យូណេស្កូបារម្ភ ពីសិស្សជាង៨០០លាននាក់ ដែលគ្មានកុំព្យូរទ័រសម្រាប់អនុវត្តការរៀននៅផ្ទះ
អង្គការយូណេស្កូ បានចេញរបាយការណ៍មួយ កាលពីថ្ងៃអង្គារម្សិលមិញ ដោយបានសម្តែងការព្រួយបារម្ភបំផុត ពីភាពមិនស្មើគ្នា រវាងសិស្សសាលា ដែលត្រូវអនុវត្តការរៀននៅផ្ទះ ក្នុងកាលៈទេសៈ ដែលសាលារៀនត្រូវបិទទ្វារ ដោយសារតែមេរោគកូវីដ១៩។ យោងតាមអង្គការយូណេស្កូ ក្នុងចំណោមសិស្សសាលាទូទាំងពិភពលោក មានពាក់កណ្តាល គឺគ្មានម៉ាស៊ីនកុំព្យូទ័រ ដើម្បីរៀនទេ ហើយប្រមាណ៤៣% គឺពុំមានសេវាបណ្តាញអ៊ីនធ័រណិត ដែលចាំបាច់សម្រាប់ការរៀននៅផ្ទះឡើយ។
ចុះផ្សាយនៅថ្ងៃ៖
ស្តាប់ - ០២:៣២
ម៉ាស៊ីនកុំព្យូទ័រ គឺជាឧបករណ៍ដ៏ចាំបាច់បំផុត ក្នុងការអនុវត្តការរៀនសូត្រនៅផ្ទះ ក្នុងខណៈដែលសាលារៀនត្រូវបិទ ព្រោះតែមេរោគកូវីដ១៩។ ក៏ប៉ុន្តែ យោងតាមរបាយការណ៍របស់ អង្គការយូណេស្កូ សិស្សសាលាប្រមាណ៥០% ពោលគឺស្មើនឹង៨២៦លាននាក់ នៅទូទាំងពិភពលោក គ្មានម៉ាស៊ីនកុំព្យូទ័រ សម្រាប់រៀននៅផ្ទះទេ។ ហើយសិស្សប្រមាណជា៧០៦លាននាក់ គឺពុំមានសេវាបណ្តាញអ៊ីនធ័រណិត ដើម្បីអាចតាមដានការបង្រៀនរបស់គ្រូ ឬទទួលលំហាត់ពីគ្រូបានឡើយ។
ជាមួយនឹងវិធានការបិទសាលា ហើយឲ្យសិស្សរៀនពីផ្ទះនេះ អង្គការយូណេស្កូ កំពុងតែផ្តោតការព្រួយបារម្ភ ចំពោះគម្លាតគ្នា រវាងសិស្សដែលមានលទ្ធភាព និងសិស្សដែលគ្មានលទ្ធភាព។ កម្រិតអសមភាពនេះ មានកាន់តែខ្លាំង ជាពិសេសនៅតាមប្រទេស ដែលមានប្រាក់ចំណូលមធ្យម។ ជាក់ស្តែងនៅតំបន់អាហ្វ្រិកភាគខាងត្បូងសាហារ៉ា ៨៩%នៃសិស្សសាលា គឺគ្មានម៉ាស៊ីនកំព្យូទ័រទេ ហើយ៨២%គ្មានបណ្តាញអ៊ីនធ័រណិត។
បើទោះបីជាទូរស័ព្ទទំនើប អាចភ្ជាប់បណ្តាញអ៊ីនធ័រណិត និងអាចអនុញ្ញាតឲ្យសិស្សតាមដានការបង្រៀន ឬទាក់ទងជាមួយគ្រូក៏ដោយ ក៏ប៉ុន្តែ មានសិស្សយ៉ាងហោចចំនួន៥៦លាននាក់ ដែលរស់នៅតាមតំបន់ ដែលគ្មានបណ្តាញទូរស័ព្ទ។ បន្ថែមពីនេះទៀត អង្គការយូណេស្កូ សង្កត់ធ្ងន់អំពី បញ្ហាកង្វះសមត្ថភាព ផ្នែកបច្ចេកវិទ្យាព័ត៌មានវិទ្យា របស់គ្រូបង្រៀន នៅតាមប្រទេសក្រីក្រ ដែលរិតតែបន្ថែមការលំបាក ដល់ការបង្រៀនតាមអនឡាញ។
គួររំលឹកថា បច្ចុប្បន្ននេះ សិស្សសាលារាប់ពីថ្នាក់បឋម ដល់មធ្យមសិក្សា ប្រមាណ១៥០០លាននាក់ រួមទាំងគ្រូប្រមាណ៦៣លាននាក់ នៅទូទាំងពិភពលោក ត្រូវបង្ខំចិត្តនៅផ្ទះ មិនអាចទៅសាលារៀន ក៏ព្រោះតែវិធានការបិទសាលារៀន របស់អាជ្ញាធរតាមប្រទេសមួយចំនួនធំ។ លោកស្រី Audrey Azoulay អគ្គលេខាធិការនៃអង្គការយូណេស្កូ បានលើកឡើងថា ប្រឈមនឹងបញ្ហាអសមភាពដ៏ធ្ងន់ធ្ងរនេះ សហគមអន្តរជាតិ និងគ្រប់ភាគីពាក់ព័ន្ធ ត្រូវតែបន្ថែមការជួយជ្រោមជ្រែង ធ្វើយ៉ាងណា ឲ្យសិស្សអាចមានលទ្ធភាពបន្តការរៀនសូត្រ ឲ្យបានស្មើភាពគ្នា។ ជម្រើសបន្ថែម អាចមានដូចជាបន្ថែម ការរៀនសូត្រ ផ្សាយតាមវិទ្យុ ផ្សាយតាមទូរទស្សន៍ ឬក៏ស្វែងរកគំនិតថ្មីទៀត ដើម្បីអនុញ្ញាតឲ្យសិស្សបានទទួលចំណេះ។
លោកស្រី Stefania Giannini អគ្គលេខាធិការរងនៃអង្គការយូណេស្កូ លើកឡើងថា គម្លាតគ្នានៃលទ្ធភាពទទួលបានចំណេះដឹងរបស់សិស្ស វានឹងបន្ថែមឲ្យមានគម្លាតគ្នា វាងកម្រិតចំនេះដឹង របស់សិស្សដែលក្រីក្រ និងសិស្សដែលមានជីវភាពធូរធា។ នេះគឺជាគ្រោះថ្នាក់មួយទៅថ្ងៃអនាគត ព្រោះគេមិនអាចកសាងសង្គមមួយ ឬប្រទេសមួយ ដែលពោរពេញទៅដោយអសមភាពបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ