One World Together at home ការប្រគុំតន្រ្តីដ៏អស្ចារ្យ ដើម្បីការសាមគ្គី និងអរគុណចំពោះក្រុមគ្រូពេទ្យ
កាលពីយប់ថ្ងៃសៅរ៍ទី១៨មេសា មានការប្រគុំតន្ត្រីដ៏អស្ចារ្យមួយ ឈ្មោះថា One World : Together at home ចូលរួមដោយកំពូលតារាចម្រៀងល្បីៗ ពិធីករ និងតារាសម្តែងល្បីៗ ជាច្រើននាក់។ ជាការប្រគុំតន្ត្រី ផ្សាយបន្តផ្ទាល់ពីផ្ទះរបស់កំពូលតារាទាំងនោះ រៀងៗខ្លួន ដើម្បីសម្តែងការសាមគ្គី ជួយគ្នា រវាងមនុស្សជាតិទាំងអស់ ខណៈដែលពិភពលោក កំពុងស្ថិតក្នុងស្ថានភាពដ៏លំបាក បង្កឡើងដោយការឆ្លងរាលដាល នូវមេរោគកូវីដ១៩។
ចុះផ្សាយនៅថ្ងៃ៖
ស្តាប់ - ០៤:១៨
កម្មវិធីប្រគុំតន្ត្រីផ្សាយផ្ទាល់ចេញពីផ្ទះរៀងៗខ្លួន ឈ្មោះថា One World : Together at home គឺជាគំនិតផ្តួចផ្តើម របស់កំពូលតារាចម្រៀង Lady Gaga រួមសហការជាមួយ អង្គការ Global Citizen ព្រមទាំងអង្គការសុខភាពពិភពលោក។
គួរបញ្ជាក់ថា តារាចម្រៀង Lady Gaga ធ្លាប់បានចូលរួម រៃអង្គាសប្រាក់ជាច្រើនលានដុល្លារ ជួយដល់មូលនិធិនៃអង្គការសុខភាពពិភពលោក ដើម្បីយកទៅចំណាយ ក្នុងការប្រយុទ្ធប្រឆាំងនឹងមេរោគកូវីដ១៩។
One World : Together at home គឺជាព្រឹត្តិការណ៍ដ៏អស្ចារ្យ និងមិនធ្លាប់មានពីមុនមកដែលមានការចូលរួម ពីកំពូលតារាល្បីៗជាច្រើននាក់ ដូចជាក្រុមចម្រៀង The Rolling Stone លោក Paul Mccartney លោក Elton John អ្នកស្រី Celine Dion នាង Alicia Keys លោក Stevie Wonder និងកំពូលតន្ត្រីករព្យាណូ Lang Lang ជាដើម។
ពីតាមផ្ទះរៀងៗខ្លួន កំពូលកំពូលតារាទាំងអស់ បានរួមគ្នា ច្រៀងចម្រៀង និងលេងភ្លេងជាច្រើនបទ អស់រយៈពេលប្រមាណជាង៨ម៉ោង។ តាមរយៈបទចម្រៀងទាំងនេះ កំពូលតារាពិភពលោក ទាំងអស់ ចង់ចូលរួមផ្ញើសារ ទៅកាន់ពិភពលោកទាំងមូល ដែលកំពុងតែឆ្លងកាត់នូវវិបត្តិដ៏ធ្ងន់ធ្ងរបង្កឡើង ដោយមេរោគកូវីដ១៩។
សេចក្តីក្លាហាន របស់ក្រុមគ្រូពេទ្យ និងក្រុមការងារនៅតាមមន្ទីរពេទ្យ ដែលប្រឈមនឹងមេរោគកូវីដ១៩ គឺជាវីរៈភាព ជាការលះបង់ដើម្បីប្រយោជន៍រួម ដែលមនុស្សម្នាទាំងអស់ ត្រូវយកជាគម្រូ នឹងរំលឹកគុណ។ ភាពអំណត់អត់ធ្មត់ ការតាំងចិត្តរឹងមាំ សាមគ្គីភាព ភាតរៈភាព ជួយគ្នាទៅវិញទៅមករវាងមនុស្សជាតិ ដើម្បីយកឈ្នះមេរោគក៏កាចសាហាវនេះ គឺជាខ្លឹមសារដែលការប្រគុំតន្រ្តីនេះ ចង់ចែករំលែក ទៅកាន់មនុស្សជាតិទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ