ក្បួនរថក្រោះរុស្ស៊ី ប្រវែងចម្ងាយ៦០គីឡូម៉ែត្របែរសំដៅ រដ្ឋធានីរបស់អ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:១១
រុស្ស៊ីនឹងបន្តប្រតិបត្តិការកងទ័ពនៅអ៊ុយក្រែន រហូតដល់ថ្ងៃដែលរុស្ស៊ីអាចសម្រេចតាមគោលដៅចង់បានរបស់ខ្លួន នោះ គឺការការពារខ្លួននៅចំពោះមុខការគំរាមកំហែងរបស់ប្រទេសលោកខាងលិច។ នេះជាប្រសាសន៍របស់រដ្ឋមន្រ្តីការពារជាតិរុស្ស៊ី ដកស្រង់សំដីដោយទីភ្នាក់ងារព័ត៌មានរុស្ស៊ី interfax។ នៅលើសមរភូមិប្រយុទ្ធ រូបភាពផ្កាយរណបបានបង្ហាញ ក្បួនកងទ័ពរុស្ស៊ី ប្រវែងជាង ៦០គីឡូម៉ែត្រកំពុងបើកសំដៅ ទៅកាន់ក្រុងកៀវរបស់អ៊ុយក្រែន នៅថ្ងៃអង្គារ ទី ១មីនា។
ប្រធានាធិបតីអ៊ុយក្រែន លោកហ្សេឡិនស្គីធ្លាប់បាននិយាយថា រដ្ឋធានី កៀវជាគោលដៅវាយប្រហារអាទិភាពរបស់ទ័ពរុស្ស៊ី ដើម្បីអាចចូលក្តោបក្តាប់អ៊ុយក្រែនទាំងស្រុង។ តាមប្រមុខដឹកនាំអ៊ុយក្រែន ចាប់តាំងពីបើកធ្វើសង្រ្គាមឈ្លានពានអ៊ុយក្រែន រុស្ស៊ី ធ្លាប់បានដៅវាយប្រហារ រោងចក្រផលិតអគ្គិសនី ដើម្បីផ្តាច់ចរន្តអគ្គិសនីទីក្រុងកៀវ ដែលមានប្រជាជនរស់នៅ ជាង ៣លាននាក់។
ជាមួយ ក្បួនរថពាសដែក និងរថក្រោះរុស្ស៊ី ដែលមានប្រវែងដល់ទៅ ៦០គីឡូម៉ែត្រ កំពុងបើកសំដៅទីក្រុងកៀវ គេជឿថា រុស្ស៊ីគ្រោងនឹងបើកការវាយប្រហារទ្រង់ទ្រាយធំទៅលើរដ្ឋធានីកៀវ នៅពេលឆាប់ៗខាងមុខនេះ។ នេះជាការបោះជំហានដ៏ធំមួយរបស់កងទ័ពរុស្ស៊ី បន្ទាប់ពីរអាក់រអួល មិនសូវជោគជ័យតាមការដៅទុករបស់ប្រធានាធិបតីរុស្ស៊ី។ តាមទីភ្នាក់ងារចារកិច្ចអង់គ្លេស កងទ័ពថ្មើរជើង រុស្ស៊ីមិនបានបោះជំហានខ្លាំង ទេនៅមួយថ្ងៃចុងក្រោយទេ ដោយសារបញ្ហាទីតាំង និងការវាយទប់ទល់ពីសំណាក់កងទ័ព និងអ្នកតស៊ូអ៊ុយក្រែន។ ប៉ុន្តែ រុស្ស៊ីនៅតែបន្តបាញ់ផ្លោង សំដៅជាយក្រុង កៀវ និងទីក្រុងខាកៀវ ក្រុងធំទី២ របស់អ៊ុយក្រែន។
រដ្ឋអាជ្ញានៃតុលាការព្រហ្មទណ្ឌអន្តរជាតិបានប្រកាសបើកការស៊ើបអង្កេត លើបទសង្ស័យឧក្រិដ្ឋកម្មក្នុងសង្រ្គាមអ៊ុយក្រែន
នៅក្នុងសេចក្តីប្រកាសនៅថ្ងៃចន្ទម្សិលមិញ រដ្ឋអាជ្ញានៃតុលាការព្រហ្មទណ្ឌអន្តរជាតិ លោកKarim Khan បានប្រកាសថា នឹងបើកការស៊ើបអង្កេតលើបទសង្ស័យស្តីពីការប្រព្រឹត្តឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ នៅក្នុងសង្រ្គាមអ៊ុយក្រែន។
នៅសប្តាហ៍មុន នៅក្រោយ រុស្ស៊ីធ្វើសង្រ្គាមឈ្លានពានអ៊ុយក្រែន លោកKarim Khan ធ្លាប់បានសំដែងក្តីបារម្ភ និងបានសន្យាតាមដានជាប់ជានិច្ច ស្ថានការណ៍នៅអ៊ុយក្រែន។
តាមរដ្ឋអាជ្ញាអ៊ុយក្រែន ដោយផ្អែកទៅលើស្ថានការណ៍បច្ចុប្បន្ន នៅអ៊ុយក្រែន គេមានមូលដ្ឋានច្បាស់លាស់ ដើម្បីបើកការស៊ើបអង្កេតទៅលើរាល់បទឧក្រិដ្ឋកម្មសង្រ្គាម និងឧក្រិដ្ឋកម្មប្រឆាំងមនុស្សជាតិ ដែលប្រព្រឹត្តឡើង នៅក្នុងទឹកដីអ៊ុយក្រែន។ កិច្ចការបន្ទាប់ដែលរដ្ឋអាជ្ញាត្រូវធ្វើបន្ត គឺស្រាវជ្រាវប្រមូលភស្តុតាង និងសុំការសម្រេចរបស់ចៅក្រមដើម្បីបើកការស៊ើបអង្កេតជាផ្លូវការ។ តាមធម្មតា ដើម្បីបានការអនុញ្ញាតពីចៅក្រម គឺគេត្រូវចំណាយពេលយូរណាស់ ប៉ុន្តែ គេជឿថា ដំណើរការស៊ើបអង្កេតស្តីពីការប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន អាចដំណើរការទៅលឿន ដោយសារថា លីទុយអានី ដែលជារដ្ឋសមាជិករបស់តុលាការព្រហ្មទណ្ឌអន្តរជាតិ ទើបបានស្នើសុំ កាលពីថ្ងៃចន្ទម្សិលមិញដែរ។
សម្រាប់ ឧបនាយករដ្ឋមន្រ្តីអង់គ្លេស លោក Dominic Raab លោកប្រធានាធិបតីរុស្ស៊ីវ្លាឌីមៀរ ពូទីន និងមេដឹកនាំយោធារុស្ស៊ី ជាច្រើននាក់ផ្សេងទៀត ជាអ្នកទទួលខុសត្រូវផ្ទាល់ក្នុងរឿងរំលោភច្បាប់សង្រ្គាម។ នៅក្នុងបទសម្ភាសន៍ជាមួយទូរទស្សន៍អង់គ្លេស BBC លោកDominic Raab បាននិយាយថា ប្រធានាធិបតីរុស្ស៊ី មេបញ្ជាការ និងកងទ័ពរុស្ស៊ីដែលធ្វើសង្រ្គាមឈ្លានពានអ៊ុយក្រែននឹងអាចរងការចោទប្រកាន់ នៅតុលាការព្រហ្មទណ្ឌអន្តរជាតិ ដែលមានទីតាំងនៅទីក្រុងឡាអេ។ បើសិនតុលាការអន្តរជាតិ សម្រេចចោទប្រកាន់ជាផ្លូវការមែន នោះអង់គ្លេសនឹងត្រៀមខ្លួនផ្តល់ជំនួយផ្នែកច្បាប់ និងមធ្យោបាយនានាដល់តុលាការ។
អង្គការការពារសិទ្ធិមនុស្សដូចជា Human Rights Watch និងAmnesty International បានបរិហាររិះគន់កងទ័ពរុស្ស៊ីថា បានប្រើគ្រាប់បែក បាញ់គ្រាប់ផ្លោងសម្លាប់ប្រជាជនស៊ីវិលអ៊ុយក្រែន។ តាមមេបញ្ជាការកងទ័ពអ៊ុយក្រែន លោកValéri Zaloujny ចាប់តាំងពីបើកសង្រ្គាមឈ្លានពានអ៊ុយក្រែន នៅថ្ងៃទី ២៥កុម្ភៈ រុស្ស៊ីបានបាញ់មីស៊ីល១១៣ដើម សំដៅទីក្រុង និងភូមិអ៊ុយក្រែន ដោយបានសម្លាប់ ប្រជាជនស៊ីវិល៣៥២នាក់ និងរបួស ជាង ២០០០នាក់។ អង្គការសហប្រជាជាតិបានរាប់ឃើញមានប្រជាជនស៊ីវិលអ៊ុយក្រែន ១០២នាក់ដែលស្លាប់នៅក្នុងការវាយប្រហាររបស់កងទ័ពរុស្ស៊ី។
រុស្ស៊ី ដកខ្លួនចេញពីសន្ធិសញ្ញាក្រុងរ៉ូម នៅឆ្នាំ ២០១៦
តុលាការព្រហ្មទណ្ឌអន្តរជាតិដែលមាននៅទីស្នាក់ការនៅទីក្រុងឡាអេ ប្រទេសហូឡង់ ត្រូវបានបង្កើតឡើងនៅ ឆ្នាំ ២០០២ ដើម្បី ជំនុំជម្រះ បទឧក្រិដ្ឋកម្មធំៗនៅក្នុងពិភពលោក។ អ៊ុយក្រែន មិនមែនជាសមាជិក របស់តុលាការព្រហ្មទណ្ឌអន្តរជាតិ ប៉ុន្តែ ធ្លាប់បានទទួលស្គាល់សមត្ថកិច្ចរបស់តុលាការ ព្រហ្មទណ្ឌអន្តរជាតិ នៅឆ្នាំ ២០១៤ សម្រាប់ការស៊ើបអង្កេតលើបទឧក្រិដ្ឋកម្មដែលប្រព្រឹត្តឡើងនៅក្នុងអំឡុងបង្រ្កាបទៅលើបាតុករអ៊ុយក្រែន នៅក្រោមអំណាចរបស់ប្រធានាធិបតី Victor Ianoukovitch និងការស៊ើបអង្កេតលើបទឧក្រិដ្ឋកម្មសង្រ្គាមនៅតំបន់ភាគខាងកើតអ៊ុយក្រែន ដែលគ្រប់គ្រងដោយក្រុមទាមទារផ្តាច់ទឹកដី គាំទ្ររុស្ស៊ី។
ប៉ុន្តែ រុស្ស៊ីវិញ បានដកខ្លួនចេញពីសន្ធិសញ្ញាក្រុងរ៉ូម នៅឆ្នាំ ២០១៦ នៅក្រោយ រដ្ឋអាជ្ញារបស់តុលាការព្រហ្មទណ្ឌអន្តរជាតិបានបើកការស៊ើបអង្កេតបឋមទៅលើការប្រព្រឹត្តឧក្រិដ្ឋកម្មសង្រ្គាមនៅទឹកដីគ្រីមេ ដែលរុស្ស៊ីបានកាត់យកពីអ៊ុយក្រែននៅឆ្នាំ ២០១៤។ ដូចប្រទេសចំនួន ៣៣ផ្សេងទៀត ដែលមានអាមេរិក និងអ៊ីស្រាអែល រុស្ស៊ី លែងជាហត្ថលេខី នៃសន្ធិសញ្ញាក្រុងរ៉ូម។ ដូច្នេះ គេមិនជឿថា តុលាការនឹងអាចមានសមត្ថភាពទៅចាប់ខ្លួន ផ្តន្ទាទោស ប្រធានាធិបតីរុស្ស៊ី នៅក្នុងករណីរកឃើញមានការប្រព្រឹត្តឧក្រិដ្ឋកម្មសង្រ្គាមនៅអ៊ុយក្រែន។
ការស៊ើបអង្កេតរបស់តុលាការព្រហ្មទណ្ឌអន្តរជាតិនឹងអាចទៅបំបាក់មុខមាត់របស់ប្រធានាធិបតីរុស្ស៊ី
លទ្ធផលនៃការស៊ើបអង្កេតរបស់តុលាការដែលនៅក្នុងនោះ គេអាចរកឃើញថា រុស្ស៊ីអាចប្រព្រឹត្តឧក្រិដ្ឋកម្មសង្រ្គាម នៅអ៊ុយក្រែន នឹងមិនអាចជំរុញ ឲ្យមានការកាត់ទោសលោកប្រធានាធិបតីរុស្ស៊ី នៅតុលាការព្រហ្មទណ្ឌអន្តរជាតិ ប៉ុន្តែ វានឹងអាចជួយទៅបំភ្លឺភ្នែកដល់មតិសាធារណៈ ជាពិសេសប្រជាជនរុស្ស៊ីឲ្យដឹងថា មេដឹកនាំរុស្ស៊ីកំពុងធ្វើសង្រ្គាមសម្លាប់មនុស្សនៅទឹកដី អ៊ុយក្រែន។ ការចោទប្រកាន់ណាមួយនៅតុលាការព្រហ្មទណ្ឌអន្តរជាតិនឹងផ្តល់រូបភាពមិនល្អរបស់ប្រធានាធិបតីរុស្ស៊ី។
គេសង្ឃឹមថា ចំណាត់ការនៅតុលាការព្រហ្មទណ្ឌអន្តរជាតិ នឹងជួយសំខាន់បំផុត ទៅបញ្ចុះបញ្ចូលឲ្យមេដឹកនាំរុស្ស៊ី បញ្ឈប់មុនគេបំផុត ការធ្វើសង្រ្គាមនៅអ៊ុយក្រែន។ ប៉ុន្តែ លទ្ធផលជាក់ស្តែង យ៉ាងណានោះ គឺអាស្រ័យទៅលើមេដឹកនាំរុស្ស៊ី លោកប្រធានាធិបតីរុស្ស៊ី ពូទីនតែម្តង ដែលរហូតមកដល់ពេលនេះ ហាក់ដូចជាគ្មានខ្លាចរអែង អ្វីសោះ កុំថាឡើយ ការស៊ើបអង្កេតរបស់តុលាការព្រហ្មទណ្ឌអន្តរជាតិ សូម្បីតែការដាក់ទណ្ឌកម្មសេដ្ឋកិច្ចរបស់ប្រទេសលោកខាងលិចដែលកំពុងធ្វើឲ្យសេដ្ឋកិច្ចរុស្ស៊ី ធ្លាក់ដាំក្បាលចុះ ក៏មិនបានជំរុញចិត្តឲ្យមេដឹកនាំរុស្ស៊ី ឲ្យឈប់ធ្វើសង្រ្គាមវាយប្រហារអ៊ុយក្រែនដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ