រុស្ស៊ី និងអាមេរិកចែកបក្សគ្នាកាន់តែច្បាស់ ក្រោយការបាញ់មីស៊ីលរបស់អាមេរិក ទៅលើមូលដ្ឋានទ័ពស៊ីរី
ចុះផ្សាយនៅថ្ងៃ៖
ស្តាប់ - ០៦:៥៨
ការដែលសហរដ្ឋអាមេរិក បានសម្រេចបាញ់មីស៊ីល៥៩គ្រាប់ ទៅលើមូលដ្ឋានទ័ពអាកាសស៊ីរី បានធ្វើឲ្យស្ថានការណ៍នៅស៊ីរី ផ្លាស់ប្តូរទាំងស្រុង។ ទង្វើនេះ ស្តែងឲ្យឃើញថា សហរដ្ឋអាមេរិក បានសម្រេចចិត្តចេញមុខតតាំងជាមួយរុស្ស៊ី ដែលកន្លងមក រុស្ស៊ីគឺជាអ្នកការពាររបស់ផ្តាច់ការស៊ីរី។ ហេតុការណ៍នេះ ក៏កំពុងតែគូសវាស នូវការបែងចែកក្រុមបក្សពួក ឲ្យកាន់តែច្បាស់ ដែលម្ខាងគឺក្រុមប្រទេស ដែលនៅពីក្រោយសហរដ្ឋអាមេរិក ហើយដែលស្រែកទាមទារឲ្យផ្តួលរំលំរបបផ្តាច់ការបាឆា អាល់អាសាដ និងម្ខាងទៀត គឺក្រុមប្រទេសដែលគាំទ្រ របបបាឆា ហើយដែលមានរុស្ស៊ីជាបង្អែកធំ។
មីស៊ីល៥៩គ្រាប់ ឆ្លើយតបទៅនឹងអំពើព្រៃផ្សៃរបស់បាឆា អាល់អាសាដ
លោកដូណាល់ ត្រាំ ប្រធានាធិបតីសហរដ្ឋអាមេរិក បានអះអាងថា ការបាញ់នេះ គឺជាការឆ្លើយតបទៅនឹងទង្វើព្រៃផ្សៃ អមនុស្សធម៌របស់របបផ្តាច់ការស៊ីរី ដែលបានទំលាក់គ្រាប់បែក ផ្ទុកដោយសារធាតុគីមី សម្លាប់ប្រជាជនស្លូតត្រង់អស់៨៦នាក់ កាលពីថ្ងៃអង្គារ ដើមសប្តាហ៍នេះ។
ក្រោយពេលដែលកងទ័ពអាមេរិក បានបាញ់គ្រាប់មីស៊ីល៥៩គ្រាប់ ទៅលើមូលដ្ឋានទ័ពអាកាសស៊ីរី ប្រតិកម្មបានធ្លាក់មកជាបន្តបន្ទាប់ ទាំងថ្កោលទោស និងទាំងគាំទ្រការសម្រេចចិត្តរបស់អាមេរិក។ ស្ថានភាពថ្មីនាពេលនេះ កំពុងតែគូសវាស ការប្រឈមមុខដាក់គ្នា រវាងគូបដិបក្សពីរក្រុម គឺ រុស្ស៊ី និងសហរដ្ឋអាមេរិក។
តាមពិតទៅ គូរបដិបក្សពីរក្រុមនេះ មានយូរមកហើយ នៅសមរភូមិស៊ីរី តែហាក់បានខ្សត់ខ្សោយកំលាំង ដោយសារកន្លងមកលោកបារ៉ាក់ អូបាម៉ា បានប្រកាន់ជំហរមិនចង់ប្រឈមមុខនឹងរុស្ស៊ី ហើយក៏មិនចង់ប្រើធម៌ក្តៅទៅលើរបបបាឆា អាល់អាសាដ។ បើអាមេរិក ជាមេដំបូល មិនសូវចង់ចេញមុខ ដូច្នេះ ប្រទេសដែលនៅពីក្រោយ ក៏មិនសូវជាហ៊ានដែរ។
ស្ថានភាពថ្មីនាពេលនេះ បានធ្វើឲ្យបក្សពួកទាំងពីរក្រុមនេះ លេចមុខឡើងវិញកាន់តែច្បាស់ ដោយសារតែរដ្ឋាភិបាលអាមេរិក ហ៊ានសម្រេចចិត្តតតាំងជាមួយរុស្ស៊ី។ ដូចយើងឃើញហើយ តាមរយៈប្រតិកម្មដែលធ្លាក់មកជាបន្តបន្ទាប់ គឺបារាំង អង់គ្លេស អាល្លឺម៉ង់ ជប៉ុន អ៊ីស្រាអែល និងតួកគី ជាដើម សុទ្ធតែបានគាំទ្រការសម្រេចចិត្តរបស់លោកដូណាល់ ត្រាំ ទាក់ទិននឹងការបាញ់កម្ទេចមូលដ្ឋានទ័ពអាកាសរបស់ស៊ីរី។
សម្រាប់ប្រទេសទាំងអស់នេះ វាប្រាកដណាស់ថា គឺកងទ័ពរបស់បាឆា អាល់អាសាដ ដែលបានទម្លាក់គ្រាប់បែកផ្ទុកដោយសារធាតុគីមី សម្លាប់ប្រជាជនស្លូតត្រង់អស់៨៦នាក់ កាលពីថ្ងៃអង្គារទី៤មេសា។ នេះមិនមែនជាលើកទីមួយទេ ដែលទាហានបាឆា បើប្រាស់អាវុធគីមី ដ៏ព្រៃផ្សែបែបនេះ។ ប្រទេសទាំងអស់នេះ ទាមទារ ថាត្រូវតែបញ្ចប់សង្រ្គាមនៅស៊ីរី តាមរយៈការរំលំរបបផ្តាច់ការរបស់បាឆា អាល់អាសាដ ឲ្យខាងតែបាន។ ចំណែកបក្សម្ខាងទៀត មានរុស្ស៊ី និងអ៊ីរ៉ង់ ដែលបានថ្កោលទោសទង្វើរបស់អាមេរិក ថាជាអំពើរំលោភបំពានលើអធិបតេយ្យរបស់ស៊ីរី។ រុស្ស៊ី ដែលតែងតែការពាររបបបាឆា អាល់អាសាដ បាននិយាយថា ជាការចោទប្រកាន់ដោយគ្មានមូលដ្ឋាន ដែលថាកងទ័ពស៊ីរី បានប្រើគ្រាប់បែកផ្ទុកសារធាតុគីមី។
រុស្ស៊ីព្យូរកិច្ចព្រមព្រៀងផ្តល់ដំណឹងឲ្យគ្នា ជាមួយសហរដ្ឋអាមេរិក
ផលវិបាកធំបំផុតនោះ គឺទំនាក់ទំនងសហប្រតិបត្តិការរវាងរុស្ស៊ី និងអាមេរិក ក្នុងក្របខណ្ឌបេសកសកម្មបោសសំអាតក្រុមជីហាតអង្គការរដ្ឋអ៊ីស្លាម។ រុស្ស៊ីទើបតែបាន សម្រេចចិត្ត ព្យួរកិច្ចព្រមព្រៀង ជាមួយសហរដ្ឋអាមេរិក ស្តីពីការផ្តល់ដំណឹងឲ្យគ្នាទៅវិញទៅមក។មានន័យថា ចាប់ពីពេលនេះ សហប្រតិបត្តិការរវាងរុស្ស៊ី និងអាមេរិក ក្នុងក្របខណ្ឌសមរភូមិនៅស៊ីរី គឺត្រូវទុកមួយឡែកហើយ។
ដូច្នេះមានន័យថា ចាប់ពីពេលនេះទៅ រាល់ការវាយប្រហារ ភាគីទាំង២ អាមេរិក និងរុស្ស៊ី លែងមានកាតព្វកិច្ចផ្តល់ដំណឹងឲ្យគ្នាដូចមុនហើយ។ ពោលគឺ ការបះទង្គិចគ្នា ប្រាកដជាអាចកើតមាន ព្រោះថាទាហានរុស្ស៊ី មាននៅសឹងគ្រប់ទីកន្លែង ជាមួយនឹងទាហានរបស់បាឆា អាល់អាសាដ។ បើសិនជាទាហានរុស្ស៊ី ឬរបស់អាមេរិក មានស្លាប់សូម្បីតែម្នាក់ ដោយសារគ្រាប់បែករបស់ម្ខាងទៀត នោះយើងជឿថា ស្ថានការណ៍ នឹងកាន់តែធ្ងន់។
គួរកត់សម្គាល់ដែរថា ដោយយោងតាមកិច្ចព្រមព្រៀងនេះហើយ ទើបកងទ័ពអាមេរិក បានជូនដំណឹង ទៅខាងរុស្ស៊ីឲ្យដឹងជាមុនអំពីការបាញ់គ្រាប់មីស៊ីល កាលពីយប់ថ្ងៃព្រហស្បតិ៍។ ទូរទស្សន៍ CNN បានផ្សាយថា នៅមូលដ្ឋាន ទ័ពអាកាសស៊ីរី ដែលជាចំណុចស៊ីបនោះ គឺមានកងទ័ពរុស្ស៊ីនៅទីនោះ។ បើតាមការស្មាន ដោយសារតែរុស្ស៊ីបានទទួលដំណឹងនេះមុនហើយ ទើបបានជាមិនមានទាហានរុស្ស៊ីស្លាប់ ហើយរុស្ស៊ីបានប្រាប់ដំណឹងនេះ ទៅខាងកងទ័ពស៊ីរីឲ្យបានដឹងមុន ទើបបានជាមានទាហានស៊ីរី តែ៧នាក់បានស្លាប់។
អាមេរិក ចង់ប្រាប់បាឆា អាល់អាសាដ ឲ្យដឹងខ្លួន
ក៏ប៉ុន្តែបើយើងវិភាគឲ្យមែនទែនទៅ ការសម្រេចចិត្តវាយប្រហាររបស់អាមេរិក ទៅលើមូលដ្ឋានទ័ពស៊ីរី គឺមានគោលដៅតែមួយគត់ គឺបំផ្លាញ យន្តហោះ និងសម្ភារៈដែលទាហានស៊ីរី ប្រើក្នុងការទំលាក់គ្រាប់បែកសម្លាប់ប្រជាជនស្លូតត្រង់។ អាមេរិកដឹងថា ការដែលខ្លួនប្រាប់រុស្ស៊ីឲ្យដឹងមុន នឹងមិនធ្វើឲ្យទាហានស៊ីរីស្លាប់ច្រើនទេ។ សម្រាប់ពេលនេះ គេជឿថា លោកដូណាល់ ត្រាំ គ្មានចេតនា បន្ថែមការវាយប្រហារណាមួយផ្សេងទៀត សំដៅកម្ទេចកងទ័ពស៊ីរីទេ។
ដូចយើងស្គាល់លោកដូណាល់ ត្រាំស្រេចហើយ គឺគាត់អាចប្តូរចិត្តបានយ៉ាងលឿនរហ័ស។ យ៉ាងណាមិញ នៅពេលកងទ័ពស៊ីរី ប្រើគ្រាប់បែកផ្ទុកសារធាតុគីមី កាលពីឆ្នាំ២០១៣ ពេលនោះលោកត្រាំ បានអំពាវនាវកុំឲ្យលោកអូបាម៉ា ទៅវាយប្រហារកងទ័ពស៊ីរី។ តែឥឡូវពេលនេះ គឺលោកត្រាំបានធ្វើនូវអ្វីដែលខ្លួនហាមគេ។ ដូច្នេះ នៅពេលខាងមុខ យើងមិនអាចស្មានថាលោកត្រាំ អាចធ្វើអ្វីទៀតទេ។ អ្វីៗ វាអាស្រ័យទៅលើការឆ្លើយតបរបស់រុស្ស៊ីដែរ។
គ្មានសង្ឃឹមថាមានដំណោះស្រាយ ក្នុងក្របខណ្ឌអង្គការសហប្រជាជាតិ
បើសិនជាក្រុមប្រឹក្សាសន្តិសុខអង្គការសហប្រជាជាតិ អាចធ្វើអ្វីបាន ម្លេះធ្វើយូរណាស់មកហើយ។ បារាំង បានស្នើគម្រោងសេចក្តីសម្រេចចិត្ត ស្តីពីបញ្ហាស៊ីរី ច្រើនដងមកហើយ។ តែរុស្ស៊ីបានប្រើសិទ្ធិវ៉េតូ របស់ខ្លួនដល់ទៅ៧ដង ដើម្បីបដិសេធរាល់ផែនការស្វែងរកសន្តិភាពនៅស៊ីរី។ ប៉ុន្មានថ្ងៃចុងក្រោយនេះ មុននឹងសហរដ្ឋអាមេរិក សម្រេចបាញ់មីស៊ីលនេះ គឺមានគម្រោងដាក់ស្នើដល់ទៅ៣គម្រោង តែរុស្ស៊ីបដិសេធមិនជជែកអ្វីទាំងអស់ ហើយទាមទារ ឲ្យគេទទួលយកសំណើររបស់ខ្លួនវិញ។
បញ្ហាគឺស្ថិតនៅលើតែចំនុចមួយគត់ ទុកបាឆា អាល់អាសាដ រឺក៏រំលំរបបនេះចោល។ ចំនុចនេះហើយដែលរុស្ស៊ី មិនស្របនឹងអ្នកដ៏ទៃ។ យើងចាំមើលថាតើរុស្ស៊ីចង់ស្នើអ្វីនាពេលនេះ។ ចិននឹងប្រទេសសមាជិកក្រុមប្រឹក្សាសន្តិសុខមួយចំនួនទៀត បានអំពាវនាវ កុំឲ្យធ្វើអ្វី ឲ្យកាន់តែធ្ងន់ធ្ងរជាងនេះ ហើយព្យាយាមស្រុះស្រួលគ្នា រកដំណោះស្រាយដែលនៅកណ្តាល។ ចំណែកបារាំង បានស្នើឲ្យបន្តបេសកកម្ម ដាក់គំនៀបលើរបបបាឆា អាល់អាសាដនេះទៅទៀត។
បើតាមការផ្តល់ដំណឹង ក្នុងពេលប្រជុំក្រុមប្រឹក្សាសន្តិសុខកាលពីថ្ងៃព្រហស្បតិ៍ ភាគីអាមេរិក មានជំហររឹងរូសបំផុត ដោយទាមទារឲ្យរដ្ឋាភិបាលស៊ីរី បង្ហាញភស្តុតាងទាំងអស់ ដែលបញ្ជាក់ថាខ្លួន មិនមែនជាអ្នកទំលាក់គ្រាប់បែកផ្ទុកសារធាតុគីមីទេ។ អ្នកការទូតខ្លះ សន្និដ្ឋានថា អាមេរិក បានដាក់សំណើររបៀបនេះ ព្រោះដឹងថារុស្ស៊ីមិនអាចទទួលយកបាន ហើយប្រាកដជាបោះឆ្នោតវេតូ។ ដូច្នេះបើរុស្ស៊ីបដិសេធ គឺមានន័យថានឹងបើកផ្លូវឲ្យអាមេរិក វាយកម្ទេចកងទ័ពស៊ីរី ជាអត្តនោម័ត។
ក្តីសង្ឃឹមចរចារកសន្តិភាពនៅហ្សឺណែវ កាន់តែរួមតូចនាពេលនេះ ព្រោះថារុស្ស៊ី និងអាមេរិក គ្មានចេតនានិយាយគ្នាតាមសម្រួលទេ។ ចង់មិនចង់ ចាប់ពីពេលនេះទៅ អាមេរិក និង រុស្ស៊ី កំពុងឈរនៅត្រើយម្ខាងម្នាក់ ហើយអ្វីៗអាចនឹងកើតមានឡើង ដោយមិនអាចស្មានមុនបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ