សង្រ្គាមឈ្លានពានអ៊ុយក្រែន៖ រុស្ស៊ីកាន់តែឯកោនៅលើឆាកអន្តរជាតិ
ចុះផ្សាយនៅថ្ងៃ៖
ស្តាប់ - ០៧:២៣
ដោយសាររឿងសង្រ្គាមឈ្លានពានអ៊ុយក្រែន រុស្ស៊ីកំពុងរងការថ្កោលទោសកាន់តែច្រើន នៅលើឆាកអន្តរជាតិ។ នៅថ្ងៃពុធម្សិលមិញ រដ្ឋអាជ្ញារបស់តុលាការព្រហ្មទណ្ឌអន្តរជាតិ បានប្រកាស ចាប់ផ្តើមបើកការស៊ើបអង្កេតជាផ្លូវការ លើសង្រ្គាមអ៊ុយក្រែន។ ចំណែកមហាសន្និបាតអសបវិញ បានបោះឆ្នោតគាំទ្រដោយសំឡេងយ៉ាងច្រើនលើសលុបទាមទារឲ្យរុស្ស៊ីឈប់ប្រើកម្លាំងយោធានៅទឹកដីអ៊ុយក្រែន និងត្រូវដកទ័ពចេញ ជាបន្ទាន់ ពីទឹកដីអ៊ុយក្រែន។
ផ្ទុយពីសេចក្តីសម្រេចរបស់ក្រុមប្រឹក្សាសន្តិសុខដែលមានលក្ខណៈបង្ខិតបង្ខំ តាមផ្លូវច្បាប់ សេចក្តីសម្រេចរបស់មហាសន្និបាតអង្គការសហប្រជាជាតិគ្មានអំណាចទៅចាប់បង្ខំឲ្យរុស្ស៊ី ត្រូវតែដកទ័ព ឈប់ធ្វើសង្រ្គាមនៅអ៊ុយក្រែន។
ប៉ុន្តែ ទោះគ្មានអំណាចផ្លូវច្បាប់ទៅលើរុស្ស៊ី សេចក្តីសម្រេចរបស់មហាសន្និបាតអង្គការសហប្រជាជាតិ ដែលបោះឆ្នោតគាំទ្រដោយសំឡេងលើសលុប ដល់ទៅ ១៤១ប្រទេស នឹងធ្វើឲ្យរុស្ស៊ី កាន់តែឯកោ នៅលើឆាកអន្តរជាតិ។ ជាប់ទណ្ឌកម្មសេដ្ឋកិច្ចរបស់ប្រទេសលោកខាងលិច ហើយឥលូវត្រូវមកឯកោ រងការរិះគន់ នៅក្នុងសេចក្តីសម្រេចរបស់មហាសន្និបាតអង្គការសហប្រជាជាតិទៀត។ នេះមិនមែនជារឿងល្អសម្រាប់មុខមាត់រុស្ស៊ី នោះទេ។
ម្យ៉ាង ធ្វើឲ្យរុស្ស៊ីឯកោ បាក់មុខ នៅលើឆាកអន្តរជាតិ នេះក៏ជាយុទ្ធសាស្រ្តការទូតសំខាន់មួយដែររបស់អ៊ុយក្រែន។ ចាប់តាំងពីប្រធានាធិបតី រុស្ស៊ី លោកពូទីនបញ្ជូនទ័ព ធ្វើសង្រ្គាមឈ្លានពានអ៊ុយក្រែន ភាគីអ៊ុយក្រែនបានប្រើគ្រប់វេទិកាអន្តរជាតិ ដើម្បីដើរបញ្ចុះបញ្ចូល សហគមន៍អន្តរជាតិឲ្យថ្កោលទោស ដាក់ទណ្ឌកម្មលើរុស្ស៊ី។ ជាក់ស្តែង ក្រៅពីជំរុញ ឲ្យមហាសន្និបាតអង្គការសហប្រជាជាតិ បោះឆ្នោតចេញសេចក្តីសម្រេច ទាមទារឲ្យរុស្ស៊ី ដកទ័ពចេញជាបន្ទាន់ពីអ៊ុយក្រែន ភាគីអ៊ុយក្រែន កំពុងផ្តើមយុទ្ធនាការការទូតយ៉ាងសកម្មផងដែឬ នៅក្រុមប្រឹក្សាសិទ្ធិមនុស្សនៅទីក្រុងហ្សឺណែវ។
នៅក្រុមប្រឹក្សាសិទ្ធិមនុស្សរបស់អង្គការសហប្រជាជាតិ អ្នកតំណាងទូតអ៊ុយក្រែន ត្រូវបានគេទះដៃស្វាគមនៅពេលលើកនិយាយពីករណីឈ្លានពានរបស់ទ័ពរុស្ស៊ី ក្នុងទឹកដីអ៊ុយក្រែន។ ផ្ទុយពីអ្នកតំណាងរុស្ស៊ី ដែលត្រូវសមាជិកមួយចំនួនបែរខ្នង ដើរចេញ មិនព្រមស្តាប់ នៅពេលឡើងនិយាយនៅក្រុមប្រឹក្សាសិទ្ធិមនុស្ស។ នៅក្រុមប្រឹក្សាសិទ្ធិមនុស្ស ភាគីអ៊ុយក្រែនកំពុងដើរបញ្ចុះបញ្ចូលឲ្យប្រទេសសមាជិកបោះឆ្នោតយល់ព្រមឲ្យអង្គការសហប្រជាជាតិ បើកយន្តការស៊ើបអង្កេតពិសេស ស្តីពីការរំលោភសិទ្ធិមនុស្សរបស់ទាហានរុស្ស៊ី ទៅលើប្រជាជនស៊ីវិលអ៊ុយក្រែន។ និយាយជារួម ទោះអ៊ុយក្រែនមិនសូវមានសមត្ថភាពយោធា ធ្វើឲ្យរុស្ស៊ីចុះចាញ់នៅសមរភូមិប្រយុទ្ធ ប៉ុន្តែ អ៊ុយក្រែន បានប្រើយុទ្ធសាស្រ្តការទូត ដើម្បីធ្វើឲ្យរុស្ស៊ីចុះទ្រុឌទ្រោម ជាប់ទណ្ឌកម្ម សេដ្ឋកិច្ច និងបាក់មុខមាត់ ឯកោនៅលើឆាកអន្តរជាតិ។
ក្នុងករណីសង្រ្គាមអ៊ុយក្រែន ហេតុអ្វីរដ្ឋអាជ្ញាតុលាការព្រហ្មទណ្ឌអន្តរជាតិសម្រេចលឿន ដើម្បីបើកការស៊ើបអង្កេត?
ក្រៅតែពីឯកោនៅឆាកអន្តរជាតិ រុស្ស៊ីក៏កំពុងប្រឈមនឹងសំណាញ់ច្បាប់មួយទៀត នៅបន្ទាប់ពីរដ្ឋអាជ្ញានៃតុលាការព្រហ្មទណ្ឌអន្តរជាតិបានប្រកាស កាលពីថ្ងៃពុធទី ២ មីនា បើកការស៊ើបអង្កេតជាផ្លូវការ លើឧក្រិដ្ឋកម្មសង្រ្គាមនៅទឹកដីអ៊ុយក្រែន។
កន្លងមក ដើម្បីបើកការស៊ើបអង្កេតលើករណីឧក្រិដ្ឋកម្មសង្រ្គាម ឬសង្រ្គាមប្រឆាំងមនុស្សជាតិ គេត្រូវការចំណាយពេលវេលាយូរណាស់។ ជាក់ស្តែង រដ្ឋអាជ្ញាត្រូវដាក់ពាក្យសុំការអនុញ្ញាតពីចៅក្រមរបស់តុលាការព្រហ្មទណ្ឌអន្តរជាតិជាមុនសិន ទើបអាច បើកការស៊ើបអង្កេតណាមួយបាន។ ទម្រាំចៅក្រមឆ្លើយមកយ៉ាងណានោះ គឺត្រូវរង់ចាំយូររាប់ខែ ឬរាប់ឆ្នាំ។
ប៉ុន្តែ សម្រាប់ករណី សង្រ្គាមនៅអ៊ុយក្រែន ដំណើរការស៊ើបអង្កេតបានចាប់ផ្តើមលឿនពីព្រោះថា រដ្ឋអាជ្ញានៃតុលាការព្រហ្មទណ្ឌអន្តរជាតិ លោកKarim Khan មិនចាំបាច់រង់ចាំភ្លើងខៀវពីចៅក្រម។ មិនចាំបាច់សុំការអនុញ្ញាតពីចៅក្រមដោយមកតែមានប្រទេសសមាជិករបស់តុលាការព្រហ្មទណ្ឌអន្តរជាតិ យ៉ាងហោច ៣៩ប្រទេស បានដាក់ពាក្យស្នើសុំឲ្យបើកការស៊ើបអង្កេតជាបន្ទាន់។ ការស្នើសុំពីប្រទេសសមាជិក គឺជាលក្ខខណ្ឌតម្រូវឲ្យបើកការស៊ើបអង្កេត ដោយមិនចាំបាច់មានការសុំអនុញ្ញាតពីចៅក្រម។
ការងារបន្ទាប់របស់ការិយាល័យរដ្ឋអាជ្ញាតុលាការព្រហ្មទណ្ឌអន្តរជាតិ គឺត្រូវស៊ើបអង្កេតទៅលើសង្រ្គាមប្រព្រឹត្តនៅក្នុងទឹកដីអ៊ុយក្រែន តាំងពីឆ្នាំ ២០១៣ ពោលគឺនៅមុនពេលរុស្ស៊ីកាត់យកទឹកដីគ្រីមេរបស់អ៊ុយក្រែន។ តាមរដ្ឋអាជ្ញាតុលាការព្រហ្មទណ្ឌអន្តរជាតិ ការស៊ើបអង្កេតរបស់លោកនឹងផ្តោតទៅលើបទសង្ស័យ ឧក្រិដ្ឋកម្មសង្រ្គាម អំពើប្រល័យពូជសាសន៍ និង ឧក្រិដ្ឋកម្មប្រឆាំងមនុស្សជាតិ នៅទឹកដីអ៊ុយក្រែន។
សេចក្តីរាយការណ៍របស់អង្គការសហប្រជាជាតិ និងអង្គការសិទ្ធិមនុស្សបានលើកឡើងពីការបាត់បង់ជីវិតប្រជាជនស៊ីវិល ជាង នៅក្នុងការវាយប្រហាររបស់កងទ័ពរុស្ស៊ី នៅមួយសប្តាហ៍មកនេះ។
រុស្ស៊ីដកខ្លួនលែងជាសមាជិករបស់តុលាការព្រហ្មទណ្ឌអន្តរជាតិ នៅឆ្នាំ ២០១៦
អ៊ុយក្រែនមិនមែនជាសមាជិក មិនបានចុះហត្ថលេខីលើលក្ខន្តិកៈក្រុងរ៉ូម ស្តីពីការបង្កើតតុលាការព្រហ្មទណ្ឌមែន ប៉ុន្តែ អ៊ុយក្រែនបានទទួលស្គាល់ ដែនសមត្ថកិច្ចរបស់តុលាការព្រហ្មទណ្ឌអន្តរជាតិ នៅឆ្នាំ ២០១៤ ដើម្បីបើកផ្លូវឲ្យតុលាការព្រហ្មទណ្ឌអន្តរជាតិ បើកការស៊ើបអង្កេតលើឧក្រិដ្ឋកម្មប្រឆាំងមនុស្សជាតិដែលអាចកើតមាននៅក្នុងអំឡុងការបង្រ្កាបទៅលើបាតុករក្នុងទីក្រុងកៀវ នៅឆ្នាំ ២០១៣។
ចំណែករុស្ស៊ីវិញ បានដកខ្លួនចេញពីសមាជិករបស់តុលាការព្រហ្មទណ្ឌអន្តរជាតិ នៅឆ្នាំ ២០១៦ បន្ទាប់ពីបានចោទប្រកាន់តុលាការព្រហ្មទណ្ឌអន្តរជាតិលំអៀង នៅពេលបើកការស៊ើបអង្កេតលើឧក្រិដ្ឋកម្មសង្រ្គាមនៅទឹកដីស៊ីរី។
ប៉ុន្តែ ទោះជារុស្ស៊ីដកខ្លួនចេញពី តុលាការព្រហ្មទណ្ឌអន្តរជាតិ ពោលគឺរុស្ស៊ីមិនព្រមបញ្ជូនបុគ្គលដែលអាចជាប់រងការចោទប្រកាន់ក្នុងរឿងប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន ប៉ុន្តែ តុលាការព្រហ្មទណ្ឌអន្តរជាតិនៅតែអាចមានលទ្ធភាព ជំនុំជម្រះជនជាតិរុស្ស៊ី ដែលប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន។ ប៉ុន្តែ លទ្ធភាពនោះ គឺតូចស្តួចស្តើងណាស់ ព្រោះថា ដោយសារតែតុលាការគ្មានប៉ូលិស ទៅចាប់ខ្លួនឧក្រិដ្ឋជនទាំងនោះ នៅក្នុងទឹកដីរុស្ស៊ី តុលាការព្រហ្មទណ្ឌអន្តរជាតិត្រូវពឹងផ្អែកទាំងស្រុង លើជំនួយរបស់ប្រទេសសមាជិករបស់តុលាការ ដើម្បី ចាប់ខ្លួន ជនសង្ស័យរុស្ស៊ី ដែលធ្វើដំណើរទៅក្នុងទឹកដីរបស់ប្រទេសសមាជិករបស់តុលាការព្រហ្មទណ្ឌអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ