ហេតុអ្វីបានជាអាមេរិកហាមឃាត់ការនាំប្រេងចេញទៅលក់នៅក្រៅប្រទេស?
ចុះផ្សាយនៅថ្ងៃ៖
ស្តាប់ - ០៤:១៤
កាលពីដើមសប្តាហ៍នេះ រដ្ឋាភិបាលអាមេរិកទើបនឹងបានសម្រេចបន្ធូរបន្ថយមកវិញ នូវការហាមឃាត់ការនាំប្រេងអាមេរិកទៅលក់នៅក្រៅប្រទេស។ បម្រាម ដែលបានដាក់ចេញ អស់រយៈពេលជិត ៤០ឆ្នាំមកហើយ។ តើមានដើមហេតុអ្វីខ្លះ ដែលនាំឲ្យអាមេរិកដាក់បម្រាមលើការនាំចេញប្រេងទៅក្រៅប្រទេសបែបនេះ?
សហរដ្ឋអាមេរិក គឺជាប្រទេសផលិតប្រេងច្រើនជាងគេលំដាប់ទី៣នៅលើពិភពលោក បន្ទាប់ពីរុស្ស៊ី និងអារ៉ាប៊ីសាអ៊ូឌីត។ ក៏ប៉ុន្តែ អស់រយៈពេលប្រមាណជា ៤០ឆ្នាំមកហើយ ដែលអាមេរិកបានដាក់ច្បាប់ហាមឃាត់មិនឲ្យនាំប្រេងចេញទៅក្រៅប្រទេស ដោយទុកប្រេងរបស់ខ្លួន សម្រាប់តែការប្រើប្រាស់ក្នុងស្រុក។ ការហាមឃាត់ការនាំចេញប្រេងទៅបរទេសត្រូវបានដាក់ នៅពាក់កណ្តាលទសវត្សរ៍ឆ្នាំ១៩៧០ នៅក្រោយពីមានវិបត្តិទីផ្សារប្រេងពិភពលោក នៅឆ្នាំ១៩៧៣។
អ្វីៗបានចាប់ផ្តើមឡើង នៅខែតុលា ឆ្នាំ១៩៧៣ នៅពេលដែលស៊ីរី និងអេហ្ស៊ីប ដោយមានការគាំទ្រពីបណ្តាប្រទេសអារ៉ាប់ បានបើកការវាយប្រហារទៅលើអ៊ីស្រាអែល បណ្តាលឲ្យមានសង្រ្គាមសាជាថ្មី រវាងអ៊ីស្រាអែល និងអារ៉ាប់ ដែលគេឲ្យឈ្មោះថា សង្រ្គាមយ៉ុមគីពួរ (Yom Kippour)។ សង្រ្គាមនេះបានបណ្តាលឲ្យទីផ្សារប្រេងអន្តរជាតិត្រូវរំជើបរំជួលរួចទៅហើយ។ បន្ថែមពីលើនេះទៅទៀត បណ្តាប្រទេសអារ៉ាប់ ដែលសម្បូរប្រេង បានមូលមាត់គ្នាសម្រេចដំឡើងថ្លៃប្រេង ព្រមទាំងកាត់បន្ថយការនាំចេញប្រេងឆៅ ដើម្បីជាការឆ្លើយតបទៅនឹងការលូកដៃរបស់សហរដ្ឋអាមេរិក ដែលចូលជួយអ៊ីស្រាអែល នៅក្នុងសង្រ្គាមយ៉ុមគីពួរនេះ។ តម្លៃប្រេងឆៅនៅលើទីផ្សារអន្តរជាតិក៏បានកើនឡើង ១គុណនឹង៤ បង្កជាផលប៉ះពាល់យ៉ាងធ្ងន់ធ្ងរទៅដល់សេដ្ឋកិច្ចរបស់អាមេរិក និងសម្ព័ន្ធមិត្ត។
វិបត្តិទីផ្សារប្រេងនៅពេលនោះបានធ្វើឲ្យអាមេរិកភ្ញាក់ដឹងខ្លួន អំពីចំណុចខ្សោយរបស់អាមេរិក ក្នុងការប្រឈមមុខនឹងប្រទេសដែលយកប្រេងធ្វើជាអាវុធ។ ហេតុដូច្នេះហើយបានជាអាមេរិកខិតខំបង្កើនសកម្មភាពបូមប្រេង ដែលមានលើនៅលើទឹកដីខ្លួនឯង ប៉ុន្តែ បានដាក់ចេញនូវនយោបាយមួយថា ប្រេងនៅលើទឹកដីអាមេរិកទុកសម្រាប់តែប្រើប្រាស់ផ្ទាល់ខ្លួនតែប៉ុណ្ណោះ ដោយមិនអនុញ្ញាតឲ្យមានប្រេងមួយតំណក់ណាត្រូវនាំចេញទៅក្រៅប្រទេសនោះទេ។
ប៉ុន្តែ ការហាមឃាត់ការនាំចេញប្រេងនេះធ្វើឡើង សម្រាប់តែប្រេងឆៅប៉ុណ្ណោះ។ ចំណែកផលិតផលប្រេងដែលចម្រាញ់ចេញពីប្រេងឆៅវិញ ដូចជា ប្រេងសាំង ឬប្រេងយន្តហោះ ជាដើម គេអាចនាំចេញទៅលក់នៅក្រៅប្រទេសបាន។ ម្យ៉ាងទៀត ការហាមឃាត់ការនាំចេញប្រេងឆៅត្រូវលើកលែងចំពោះការនាំចេញទៅកាន់ប្រទេសកាណាដា។
ប្រមាណជា ៤០ឆ្នាំក្រោយវិបត្តិទីផ្សារប្រេងពិភពលោក ហើយនៅក្នុងពេលដែលទីផ្សារប្រេងអន្តរជាតិកំពុងតែមានភាពរំជើបរំជួលដោយសារវិបត្តិនៅអ៊ីរ៉ាក់ បម្រាមនាំចេញប្រេងហាក់ដូចជាត្រូវបានរដ្ឋាភិបាលរបស់លោកអូបាម៉ាបន្ធូរបន្ថយមកវិញបន្តិច ដោយក្រសួងពាណិជ្ជកម្មអាមេរិកទើបនឹងបានផ្តល់ការអនុញ្ញាតឲ្យក្រុមហ៊ុនប្រេងអាមេរិកមួយ ដែលមានមូលដ្ឋាននៅក្នុងរដ្ឋតិចសាស់ ធ្វើការនាំចេញប្រេងរបស់អាមេរិក។
អ្នកជំនាញខាងទីផ្សារប្រេងយល់ថា វិធានការរបស់រដ្ឋាភិបាលលោកអូបាម៉ានៅពេលនេះ អាចជាជំហានមួយ ដែលអាចឈានទៅការបើកផ្លូវកាន់តែធំ សម្រាប់ការនាំចេញប្រេងអាមេរិក ទៅលក់នៅក្រៅប្រទេស។ គេបានព្យាករថា ចាប់ពីពេលនេះទៅដល់ចុងឆ្នាំ២០១៤ អាមេរិកអាចនឹងនាំចេញប្រេងប្រមាណពី ២០ម៉ឺន ទៅ៣០ម៉ឺនធុងក្នុងមួយថ្ងៃ ហើយបរិមាណនាំចេញនេះអាចនឹងកើនឡើងមួយទ្វេជាពីរ នៅក្នុងឆ្នាំ២០១៥ខាងមុខ។ នេះ គឺជាដំណឹងល្អមួយ សម្រាប់ក្រុមហ៊ុនប្រេងរបស់អាមេរិក ប៉ុន្តែ សម្រាប់អ្នកផ្សេងទៀត រួមមាន រោងចក្រសហគ្រាស ព្រមទាំងប្រជាជនអាមេរិកទូទៅ វាអាចជារឿងដែលគួរឲ្យបារម្ភទៅវិញ ក្នុងហេតុផលថា នៅពេលណា ដែលមានការបើកទូលាយឲ្យមានការនាំចេញប្រេងអាមេរិក ទៅលក់នៅក្រៅប្រទេស តម្លៃប្រេងនៅអាមេរិកអាចនឹងមានការកើនឡើង។
គួរបញ្ជាក់ថា ជាទូទៅ ប្រេងឆៅនៅក្នុងទីផ្សារអាមេរិកមានតម្លៃទាបជាងទីផ្សារអន្តរជាតិ រហូតដល់ទៅជាង ៨ដុល្លារក្នុងមួយធុង។ កាលពីថ្ងៃពុធ គ្រាន់តែមានការចុះផ្សាយព័ត៌មានជុំវិញការអនុញ្ញាតឲ្យក្រុមហ៊ុនអាមេរិកតែមួយ នាំប្រេងទៅលក់នៅក្រៅប្រទេស តម្លៃប្រេងឆៅ នៅក្នុងទីផ្សារអាមេរិកក៏ស្រាប់តែកើនឡើងភ្លាមៗដែរ។ ផ្ទុយទៅវិញ តម្លៃប្រេងឆៅ នៅក្នុងទីផ្សារអឺរ៉ុបបែរជាបានធ្លាក់ចុះវិញបន្តិច ក្រោយពីបានកើនឡើងជាច្រើនថ្ងៃកន្លងទៅ ដោយសារតែវិបត្តិនៅក្នុងប្រទេសអ៊ីរ៉ាក់។
បច្ចុប្បន្ននេះ នៅក្នុងទីផ្សារប្រេងអន្តរជាតិ គេកំពុងតែមានការព្រួយបារម្ភខ្លាចក្រុមជីហាតអ៊ីរ៉ាក់វាយកាន់កាប់អណ្តូងប្រេង ឬកាត់ផ្តាច់ផ្លូវដឹកប្រេង ដែលជាហេតុធ្វើឲ្យសកម្មភាពបូមប្រេងនៅអ៊ីរ៉ាក់ត្រូវគាំងដំណើរការ ដែលជាហេតុធ្វើឲ្យការផ្គត់ផ្គង់ប្រេងឆៅ នៅលើទីផ្សារអន្តរជាតិមានការថយចុះ ហើយតម្លៃប្រេងឆៅនឹងត្រូវកើនឡើងខ្លាំង។
ហេតុដូច្នេះហើយបានជាដំណឹងស្តីពីការបន្ធូរបន្ថយការហាមឃាត់ការនាំចេញប្រេងអាមេរិក បើទោះបីជាមិនមានការលុបចោលបម្រាមទាំងស្រុង ក៏ប៉ុន្តែ ក៏អាចជាដំណឹងល្អមួយដែរ ជាពិសេស ចំពោះប្រទេសដែលពឹងផ្អែកខ្លាំងលើការនាំចូលប្រេងពីបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ