ចោរអ៊ីនធ័រនែតកំពុងលូកដៃក្នុងការបោះឆ្នោតប្រធានាធិបតីបារាំង?
គណបក្ស En Marche របស់បេក្ខជនប្រធានាធិបតីបារាំង លោកអេម៉ានុយអែល ម៉ាក្រុងបានបរិហារ និងថ្កោលទោសការចូលលួចឯកសារដ៏សន្ធឹកសន្ធាប់ពីសំណាក់ចោរអ៊ីនធ័រនែត។ នៅប៉ុន្មានម៉ោងមុនបិទបញ្ចប់យុទ្ធនាការឃោសនាបោះឆ្នោតរបស់គណបក្សនយោបាយ នៅថ្ងៃយប់ថ្ងៃសុក្រ ទី ៥ឧសភា ឯកសាររាប់ពាន់ដែលចោរអ៊ីនធ័រនែតលួចបានពីគណនីរបស់គណបក្ស En Marche ត្រូវបានផ្សព្វផ្សាយនៅលើបណ្តាញសង្គមដូចជាTwitter និងវិបសៃតិ៍ វីគីលីក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:៤៨
នៅក្នុងសេចក្តីថ្លែងការណ៍ចេញផ្សាយនៅយប់ថ្ងៃសុក្រ គណបក្ស En Marcheរបស់លោកអេម៉ានុយអែល ម៉ាក្រុងបានថ្កោលទោសការលួចឯកសារ ដែលគណបក្សវាយតម្លៃថា មានទិសដៅបំផ្លាញ បង្អាប់បង្អោនកេរ្តិ៍ឈ្មោះរបស់បេក្ខជនអេម៉ានុយអែល ម៉ាក្រុង ដែលកំពុងទទួលសំឡេងនាំមុខ នៅក្នុងការបោះឆ្នោតជ្រើសរើសប្រធានាធិបតីនៅថ្ងៃអាទិត្យស្អែកនេះ។ តាមការស្ទង់មតិ ចុងក្រោយ ចេញផ្សាយនៅថ្ងៃ សុក្រ ម្សិលមិញ លោកអេម៉ានុយអែល ម៉ាក្រុង បេក្ខជនកណ្តាលនិយម មកពីគណបក្ស En March(អង់ម៉ាកស្ហ) មានសំឡេងគាំទ្រ ប្រមាណ ៦៣ភាគរយ នាំមុខជិតពាក់កណ្តាលលើគូប្រកួតប្រជែង គឺលោកស្រីម៉ារីន ឡឺប៉ែន មកពីគណបក្សស្តាំនិយមជ្រុលបារាំង។
គេនៅមិនទាន់ដឹង តើក្រុមចោរអ៊ីនធ័រនែតណាមួយដែលបានវាយប្រហារ ចូលលួចឯកសាររបស់គណបក្សEn Marche នៅឡើយទេ។ ឯកសារសម្ងាត់ដែលភាគច្រើន បង្ហាញពីសារសរសេរទាក់ទងគ្នា នៅក្នុងមែល ឬគណនីហិរញ្ញវត្ថុ របស់គណបក្សកណ្តាលនិយមបារាំង មានមុខដំបូងឡើយ នៅក្នុងវិបសៃតិ៍ឈ្មោះ Pastebin ដែលអនុញ្ញាតឲ្យគេអាចដាក់ឯកសារផ្សព្វផ្សាយ ដោយមិនបញ្ចេញឈ្មោះ។ បន្ទាប់មកទៀត សារស្តីពីឯកសារសម្ងាត់ត្រូវបានគេសរសេរចែកចាយជាបន្តបន្ទាប់ នៅលើវិបសៃតិ៍ វេទិការបស់ក្រុមស្តាំនិយមជ្រុលអាមេរិកាំង មុននឹងត្រូវដកស្រង់ យកមកផ្សព្វផ្សាយបន្ត នៅតាមបណ្តាញសង្គម Twitter និងWikileaks។
តាមសេចក្តីថ្លែងការណ៍របស់គណបក្ស En Marche ដែលចេញផ្សាយនៅយប់ថ្ងៃសុក្រ ការបែកធ្លាយ ឯកសាររបស់គណបក្សលើកនេះ គឺជាស្នាដៃរបស់ក្រុមចោរអ៊ីនធ័រនែត ដែលបានចូលលួច ឯកសារមែល រូបថត របស់បុគ្គលិក និងសមាជិករបស់គណបក្សកាលពីប៉ុន្មានខែមុន។ គណបក្សEn Marche បានជូនដំណឹងនេះរួចហើយទៅគណៈកម្មការជាតិត្រួតពិនិត្យលើយុទ្ធនាការបោះឆ្នោតបារាំង ដែលនៅថ្ងៃសុក្រ បានអំពាវនាវកុំឲ្យប្រព័ន្ធផ្សព្វផ្សាយ ចុះផ្សាយខ្លឹមសារនៃឯកសាររបស់គណបក្ស ដែលបែកលេចធ្លាយ ព្រោះថា ការចុះផ្សាយបន្ត ខ្លឹមសារព័ត៌មានមិនពិតនឹងអាចធ្វើឲ្យគេប្រឈមនឹងទោសព្រហ្មទណ្ឌ ដែលមានចែងក្នុងច្បាប់បារាំង។
នៅក្នុងសេចក្តីថ្លែងការណ៍ គណបក្សEn Marche របស់លោកអេម៉ានុយអែល ម៉ាក្រុង បានថ្កោលទោស ក្រុមចោរអ៊ីនធ័រនែត ដែលបើតាមគណបក្សគឺមានបំណងតែមួយគត់ គឺ បំផ្លាញការបោះឆ្នោតបារាំង ជាពិសេស គឺរារាំងមិនឲ្យបេក្ខជនលោកអេម៉ានុយអែល ម៉ាក្រុងឈ្នះឆ្នោតធ្វើជាប្រធានាធិបតីបារាំង។ ប៉ុន្តែ យ៉ាងណាក៏ដោយ គណបក្សមិនបានចោទប្រកាន់ ចំៗ លើក្រុមណាមួយ ឬក៏ថា គូប្រកួតប្រជែង គឺគណបក្សរណសិរ្សជាតិរបស់លោកស្រីម៉ារីន ឡឺប៉ែន ថា ជាអ្នកនៅពីក្រោយការវាយប្រហារអ៊ីនធ័រនែតលើកនេះដែរ។
រុស្ស៊ីនៅពីក្រោយចោរអ៊ីនធ័រនែត
នេះមិនមែនជាលើកទី១ទេ ដែលគណបក្សEn Marche របស់លោកអេម៉ានុយអែលម៉ាក្រុង រងការវាយប្រហារពីក្រុមចោរអ៊ីនធ័រនែត។ គណបក្សនេះដែលទាក់ទាញប្រជាប្រិយភាពកាន់តែខ្លាំងក្នុងចំណោមប្រជាជនបារាំងបានក្លាយជាផ្ទាំងស៊ីប វាយប្រហាររបស់ចោរអ៊ីនធ័រនែតចំនួន ពីរលើក តាំងពីដើមឆ្នាំនេះ។ នៅខែកុម្ភៈ គណបក្សបានបរិហារសកម្មភាពចូលលួចរបស់ក្រុមចោរអ៊ីនធ័រនែត ដែលព្យាយាម ចូលលួចឈ្មោះ និងលេខកូដសម្ងាត់របស់សមាជិករបស់បក្ស។ នៅខែមេសា គណបក្សនេះបានរងការវាយប្រហារដូចគ្នានេះជាថ្មីម្តងទៀត។ គណបក្សEn Marche កាលណោះបានទម្លាក់កំហុសទៅលើរុស្ស៊ី ថា ជាអ្នកនៅពីក្រោយចោរអ៊ីនធ័រនែត ដែលវាយប្រហារចូលលួចមើលឯកសារសម្ងាត់របស់គណបក្ស។ ឧប្បតិហេតុនេះកើតឡើង នៅបន្ទាប់ពីគណបក្សស្តាំនិយមជ្រុលរបស់លោកម៉ារីន ឡឺប៉ែន ដែលជាគូប្រជែងរបស់គណបក្សEn Marche បានទទួលជួបស្វាគមពីលោកប្រធានាធិបតីពូទីននៅទីក្រុងម៉ូស្គូ។
ប៉ុន្តែ វិមានក្រេមឡាំងវិញ បានបដិសេធ និងអះអាងថា រុស្ស៊ី គ្មានចេតនាចង់លូកដៃក្នុងកិច្ចការបោះឆ្នោតរបស់ប្រទេសដទៃនោះទេ។
ប៉ុន្តែ នៅក្នុងរបាយការណ៍របស់ខ្លួន ដែលចេញផ្សាយនៅថ្ងៃអង្គារទី ២៥មេសា ក្រុមហ៊ុនសន្តិសុខព័ត៌មានវិទ្យា ឈ្មោះTrend Micro ដែលជាក្រុមហ៊ុនជំនាញខាងផ្នែកព័ត៌មានវិទ្យារបស់ជប៉ុន បានបង្ហាញថា ក្រុមចោរអ៊ីនធ័រនែតដែលមានជាប់ទាក់ទងនឹងរដ្ឋាភិបាលរុស្ស៊ី កំពុងចាប់អារម្មណ៍ ផ្តោតក្រសែភ្នែក តាមដានលើយុទ្ធនាការឃោសនាបោះឆ្នោតរបស់គណបក្សEn Marche របស់លោកអេម៉ានុយអែល ម៉ាក្រុង។ តាមការសិក្សារបស់ក្រុមហ៊ុន Trend Microក្រុមចោរអ៊ីនធ័រនែតដែលមានឈ្មោះថា Pawn Storm បានប្រើវិបសៃតិ៍ជាច្រើន ដើម្បី អាចចូលក្នុងមែល មើលសាអេឡិចត្រូនិករបស់គណបក្សEn Marche។
អ្នកជំនាញ និងរដ្ឋាភិបាលរបស់ប្រទេសជាច្រើនស្គាល់ក្រុមនេះ ដែលគេសង្ស័យថា បានចូលវាយប្រហារវិបសៃតិ៍របស់ទូរទស្សន៍បារាំង TV5 និងសភាអាល្លឺម៉ង់ នៅខែមេសា និងឧសភា ឆ្នាំ ២០១៥។ នៅខែមករា ដើមឆ្នាំនេះ ក្រុមចោរព័ត៌មានវិទ្យា Pawn Stormត្រូវរដ្ឋាភិបាលអាមេរិកាំងចោទប្រកាន់ថា ជាចោរអ៊ីនធ័រនែតដែល ដៃជើងរបស់វិមានក្រេមឡាំង។ តាមកាសែត Washington Post គឺក្រុមនេះដែលបានចូលលួច និងផ្សព្វផ្សាយ ចែកចាយ ឯកសារសម្ងាត់ ដូចជាមែលរបស់គណបក្សប្រជាធិបតេយ្យ និងក្រុមលោកស្រីហ៊ីឡារី គ្លីនតុន ដើម្បីប្រយោជន៍លោកដូណាល់ ត្រាំ។
ការបែកលេចធ្លាយឯកសារ ដោយសារការវាយប្រហាររបស់ចោរអ៊ីនធ័រនែតទៅលើបេក្ខជនប្រធានាធិបតីបារាំង ធ្វើឲ្យគេនឹកទៅដល់ការបោះឆ្នោតប្រធានាធិបតីអាមេរិកាំង ដែលកាលនោះ គណបក្សប្រជាធិបតេយ្យរបស់លោកស្រី ហ៊ីឡារី គ្លីនតុន ត្រូវចោរអ៊ីនធ័រនែតវាយប្រហារ។ នៅខែមករា ទីភ្នាក់ងារស៊ើបការណ៍អាមេរិកាំងបានចោទប្រកាន់រុស្ស៊ី ថា ជាអ្នកនៅពីក្រោយ ក្រុមចោរអ៊ីនធ័រនែត ដែលបានចូលលួច បញ្ចេញឯកសារសម្ងាត់របស់ក្រុមលោកស្រី ហ៊ីឡារី គ្លីនតុន ដើម្បីជួយឲ្យលោកដូណាល់ ត្រាំ ឈ្នះឆ្នោតប្រធានាធិបតី។
ដូចករណីគណបក្សប្រជាធិបតេយ្យ និងក្រុមការងាររបស់លោកស្រីហ៊ីឡារី គ្លុនតុន ចោរអ៊ីនធ័រនែត ចូលលួចសារអេឡិចត្រូនិករបស់ក្រុមការងារ ឃោសនារបស់គណបក្សEn Marche របស់លោកអេម៉ានុយអែល ដើម្បីលួចបញ្ចេញឯកសារសម្ងាត់ របស់បក្ស ដូចជាសារឆ្លើយឆ្លងស្តីពីហិរញ្ញវត្ថុផ្គត់ផ្គង់សម្រាប់បក្ស ជាដើម។ ឯកសារទាំងនេះ គឺជារឿងរសើប ព្រោះវាអាចធ្វើឲ្យប្រជាជនម្ចាស់បោះឆ្នោតអាចសង្ស័យទៅលើភាពស្អាតស្អំរបស់បេក្ខជនដែលឈរឈ្មោះ ចង់ធ្វើជាប្រធានាធិបតី។
នៅថ្ងៃព្រហស្បតិ៍ លោកអេម៉ានុយអែល ម៉ាក្រុងទើបតែបានដាក់ពាក្យបណ្តឹង ប្រឆាំងនឹងបុគ្គលដែលចេញផ្សាយព័ត៌មានមិនពិត នៅលើអ៊ីនធ័រនែត។ តាំងពីប៉ុន្មានថ្ងៃមកហើយ ព័ត៌មានជាច្រើន ត្រូវបានគេសរសេរថា លោកអេម៉ានុយអែលម៉ាក្រុង បានលួចលាក់គេចពន្ធ លាក់ទ្រព្យសម្បត្តិនៅបរទេស។ គណបក្សEn Marche ចាត់ទុកព័ត៌មានទាំងនោះថា មិនពិត ត្រូវគេប្រឌិតឡើង ដើម្បី បង្អាប់កេរ្តិ៍ឈ្មោះរបស់លោកអេម៉ានុយអែលម៉ាក្រុង។
ក្នុងករណីរបស់លោកស្រី ហ៊ីឡារី គ្លីនតុន ស្នាដៃលួចរបស់ចោរអ៊ីនធ័រនែតបានចូលរួម មួយភាគ ធ្វើឲ្យលោកដូណាល់ ត្រាំទាក់ទាញសំឡេងឆ្នោត រហូតដល់ទទួលជ័យជំនះក្លាយជាប្រធានាធិបតីអាមេរិក។ ប៉ុន្តែ នៅក្នុងករណីបារាំង គេជឿថា ការវាយប្រហាររបស់ចោរអ៊ីនធ័រនែត ដោយបានបញ្ចេញឯកសារសម្ងាត់របស់បក្សEn Marche នឹងមិនជំរុញឲ្យអ្នកបោះឆ្នោតបារាំង ដូរចិត្ត ច្រើននោះទេ។
នៅអាមេរិក ដោយសារតែមានការប្រកួតប្រជែងតែរវាងពីរគណបក្ស ក្រុមចោរអ៊ីនធ័រនែតបានសំងំតាមដាន ចូលលួចឯកសាររបស់គណបក្សប្រជាធិបតេយ្យ និងក្រុមការងារឃោសនារបស់លោកស្រី ហ៊ីឡារី គ្លីនតុន តាំងពីជាង ១ឆ្នាំមុន។ ចំណែកនៅបារាំងវិញ មានគណបក្សច្រើន ដែលចូលរួមប្រកួតប្រជែង។ គណបក្សEn Marche របស់លោកម៉ាក្រុង ទើបបានក្លាយជាផ្ទាំងស៊ីប ទីចាប់អារម្មណ៍ ច្រើន នៅតែជាង១ខែមុនការបោះឆ្នោត ពោលគឺនៅមុនពេលដែលគណបក្សកាន់តែលេចធ្លោខ្លាំង និងឈ្នះឆ្នោតនៅជុំទី១។ ដូច្នេះ ក្រុមចោរអ៊ីនធ័រនែតគ្មានពេលច្រើន ដើម្បីចូលទៅលួច បញ្ចេញឯកសារដែលរសើបៗ ដើម្បី បំផ្លាញបេក្ខជននោះទេ។ ម្យ៉ាងទៀត ដោយសារតែមានការបោះឆ្នោតអាមេរិកាំងជាឧទាហរណ៍ស្រាប់ គឺទាំងរដ្ឋាភិបាល អាជ្ញាធរបារាំង និងក្រុមគណបក្សEn Marche ផ្ទាល់បានពង្រឹងសុវត្ថិភាពព័ត៌មានវិទ្យារបស់ខ្លួន។
ថ្មីៗនេះ ដោយខ្លាចមានការលួចបន្លំ ការវាយប្រហាររបស់ចោរអ៊ីនធ័រនែត ដែលអាចជាដៃជើងរបស់ទីក្រុងម៉ូស្គូ បារាំងនៅបានលុបចោលការបោះឆ្នោតអេឡិចត្រូនិករបស់ប្រជាជនបារាំង នៅបរទេសទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ