប្រឹងប្រែងកន្លងមក ក្នុងការលុបបំបាត់ជំងឺរបេង ត្រូវដើរថយក្រោយ។ យោងតាមរបាយការណ៍ប្រចាំឆ្នាំ របស់អង្គការសុខភាពពិភពលោក ចេញផ្សាយកាលពីថ្ងៃព្រហស្បតិ៍ ទី១៤តុលា ក្នុងឆ្នាំ២០២០ មានអ្នកជម្ងឺរបេង ដែលផ្ទុកមេរោគអេដស៍ បានស្លាប់ចំនួន ២១៤០០០នាក់ ខណៈដែលឆ្នាំ២០១៩ មានចំនួន ២០៩០០០នាក់។ សម្រាប់អ្នកជម្ងឺរបេងធម្មតាផ្សេងទៀត បានស្លាប់ចំនួន ប្រមាណ១,៣លាននាក់ ពោលគឺលើពីឆ្នាំ២០១៩ ប្រមាណ១សែននាក់។ ជាសរុប ក្នុងឆ្នាំ២០២០ មានមនុស្សស្លាប់ដោយជម្ងឺរបេង ចំនួនប្រមាណ ១,៥លាននាក់។
យោងតាមអង្គការសុខភាពពិភពលោក ចំនួនមនុស្សដែលមានជម្ងឺរបេង តែមិនដឹងខ្លួន ឬមិនបានត្រូវគេរាប់នៅក្នុងតួលេខផ្លូវការ គឺអាចមានប្រមាណ៤,១លាននាក់ នៅក្នុងឆ្នាំ២០២០។ នៅឆ្នាំ ២០១៩ ចំនួន ត្រូវគេប៉ាន់ស្មានប្រមាណ ២,៩លាននាក់។ ហើយនៅឆ្នាំ២០២១ និង ២០២២ ខាងមុខ អ្នកជំនាញរំពឹងថា ចំនួនអ្នកឆ្លង និងស្លាប់ដោយសារជម្ងឺរបេង នឹងកើនជាងនេះទៀត។
លោកអគ្គលេខាធិការអង្គការសុខភាពពិភពលោក បានលើកឡើងថា របាយការណ៍នេះ បានមកបញ្ជាក់អំពីការភ័យបារម្ភរបស់អ្នកជំនាញ។ ពោលគឺវិបត្តិកូវីដ ពិតជាបានមកបំផ្លាញការប្រឹងប្រែង ក្នុងការតាមដានសុខភាព និងការព្យាបាលជំងឺផ្សេងៗទៀត ដូចជាជំងឺរបេងជាដើម។ លោកបានអំពាវនាវ ថា យោងតាមតួលេខគួរឲ្យបារម្ភទាំងនេះ គឺពិភពលោក ត្រូវតែចំណាយប្រាក់វិនិយោគជាបន្ទាន់ នៅក្នុងវិស័យសុខាភិបាល ដើម្បីពង្រឹងការតាមដានសុខភាព ពិនិត្យមេរោគ និងការព្យបាលអ្នកជំងឺរបេង។
វិធានការបិទខ្ទប់នានា ដោយសារកូវីដ បានរារាំងមនុស្ស មិនឲ្យបានទទួលសេវាសុខភាពត្រឹមត្រូវ។ បន្ថែមពីនេះ វិស័យសុខាភិបាល តាមប្រទេសមួយចំនួនធំ បានផ្តោតការយកចិត្តទុកដាក់ ទាំងសម្ភារៈ ថវិកា និងកម្លាំងមនុស្ស តែទៅលើបញ្ហាកូវីដ។ នៅឆ្នាំ ២០១៩ ចំនួនមនុស្សដែលមកពិនិត្យសុខភាព និងរកឃើញថាមានជម្ងឺរបេង គឺមានចំនួន ៧,១លាននាក់។ តែចំនួននេះបានធ្លាក់ មកនៅត្រឹម ៥,៨លាននាក់ នៅឆ្នាំ២០២០។ ប្រទេសដូចជា ឥណ្ឌា ឥណ្ឌូណេស៊ី ហ្វ៊ីលីពីន និងចិន ជាដើម សុទ្ធតែត្រូវបានគេសង្កេតឃើញថា មានការថយចុះខ្លាំង ក្នុងការតាមដានសុខភាពអ្នកជំងឺរបេង។
ដូចគ្នាដែរ ចំនួនមនុស្សដែលបានទទួលថ្នាំបង្ការជម្ងឺរបេង ក៏បានថយចុះដែរ ចំនួន២១% មកនៅត្រឹមតែ ២,៨លាននាក់តែប៉ុណ្ណោះ។ ចំណែកអ្នកជម្ងឺរបេងធ្ងន់ធ្ងរ ការព្យាបាលបានចុះថយ ចំនួន១៥% ពី ១៧៧០០០នាក់ ឆ្នាំ២០១៩ មកនៅត្រឹម ១៥០០០០នាក់ ក្នុងឆ្នាំ២០២០។ ការចំណាយសរុបទូទាំងពិភពលោក ដើម្បីប្រយុទ្ធនឹងជម្ងឺរបេង បានចុះថយបន្តិច នៅត្រឹម៥,៣ពាន់លានដុល្លារ ខណៈកម្មវត្ថុរួម គឺគ្រោងចំនាយយ៉ាងហោច ១៣ពាន់លានដុល្លារ នៅរវាងឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ