ប្រទេសលោកខាងលិចដាក់គំនាបទៅលើលោកពូទីនដើម្បីឲ្យអន្តរាគមន៍នៅក្នុងរឿងផ្ទុះធ្លាក់យន្តហោះMH១៧
ចុះផ្សាយនៅថ្ងៃ៖
ស្តាប់ - ០៧:២៩
បួនថ្ងៃក្រោយយន្តហោះប៊ូអ៊ីងម៉ាឡេស៊ីMH១៧ ធ្លាក់ឆេះនៅភាគខាងកើតប្រទេសអ៊ុយក្រែន ក្រុមស៊ើបអង្កេតរបស់អង្គការដើម្បីសន្តិសុខ និងសហប្រតិបត្តិការរបស់អឺរ៉ុប OSCE នៅតែមិនទាន់អាចចូលស៊ើបអង្កេតដោយពេញលេញនៅក្នុងតំបន់ធ្លាក់ឆេះយន្តហោះ។ នៅថ្ងៃអាទិត្យតី ២០កក្កដា គេរកឃើញសាកសពរបស់ជនរងគ្រោះបាន១៩៦នាក់ ពីក្នុងចំណោមអ្នកដំណើរ២៩៨នាក់ ដែលជិះនៅក្នុងយន្តហោះ MH១៧ ដែលត្រូវរងគ្រាប់មីស៊ីលផ្ទុះធ្លាក់នៅភាគខាងកើតប្រទេសអ៊ុយក្រែន កាលពីថ្ងៃព្រហស្បតិ៍។
នៅមួយថ្ងៃក្រោយ យន្តហោះម៉ាឡេស៊ី MH១៧ធ្លាក់ឆេះ កាលពីថ្ងៃព្រហស្បតិ៍ ក្រុមស៊ើបអង្កេតរបស់អង្គការOSCE ដែលជាស្ថាប័នអឺរ៉ុបបានទៅដល់តំបន់ភាគខាងកើតមុនគេ។ ប៉ុន្តែ ការងាររបស់ពួកគេត្រូវ ពន្យារពេលដោយសារតែការត្រួតពិនិត្យរបស់ក្រុមឧទ្ទាមដែលទាមទារចង់ផ្តាច់ទឹកដីពីអ៊ុយក្រែន។ តាមមន្រ្តីរបស់OSCE ក្រុមឧទ្ទាមបានបើកផ្លូវអនុញ្ញាតឲ្យពួកគេចូលទៅមើលតែមួយផ្នែកនៃកន្លែងដែលធ្លាក់យន្តហោះតែប៉ុណ្ណោះ។
នៅកន្លែងធ្លាក់យន្តហោះផ្ទាល់ អ្នកជំនាញកំពុងស្វែងរកបំណែកសំខាន់ៗបួនរបស់យន្តហោះ ដែលបានឆេះធ្លាក់ នោះ គឺក្បាលយន្តហោះ ស្លាបទាំងពីរ និងកន្ទុយយន្តហោះ។ នៅគេនឹងពិនិត្យទៅលើស្លាកស្នាមដែលអាចបន្សល់នៅលើយន្តហោះនេះផង និងគេកំពុងរកប្រអប់ខ្មៅផង ដើម្បីអាចដឹងពីទិន្នន័យ និងព័ត៌មានទាក់ទងនឹងយន្តហោះ ដែលផ្ទុះឆេះនេះ។
នៅប៉ុន្មានម៉ោងក្រោយយន្តហោះMH១៧ផ្ទុះធ្លាក់ សម្មតិកម្មសំខាន់បានបង្ហាញថា យន្តហោះ ម៉ាឡេស៊ីដែលបើកចេញពីទីក្រុងAmsterdam ឆ្ពោះទៅទីក្រុងគួឡាឡាំពួរបានផ្ទុះឆេះ ដោយសារគ្រាប់មីស៊ីល។ ប្រធានាធិបតីអាមេរិក លោកបារ៉ាក់ អូបាម៉ា បាននិយាយថា យន្តហោះ MH១៧របស់ម៉ាឡេស៊ី ត្រូវរងគ្រាប់មីស៊ីលប្រភេទប៊ូក ដែលបាញ់ចេញពីដីក្នុងតំបន់កាន់កាប់ដោយពួកឧទ្ទាមអ៊ុយក្រែន ហើយមីស៊ីលប៊ូកជាសព្វាវុធដែលរុស្ស៊ីផ្តល់ទៅឲ្យក្រុមទាមទារបំបែកទឹកដីអ៊ុយក្រែន។ ចំណែករដ្ឋាភិបាលអ៊ុយក្រែន និងក្រុមឧទ្ទាមនៅតែបន្តចោទគ្នាទៅវិញ ទៅមក ថា ជាអ្នកបាញ់យន្តហោះស៊ីវិលរបស់ម៉ាឡេស៊ី។
ក្រុមអ្នកស៊ើបអង្កេតរបស់ស្ថាប័នអឺរ៉ុប OSCEចង់ប្រកាន់ជំហរ ដោយមិនទាន់សន្និដ្ឋានយ៉ាងណាទេ បើគេមិនទាន់អាចចូលទៅពិនិត្យមើលបំណែកយន្តហោះ នៅកន្លែងផ្ទុះធ្លាក់យន្តហោះនោះ។ ប៉ុន្តែ ដោយពិនិត្យមើលទៅលើបំណែកយន្តហោះ គេនឹងអាចដឹងថា តើយន្តហោះ MH១៧រងការវាយប្រហារពី គ្រាប់មីស៊ីលលើដី ឬដោយមីស៊ីលបាញ់ចេញពី យន្តហោះក្នុងដែនអាកាស។ បើស្លាបយន្តហោះត្រូវគ្រាប់ នោះមានន័យថា មីស៊ីលបាញ់ចេញពីដី ប៉ុន្តែ បើតួខ្លួនយន្តហោះរងគ្រាប់ នោះមានន័យថា មីស៊ីលត្រូវបាញ់ចេញពីក្នុងដែនអាកាស។
ម្យ៉ាងទៀត ដោយពឹងផ្អែកទៅលើព័ត៌មានបានពីក្នុងប្រអប់ខ្មៅ ដែលថតរាល់កិច្ចសន្ទនានៅលើយន្តហោះ គេអាចដឹងថា តើយន្តហោះនោះត្រូវគ្រាប់មីស៊ីលនៅម៉ោងណាឲ្យប្រាកដ ហើយតើអ្នកបើកបរយន្តហោះមាននិយាយអ្វីខ្លះ (ប្រភពបាញ់របស់មីស៊ីល) នៅពេលយន្តហោះត្រូវរងការវាយប្រហារនោះ។ តាមរយៈព័ត៌មានប្រមូលបានទាំងនោះ គេនឹងអាចដឹងថា តើអ្នកណាជាឧក្រិដ្ឋជន ដែលបានបាញ់ទម្លាក់យន្តហោះ និងដែលសម្លាប់មនុស្សជិត៣០០នាក់នោះ។
លោកពូទីនរងសម្ពាធពីប្រទេសលោកខាងលិច
ប្រទេសលោកខាងលិច ដាក់សម្ពាធទៅលើលោកប្រធានាធិបតីរុស្ស៊ីព្រោះតែគេជឿថា លោកពូទីនជាអ្នកមានឥទ្ធិពល បញ្ជាទៅលើក្រុមឧទ្ទាមអ៊ុយក្រែនដែលពេលនេះកំពុង គ្រប់គ្រងទីតាំងដែលមានយន្តហោះធ្លាក់។ នៅថ្ងៃនេះ លោកនាយករដ្ឋមន្រ្តី អង់គ្លេសបានព្រមានថា អង់គ្លេសនឹងចូលរួមជាមួយសហភាពអឺរ៉ុបដើម្បីគិតគូរពីទណ្ឌកម្មថ្មីទៅលើរុស្ស៊ី បើសិនជារុស្ស៊ីមិនប្តូរឥរិយាបទ នៅក្នុងរឿងផ្ទុះយន្តហោះម៉ាឡេស៊ី។
ទាំងលោកនាយករដ្ឋមន្រ្តីហូឡង់ និងអង់គ្លេសបានអះអាងថា គេកំពុងផ្តល់ឱកាសចុងក្រោយដល់លោកប្រធានាធិបតីរុស្ស៊ី ដើម្បីអាចឲ្យលោកបង្ហាញថា តើលោកមានចិត្តស្មោះត្រង់ដើម្បីជួយអន្តរាគមន៍ក្នុងរឿងនេះដែរឬទេ? រុស្ស៊ីបានបដិសេធជាបន្តបន្ទាប់ ថា ខ្លួនមិនពាក់ព័ន្ធនឹងរឿងធ្វើឲ្យយន្តហោះផ្ទុះធ្លាក់ទេ។ លោកពូទីនផ្ទាល់ក៏ធ្លាប់បានប្រាប់ទៅក្រុមឧទ្ទាមនិយមរុស្ស៊ី ឲ្យសហការ បើកផ្លូវដល់ក្រុមស៊ើបអង្កេតអន្តរជាតិដែរ។ ក្រុមឧទ្ទាមដំបូងឡើយ អះអាងស្វាគមឲ្យមានការស៊ើបអង្កេតរបស់អន្តរជាតិដើម្បីរកមុខអ្នកបាញ់មីស៊ីល ប៉ុន្តែ នៅលើទីតាំងជាក់ស្តែង ក្រុមឧទ្ទាមប្រដាប់អាវុធនៅតែរារាំងមិនឲ្យអ្នកស៊ើបអង្កេតចូលទៅជិតសាកសពជនរងគ្រោះ ឬពិនិត្យមើលបំបែកយន្តហោះ។
ថ្នាក់ដឹកនាំរបស់ប្រទេសដែលមានជនរងគ្រោះស្លាប់នៅក្នុងគ្រោះថ្នាក់ផ្ទុះឆេះយន្តហោះបានសំដែងការមិនពេញចិត្តពីសកម្មភាពដែលក្រុមឧទ្ទាមបានធ្វើទៅលើសាកសពរបស់អ្នកដំណើរ ដែលត្រូវគេទុករណូករណែល ឬដឹកយកចេញពី កន្លែងគ្រោះថ្នាក់ ដោយគ្មានការគោរពអ្វីសោះ។ ម្យ៉ាងទៀត គេបារម្ភថា បើក្រុមឧទ្ទាមចេះតែពន្យារ រារាំងក្រុមអ្នកស៊ើបអង្កេតអន្តរជាតិ ជាពិសេសអ្នកស៊ើបអង្កេតរបស់ប្រទេសហូឡង់ផ្ទាល់ នោះគេនឹងបាត់ដាន ភស្តុតាងសំខាន់ៗដែលទាក់ទងនឹងមូលហេតុដែលធ្វើឲ្យយន្តហោះផ្ទុះឆេះ។
តាំងពីថ្ងៃម្សិលមិញ រដ្ឋមន្រ្តីដឹកជញ្ជូន ម៉ាឡេស៊ី បាននិយាយដោយសោកស្តាយថា បំណែកយន្តហោះ ដែលជាវត្ថុតាងសំខាន់របស់យន្តហោះត្រូវគេដឹកជញ្ជូនចេញពីកន្លែងកើតហេតុ។ លោកបានចាត់ទុកសកម្មភាពនេះជាការក្បត់ដល់ព្រលឹងអ្នកស្លាប់។ ចំណែក អាជ្ញាធរអ៊ុយក្រែនវិញបានចោទក្រុមឧទ្ទាមថា កំពុងលួចប្រមូលបំណែកយន្តហោះទៅក្នុងដែនដីរុស្ស៊ីដែលស្ថិតនៅក្បែរតំបន់ដូណេស និងលួចបំផ្លាញភស្តុតាង ដែលអាចបង្ហាញថា គឺក្រុមឧទ្ទាមដែលជាអ្នកបាញ់មីស៊ីល វាយប្រហារទៅលើយន្តហោះ។
សេចក្តីសម្រេចនៅក្រុមប្រឹក្សាសន្តិសុខ
កាលពីថ្ងៃសៅរ៍ អូស្ត្រាលី បានរៀបចំសេចក្តីសម្រេចដើម្បីដាក់ជូនក្រុមប្រឹក្សាសន្តិសុខដែលត្រូវបើកអង្គប្រជុំនៅថ្ងៃចន្ទ ទី ២១កក្កដា។ សេចក្តីសម្រេច និយាយពីការថ្កោលទោសទៅលើសកម្មភាពវាយប្រហារទៅលើយន្តហោះម៉ាឡេស៊ី។ សេចក្តីសម្រេចនេះមានចែងផងដែរពីការទាមទារឲ្យបើកផ្លូវដល់ក្រុមស៊ើបអង្កេតអន្តរជាតិ និងសុំឲ្យប្រទេស ឬបុគ្គលដែលពាក់ព័ន្ធចូលរួមស៊ើបអង្កេតជាមួយក្រុមអន្តរជាតិ។ ដែលអូស្ត្រាលីរៀបចំសេចក្តីសម្រេចព្រោះតែឃើញ រុស្ស៊ី ដែលមានឥទ្ធិពលទៅលើក្រុមឧទ្ទាម និយមរុស្ស៊ី នៅអល់អែក មិនចាត់វិធានការ ចាប់បង្ខំឲ្យក្រុមឧទ្ទាមបើកផ្លូវឲ្យក្រុមស៊ើបអង្កេតអន្តរជាតិ ចូលទៅធ្វើការនៅកន្លែងផ្ទុះយន្តហោះ។
សេចក្តីសម្រេចនេះនឹងអាចត្រូវក្រុមប្រឹក្សាសន្តិសុខពិនិត្យមើល ឬបោះឆ្នោតសម្រេច នៅថ្ងៃចន្ទ។ បើក្រុមប្រឹក្សាសន្តិសុខបោះឆ្នោតចេញសេចក្តីសម្រេចបានមែន នោះ គេរំពឹងថា គេនឹងអាចចាប់បង្ខំគ្រប់ភាគីពាក់ព័ន្ធក្នុងជម្លោះនៅអ៊ុយក្រែន ដូចជាពួកឧទ្ទាម រុស្ស៊ី និងទាហានអ៊ុយក្រែន ឲ្យចូលរួមសម្រួលដល់ការស៊ើបអង្កេត និងចូលយកសាកសពពីកន្លែងផ្ទុះធ្លាក់យន្តហោះ ដែលស្ថិតនៅក្នុងតំបន់ដែលកំពុងមានសង្រ្គាម នៅភាគខាងកើតអ៊ុយក្រែន។ ប៉ុន្តែ ចំណុចមួយដែលគេបារម្ភគឺថា រុស្ស៊ីដែលជាសមាជិកអចិន្រ្តៃយ៍របស់ក្រុមប្រឹក្សាសន្តិសុខអាចនឹងបោះឆ្នោត វេតូ បើសិនជារុស្ស៊ីពិចារណាឃើញថា សេចក្តីសម្រេចនោះនឹងធ្វើឲ្យប៉ះពាល់ផលប្រយោជន៍ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ