មុនអស់អំណាចលោកអូបាម៉ាឆ្លៀត បង្កើតច្បាប់ដើម្បីខ្ទាស់ជើងលោកត្រាំ
ចុះផ្សាយនៅថ្ងៃ៖
ស្តាប់ - ០៦:០៧
លោកបារ៉ាក់ អូបាម៉ា នៅថ្ងៃអង្គារ បានចេញអនុក្រឹត្យមួយ ដែលសំដៅហាមឃាត់ ជារៀងរហូត មិនឲ្យមានការជីកខួង ធ្វើអាជីវកម្មប្រេង និងឧស្ម័ន ក្នុងមហាសមុទ្រទឹកកកអាក់ទិក ហើយនិងអាត្លង់ទិក។ អនុក្រឹត្យរបស់លោកអូបាម៉ា បានរងការរិះគន់ខ្លាំងពីក្រុមហ៊ុនធ្វើអាជីវកម្មប្រេងនៅអាមេរិក ដែលបានសង្ឃឹមរួចហើយ ថា អនាគតប្រធានាធិបតី លោកដូណាល់ ត្រាំ នឹងសើរើ លុបចោលអនុក្រឹត្យ របស់លោកអូបាម៉ា ដើម្បីជំរុញអាជីវកម្មប្រេង ដែលលោកត្រាំ ធ្លាប់សន្យា ក្នុងយុទ្ធនាការឃោសនាការបោះឆ្នោតកន្លងមក។ តើអនុក្រឹត្យ ការពារបរិស្ថានរបស់លោកអូបាម៉ានឹងអាចមានជីវិតដែរឬទេ នៅក្នុងអាណត្តិរបស់លោកដូណាល់ ត្រាំ?
លោកប្រធានាធិបតីអាមេរិក បារ៉ាក់ អូបាម៉ា ដែលបានជ្រើសរើសយកការការពារបរិស្ថានជានយោបាយអាទិភាពក្នុងអាណត្តិរបស់លោក បានចេញអនុក្រឹត្យ មួយ ដែលមានគោលដៅ ហាមឃាត់ មិនឲ្យគេជីកខួង ធ្វើអាជីវកម្មប្រេង និងឧស្ម័ន ជារៀងរហូត ក្នុងដែនទឹកអាមេរិក នៅមហាសមុទ្រទឹកកកអាក់ទិក ហើយនិងនៅមហាសមុទ្រអាត្លង់ទិក។
“អនុក្រឹត្យនឹងជួយការពារបរិស្ថាន និងជីវសាស្រ្ត នៅតំបន់ប៉ូលខាងជើង” នេះបើតាមការពន្យល់របស់លោកអូបាម៉ា នៅក្នុងសេចក្តីប្រកាសព័ត៌មានកាលពីថ្ងៃអង្គារ។ ទៅតាម អនុក្រឹត្យរបស់ប្រធានាធិបតី រាល់ការជីកធ្វើអាជីវកម្មថ្មី នៅក្នុងតំបន់ទឹកអាមេរិក ក្បែររដ្ឋអាឡាស្កា ក្នុងមហាសមុទ្រទឹកកកអាក់ទិក នឹងត្រូវគេហាមឃាត់មិនឲ្យមានជារៀងរហូត។
កន្លងមក លោកអូបាម៉ាធ្លាប់បានព្រលយឲ្យដឹងពីបំណងរបស់លោក ដើម្បីបង្កើតតំបន់ការពារបរិស្ថាន នៅមហាសមុទ្រទឹកកកអាក់ទិក។ ប៉ុន្តែ អ្វីដែលថ្មី នៅពេលនេះ គឺលោកបានដាក់ពាក្យថា ជារៀងរហូត មិនឲ្យគេជីកធ្វើអាជីវកម្មប្រេងនៅក្នុងដែនសមុទ្រអាមេរិក ក្នុងមហាសមុទ្រអាក់ទិក។ ទៅតាមអនុក្រឹត្យ តំបន់ដែលគេហាមមិនឲ្យមានជីកអណ្តូង ខួងធ្វើអាជីវកម្មប្រេង និងឧស្ម័ន មានទំហំ ៥០លានហិចតា។ សម្រាប់លោកអូបាម៉ា វិធានការមួយនេះធ្វើឡើងដើម្បីការពារបរិស្ថានធម្មជាតិ ការពារជីវិតសត្វ ទាំងនៅក្នុងទឹក និងលើទឹកកកអាក់ទិក ដែលកំពុងឈានទៅរកការវិនាសផុតពូជ ដូចជាខ្លាឃ្មុំសជាដើម។
នៅភាគីកាណាដា នាយករដ្ឋមន្រ្តីលោកចាស្ទីន ទ្រុយដូរសរសេរនៅក្នុងTwitterថា កាណាដាបានប្រកាសជាមួយអាមេរិកចាត់វិធានការការពារជីវិតជីវសាស្រ្តនៅក្នុងមហាសមុទ្រអាក់ទិក។ ខុសពី អាមេរិកដែលបានហាមជារៀងរហូត កាណាដាបានបង្កើតច្បាប់ហាមឃាត់មិនឲ្យជីករុករក ប្រេង នៅអាក់ទិក ដែលមានអាយុ ត្រឹម ៥ឆ្នាំ។ មានន័យថា នៅក្រោយ៥ឆ្នាំ គេអាចពិចារណា ឡើងវិញថា តើត្រូវបន្តការហាមឃាត់ដែរឬទេ។
បើតាមលោកអូបាម៉ា គេត្រូវបង្កើតតំបន់អភិរក្ស ក្នុងតំបន់ទឹកកកអាក់ទិក ព្រោះថា បទពិសោធន៍កន្លងមកបង្ហាញថា កំហុសរបស់មនុស្ស ដែលធ្វើឲ្យលេចធ្លាយប្រេង នៅក្នុងពេលជីកប្រេង បានសម្លាប់ជីវិតសត្វ និងបំពុលបរិស្ថានយ៉ាងធ្ងន់ធ្ងរ។
អនុក្រឹត្យដែលប៉ះពាល់ប្រយោជន៍ក្រុមហ៊ុនមិត្តភក្តិរបស់លោកអនាគតប្រធានាធិបតីដូណាល់ ត្រាំ
អនុក្រឹត្យរបស់លោកអូបាម៉ា បានទទួលការស្វាគមច្រើនពីក្រុមអ្នកការពារបរិស្ថាន ប៉ុន្តែ ជាមួយគ្នានោះ ក៏រងការរិះគន់ខ្លាំងណាស់ដែរពីក្រុមហ៊ុនប្រេងនៅអាមេរិក។ ចង់ ឬមិនចង់ អនុក្រឹត្យរបស់លោកអូបាម៉ា ដែលចង់បង្កើតតំបន់ការពារ មិនឲ្យគេជីករកប្រេង នៅអាក់ទិក ពិតជាប៉ះពាល់ខ្លាំងមុនគេដល់ក្រុមហ៊ុនឯកជនដែលជាគ្នីគ្នារបស់លោកត្រាំ ជាពិសេស អនាគត ប្រមុខការទូតអាមេរិកផ្ទាល់ គឺ លោកRex Tillerson ដែលជាមហាសេដ្ឋីប្រេង និងដែលកំពុងសហការ ជាមួយក្រុមហ៊ុនឧស្ម័នរុស្ស៊ី ដើម្បីជីករកប្រេង និងឧស្ម័ន នៅក្នុងមហាសមុទ្រអាក់ទិក ក្នុងដែលទឹករបស់រុស្ស៊ី។
វិទ្យាស្ថានប្រេងអាមេរិក វិញដែលតំណាងឲ្យផលប្រយោជន៍ឧស្សាហកម្មប្រេង នៅអាមេរិក បានបន្ទោសលោកអូបាម៉ាដែលបានបង្កើតចេញច្បាប់ ដោយប្រថុចញ៉ុច គ្មានបានគិតគូរពិចារណាឲ្យបានម៉ត់ចត់ពីផលប្រយោជន៍សេដ្ឋកិច្ចអាមេរិក។ តាមវិទ្យាស្ថានប្រេងអាមេរិក អនុក្រឹត្យរបស់លោកអូបាម៉ា ដែលបិទហាមមិនឲ្យគេធ្វើអាជីវកម្មនៅមហាសមុទ្រអាក់ទឹក មិនត្រឹមតែបំផ្លាញការងារធ្វើរបស់ប្រជាជនអាមេរិកាំងតែប៉ុណ្ណោះទេ ប៉ុន្តែ វានឹងធ្វើឲ្យអាមេរិកនៅតែពឹងផ្អែកទៅលើការផ្គត់ផ្គង់ថាមពលពីបរទេស។
ទៅតាមការវាយតម្លៃរបស់ក្រុមហ៊ុនអាមេរិកាំង តំបន់អាក់ទឹក ក្នុងដែនគ្រប់គ្រងរបស់អាមេរិក មានសក្តានុពលផ្គត់ផ្គង់ប្រេងប្រមាណ ២៧ពាន់លានបារ៉ីល និងមានឧស្ម័ន ធម្មជាតិក្រោមទឹកកក ប្រមាណ ១៣២ពាន់ពាន់ ពាន់លានម៉ែត្រគូប។ ក្រុមហ៊ុនប្រេងអាមេរិករំពឹងថា នឹងយកប្រេងនិង ឧស្ម័នទាំងនេះ នឹងដើម្បីជំរុញសេដ្ឋកិច្ចអាមេរិក។
តើអនុក្រឹត្យ ការពារបរិស្ថានរបស់លោកអូបាម៉ានឹងអាចមានជីវិតរស់ដែរឬទេ នៅក្នុងអាណត្តិរបស់លោកដូណាល់ ត្រាំ
អនុក្រឹត្យរបស់លោកអូបាម៉ា គឺប្រៀបបាននឹងឆ្អឹងទទឹង ក ដែលលោកបានបន្សល់ទុកឲ្យដូណាល់ ត្រាំ។ នៅតែមួយខែទៀតប៉ុណ្ណោះ លោកអូបាម៉ា នឹងដើរចេញពីសេតវិមាន អស់អំណាចជាប្រធានាធិបតី។ ដូច្នេះ ក្នុងពេលមួយខែចុងក្រោយ ដែលលោកនៅជាប្រធានាធិបតីអាមេរិកនៅឡើយ លោកអូបាម៉ាខំឆ្លៀតពេល ដើម្បីចេញអនុក្រឹត្យការពារបរិស្ថាន ឲ្យរួចផុតពីមហិច្ឆតា កណ្តាប់ដៃក្រុមហ៊ុនប្រេង ដែលភាគច្រើន ជាមិត្តរបស់អនាគតប្រធានាធិបតីដូណាល់ ត្រាំ។
លោកអូបាម៉ាដឹងច្បាស់ថា បើលោកមិនចេញអនុក្រឹត្យនៅពេលនេះ នោះលោកដូណាល់ ត្រាំ ដែលមិនខ្វល់នឹងរឿងបរិស្ថាន និងដែលធ្លាប់សន្យាជំរុញការធ្វើអាជីវកម្មប្រេង ច្បាស់ជាចេញច្បាប់ឲ្យក្រុមហ៊ុនប្រេងធ្វើខួងរុករកប្រេង និងឧស្ម័ន នៅតំបន់អាក់ទិកមិនខាន។លោកអូបាម៉ា ចេញអនុក្រឹត្យបិទផ្លូវ ហាមមិនឲ្យគេជីក ធ្វើអាជីវកម្មរ៉ែ គឺមិនខុសអីពីនយោបាយដាល់ចំកណ្តាលមុខរបស់អនាគតលោកដូណាល់ ត្រាំនោះទេ។ លោកត្រាំធ្លាប់បានសន្យាម្តងហើយ ម្តងទៀត ថា នឹងលុបចោល បម្រាមរបស់លោកអូបាម៉ា កន្លងមក ដែលបានរារាំង ក្រុមហ៊ុនអាមេរិកមិនឲ្យធ្វើអាជីវកម្មប្រេង ក្នុងហេតុផលការពារបរិស្ថាន។
វិទ្យាសា្ថនប្រេងអាមេរិកបាននិយាយរួចហើយថា គេនឹងប្តឹង និងទាមទារឲ្យអនាគតប្រធានាធិបតីអាមេរិក លោកដូណាល់ ត្រាំ លុបចោលអនុក្រឹត្យរបស់លោកអូបាម៉ា។ ប៉ុន្តែ បើតាមអ្នកជំនាញជាច្រើន អនាគតប្រធានាធិបតី លោកត្រាំ ដែលសន្យាជំរុញអាជីវកម្មប្រេង នៅអាមេរិក គឺមិនងាយនឹងអាចសើរើ លុបចោលអនុក្រឹត្យរបស់លោកអូបាម៉ាបានទេ ព្រោះថា លោកអូបាម៉ា បានបង្កើតអនុក្រឹត្យនេះ ដោយយោងទៅលើច្បាប់អាមេរិក ឆ្នាំ ១៩៥៣ ដែលបានអនុញ្ញាតឲ្យប្រធានាធិបតីមានសិទ្ធិបង្កើតតំបន់ការពារ ក្នុងសមុទ្រ។
ដោយសារតែអនុក្រឹត្យត្រូវបង្កើតឡើងទៅតាមច្បាប់ ដូច្នេះ បើសិនលោកត្រាំចង់សើរើ នោះលោកត្រាំត្រូវតែឆ្លងកាត់ការប្តឹងផ្តល់នៅតុលាការ ពោលគឺគ្មានសិទ្ធិចេញអនុក្រឹត្យថ្មី ដើម្បីលុបចោលអនុក្រឹត្យចាស់របស់លោកអូបាម៉ាបាននោះទេ។ ក្នុងប្រវត្តិសាស្រ្តអាមេរិក វាកម្រណាស់ ដែលប្រធានាធិបតីអាចតវ៉ា សើរើចង់លុបចោលអនុក្រឹត្យរបស់ប្រធានាធិបតីមុន ព្រោះថា ដើម្បីធ្វើដូច្នេះ គឺត្រូវឆ្លងកាត់ការប្តឹងផ្តល់តាមផ្លូវតុលាការ។ ម្យ៉ាងទៀត ការប្តឹងផ្តល់ ដើម្បីឈានទៅលុបចោលអនុក្រឹត្យរបស់លោកអូបាម៉ា ទំនងជានឹងមិនធ្វើនៅពេលឆាប់ៗខាងមុខទេ ព្រោះថា ខួងអណ្តូងប្រេងនៅមហាសមុទ្រអាក់ទិក តាមពិតទៅមិនសូវជាសំខាន់ និងអាទិភាពនោះទេ។ គេបានប៉ាន់ស្មានថា ការជីករុករកប្រេងនៅមហាសមុទ្រអាក់ទិក គឺ ថ្លៃ មិនចំណេញ ហើយនិងពិបាកខួង ជាងក្នុងទឹកធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ