អង្គការហាមឃាត់អាវុធគីមី ជ័យលាភីរង្វាន់ណូបែលសន្តិភាព២០១៣
ចុះផ្សាយនៅថ្ងៃ៖
ពានរង្វាន់ណូបែលសន្តិភាព ឆ្នាំ២០១៣ ត្រូវបានប្រគល់ទៅឲ្យអង្គការទទួលបន្ទុកខាងហាមឃាត់អាវុធគីមី ដែលកំពុងបំពេញបេសកកម្មកម្ទេចអាវុធគីមី នៅស៊ីរី។ ពីដំបូង គ្រប់គ្នាបានសំឡឹងឃើញថា អ្នកដែលគួរត្រូវទទួលរង្វាន់ណូបែលសន្តិភាពនេះ គឺកុមារី ម៉ាឡាឡា។
ណូបែលសន្តិភាព ជារង្វាន់ដែលពិភពលោករង់ចាំ និងតាមដានខ្លាំងជាងគេ។ តាំងពីដើមសប្តាហ៍មក និងរហូតមកទល់នឹងព្រឹកមិញនេះទៀត អ្នកវិភាគ អ្នកតាមដាន និងគ្រប់កាសែត បាននិយាយគ្មានដាច់ពីមាត់ ថាបេក្ខភាពកុមារី ប៉ាគីស្ថាន ម៉ាឡាឡា មានប្រជាប្រិយភាព និងសំណាងខ្លាំងព្រមទាំងសក្តិសមជាងគេបំផុតក្នុងការទទួលបានជ័យលាភីរង្វាន់ណូបែលសន្តិភាពឆ្នាំ២០១៣នេះព្រោះបានតស៊ូស្ទើរវិះនឹងស្លាប់បាត់បង់ជីវិតទៅផង ដើម្បីការពារនិងទាមទារសិទ្ធិទទួលចំណេះដឹងឱ្យកុមារីប៉ាគីស្ថាន។
ប៉ុន្តែ គណៈកម្មាធិការណូបែល បានជ្រើសរើស ការភ្ញាក់ផ្អើលដោយប្រកាសប្រគល់ជ័យលាភីឆ្នាំ២០១៣ ទៅឱ្យអង្គការទទួលបន្ទុកខាងហាមឃាត់អាវុធគីមី ដែលកំពុងបំពេញបេសកកម្មកម្ទេចអាវុធគីមីនៅប្រទេសស៊ីរី និងមិនធ្វើអត្ថាធិប្បាយអ្វីទាក់ទងនឹងបេក្ខជនមិនជាប់ជម្រើសទេ។
ទោះជាមិនបានទទួលជ័យលាភីនេះយ៉ាងណាក៏ដោយ ក៏ចំពោះនាងម៉ាឡាឡា មានបានទទួលការគាំទ្រ និងកត្តិយសល្បីរន្ទឺស្រេចទៅហើយ ! លើសពីនេះទៅទៀត នៅថ្ងៃព្រហស្បតិ៍ម្សិលមិញ នាងបានទទួលរង្វាន់ពីសភាអឺរ៉ុប ដែលមានឈ្មោះថា សាការ៉ូហ្វ ក្នុងបុព្វហេតុសេរីភាពនៃការគិត។ មុនការប្រកាសលទ្ធផលណូបែលសន្តិភាពបន្តិច នាងម៉ាឡាឡា បានអះអាងថា មិនបានជ័យលាភីក៏មិនសំខាន់ទេ ព្រោះបំណងប្រាថា្នរបស់នាងគឺចង់ឃើញសន្តិភាព និងឃើញគ្រប់ក្មេងទាំងអស់បានរៀនសូត្រ"។
តើអង្គការទទួលបន្ទុកខាងហាមឃាត់អាវុធគីមី មានប្រវត្តិនិងស្នាដៃយ៉ាងណាខ្លះ ?!
អង្គការទទួលបន្ទុកខាងហាមឃាត់អាវុធគីមី ហៅកាត់ជាភាសាបារាំង OIAC ឬOPCWជាភាសាអង់គ្លេស គ្មានឈ្មោះបោះសំឡេង និងមិនសូវមានអ្នកស្គាល់ជាសាធារណៈទេ។ ទើបតែមានការសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ ថ្ងៃទី ២៨កញ្ញា ប្រគល់ភារកិច្ច ឱ្យអង្គការនេះ ទទួលបន្ទុកកម្ទេចអាវុធគីមីនៅស៊ីរី ពីពេលនេះដល់ថ្ងៃទី៣០មិថុនា២០១៤ប៉ុណ្ណោះ ដែលអង្គការទទួលបន្ទុកខាងហាមឃាត់អាវុធគីមី លេចមុខនៅជួរទីមួយលើឆាកអន្តរជាតិនោះ។
អង្គការនេះមានទីស្នាក់ការនៅទីក្រុងឡាអេ ប្រទេសហូឡង់ កកើតឡើងនៅឆ្នាំ១៩៩៧ បន្ទាប់ពីមានសន្ធិសញ្ញាហាមឃាត់ការប្រើប្រាស់អាវុធគីមី ចុះហត្ថលេខានៅថ្ងៃទី ១៣មករាឆ្នាំ១៩៩៣មក។ មានសមាជិក ជិតកន្លះ លាននាក់មកពី ១៨៩ ប្រទេស អង្គការមានបេសកកម្មចម្បង គឺត្រួតពិនិត្យការកម្ទេចអាវុធគីមី និងជាអ្នកសម្រេចចាត់វិធានការបិទបញ្ចប់ការផលិតអាវុធគីមី និងមានកញ្ចប់ថវិកាប្រចាំឆ្នាំក្រោម១០០លានដុល្លារអាមេរិក។
សម្រាប់គណៈកម្មាធិការណូបែល ការផ្តល់ជ័យលាភី ទៅឱ្យអង្គការនេះ ក៏ព្រោះតែការងារកម្ទេចអាវុធគីមី ជាបន្ទុកដ៏ធ្ងន់មហិមារ។ អាវុធគីមីស៊ីរី ជាងមួយពាន់តោនដែលមានក្នុងគ្រប់រូបភាពទាំងអស់ ៖ ខ្លះជាល្បាយគីមីឆៅ ខ្លះជាគ្រាប់បែក ខ្លះជាមីស៊ីល ជាកាំជ្រួច...
អាវុធគីមីនេះ ត្រូវបានគេប្រើប្រាស់យ៉ាងទូលំទូលាយបំផុត ក្នុងសង្គ្រាមលោកលើកទីមួយ និងសង្គ្រាមលោកទីពីរ ដោយពួកអ៊ីត្លែរ និងក្រោយៗមកទៀត ដោយក្រុមរដ្ឋមួយចំនួននិងដោយពួកភេរវជន។ សន្ធិសញ្ញាក្រុងហ្សឺណែវ ឆ្នាំ១៩២៥ ហាមឃាត់ការប្រើប្រាស់អាវុធគីមី តែមិនហាមឃាត់ការផលិត និងការស្តុកទុកទេ។ រហូតមកដល់ឆ្នាំ១៩៩២-៩៣ ទើបមានសន្ធិសញ្ញាហាមឃាត់ការស្តុក ការផលិត ហើយអង្កការទទួលបន្ទុកខាងហាមឃាត់អាវុធគីមីនេះ បានស្វះស្វែងរកជំនួយត្រួតពិនិត្យផង និងកំណត់ឱ្យចេញជាច្បាប់អន្តរជាតិមួយ។
នៅក្នុងបណ្តាំរបស់លោក អាល់ហ្វ្រេត ណូបែល អ្នកបង្កើតរង្វាន់ណូបែល បានបញ្ជាក់យ៉ាងច្បាស់អំពីភាពចាំបាច់នៃការរំសាយអាវុធ។ មានការផ្តល់រង្វាន់ផ្សេងៗដើម្បីរំសាយអាវុធនុយក្លេអ៊ែរ ដូច្នេះការផ្តល់កិត្តិយសដល់អង្គការហាមឃាត់អាវុធគីមី ក៏ព្រោះតែគណៈកម្មាធិការណូបែល ចង់ចូលរួមចំណែកបំបាត់អាវុធគីមីពីលើលោក។ ចំពោះអង្គការOIACវិញ ម្ចាស់ជ័យលាភីវិញ សង្ឃឹមថារង្វាន់នេះនឹងជំរុញឱ្យគ្រប់ប្រទេសទាំងអស់ហាមឃាត់ការប្រើអាវុធគីមី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ