ពលរដ្ឋបារាំងចាប់ផ្តើមបោះឆ្នោតជុំទី២ ក្រោមការពង្រឹងសន្តិសុខខ្ពស់
ថ្ងៃអាទិត្យ៧ឧសភានេះ ប្រជាជនបារាំងចាប់ផ្តើមបោះឆ្នោតជ្រើសរើសប្រធានាធិបតី ជុំទី២។ បារាំងដាក់ពង្រាយកងកម្លាំងជាង១សែននាក់ ដើម្បីការពារសន្តិសុខ រហូតដល់ពេលបោះឆ្នោតរួចផងដែរ។ ប្រជាជនបារាំងនៅបរទេស និងនៅតំបន់ឯនាយសមុទ្រ បានចាប់ផ្តើមបោះឆ្នោតតាំងពីថ្ងៃសៅរ៍ទី៦ឧសភានេះទៅហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៤
ការបោះឆ្នោតប្រធានាធិបតីជុំទី២ នៅបារាំង ថ្ងៃអាទិត្យនេះ ប្រព្រឹត្តទៅក្រោមការការពារសន្តិសុខតឹងតែង។ អាជ្ញាធរបារាំងដាក់ពង្រាយកងកម្លាំងការពារសន្តិសុខជាង១សែននាក់ នៅតាមមណ្ឌលបោះឆ្នោត ក៏ដូចជានៅតាមទីកន្លែងដែលមនុស្សត្រូវផ្តុំគ្នា ក្រោយដឺងលទ្ធផលបោះឆ្នោត នៅយប់ថ្ងៃអាទិត្យនេះដែរ។ ការិយាល័យបោះឆ្នោតជាង៦ម៉ឺន ៦សែន៥រយកន្លែង ចាប់ផ្តើមបើកទ្វារ នៅម៉ោង៨ព្រឹក ថ្ងៃអាទិត្យនេះ ក្នុងស្រុកបារាំង។
ការគំរាមកំហែងសន្តិសុខនៅបារាំងមានកម្រិតខ្ពស់ ពិសេសតាំងពីមានភេរវកម្មសម្លាប់ប៉ូលិសបារាំងម្នាក់ កាលពីថ្ងៃ២០មេសាមក។ កាលពីថ្ងៃសុក្រ អតីតទាហានបារាំងម្នាក់ដែលបានក្លាយខ្លួនជាជនជ្រុលនិយម ត្រូវបានប៉ូលិសចាប់ខ្លួន នៅមូលដ្ឋានយោធា នៅតំបន់Normandie ភាគខាងជើងប្រទេស។ ប៉ូលិសប្រឆាំងភេរវកម្មសង្ស័យថា អតីតទាហានរូបនេះចង់ធ្វើការវាយប្រហារទីតាំងយោធា។ អតីតទាហានរូបនេះសារភាពថា ចង់វាយប្រហារ ដើម្បីតំណាងអោយក្រុមភេរវជនរដ្ឋអ៊ីស្លាម។
ទោះជាយប់ថ្ងៃអាទិត្យនេះ លទ្ធផលបង្ហាញថា បេក្ខជននិន្នាការកណ្តាល អេម៉ានុយអែល ម៉ាក្រុង ជាអ្នកឈ្នះ ការបោះឆ្នោតជុំទី២ រឺក៏លោកស្រីម៉ារីន ឡឺប៉ែន បេក្ខនារីមកពីបក្សស្តាំនិយមជ្រុល ជាអ្នកឈ្នះ ក៏មិនសំខាន់ដែរ។ សំខាន់គឺអាជ្ញាធរនិងកងកម្លាំងសន្តិសុខកំពុងបារម្ភខ្លាចមានហិង្សាណាមួយកើតឡើង ក្រោយដឺងលទ្ធផល យប់នេះ។ ពិសេសហិង្សាដែលអាចបង្កឡើងដោយសកម្មជនឆ្វេងនិយមជ្រុលក្នុងស្រុក។
សូមរំលឹកថា កាលពីយប់ថ្ងៃបោះឆ្នោតជុំទី១ ថ្ងៃ២៣មេសា យុវជនរាប់រយនាក់នៅក្រុងប៉ារីស បាននាំគ្នាបាតុកម្ម ប្រឆាំងនឹងលោកម៉ាក្រុង និងលោកស្រីឡឺប៉ែន។ ការប៉ះទង្គិចបានធ្វើអោយប៉ូលិស៦នាក់ និងបាតុករ៣នាក់រងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ