លោកម៉ាក្រុងប្តឹងបុគ្គលដែលចុះផ្សាយព័ត៌មានចោទថា លោកគេចពន្ធ
ថ្ងៃព្រហស្បតិ៍នេះ តុលាការក្រុងប៉ារីសបានបើកការស៊ើបអង្កេត ទាក់ទងនឹងព័ត៌មានដែលបានចោទប្រកាន់ថា បេក្ខជនប្រធានាធិបតី អេម៉ានុយអែល ម៉ាក្រុង គេចពន្ធ លួចមានគណនីធនាគារនៅកោះបាហាម៉ាស។ លោកម៉ាក្រុងបានដាក់ពាក្យប្តឹង ទៅតុលាការ ប្រឆាំងនឹងបុគ្គលដែលបានចែកចាយព័ត៌មានទាំងនេះ ដែលលោកថា ជាព័ត៌មានមិនពិត ដើម្បីដាក់ឥទ្ធិពលលើការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៩
បេក្ខជនប្រធានាធិបតីបារាំង អេម៉ានុយអែល ម៉ាក្រុង បានដាក់ពាក្យប្តឹងទៅតុលាការ ថ្ងៃព្រហស្បតិ៍នេះ ក្រោយលោកស្រីម៉ារីន ឡឺប៉ែន ជាគូប្រជែងក្នុងការបោះឆ្នោត បានលើកឡើងក្នុងការដេញដោលមតិ នៅយប់ថ្ងៃពុធកន្លងទៅ ថាលោកម៉ាក្រុងមានគណនីធនាគារនៅកោះបាហាម៉ាស ដែលស្ថិតនៅភាគខាងជើងតំបន់ការ៉ាអ៊ីប។
ប៉ុន្មានម៉ោងមុនការដេញដោលមតិរវាងបេក្ខជនប្រធានាធិបតីអេម៉ានុយអែល ម៉ាក្រុង និងលោកស្រីម៉ារីន ឡឺប៉ែន និងក្នុងពេលដេញដោលមតិនេះដែរ មានបណ្តាញសង្គមមួយចំនួន បានចុះផ្សាយឯកសារមានខ្លឹមសារចោទថា លោកម៉ាក្រុងលួចមានគណនីធនាគារ ដើម្បីគេចពន្ធក្រៅស្រុក។ ដោយឡែក លោកស្រីឡឺប៉ែនជាគូប្រជែងនឹងលោកម៉ាក្រុង ប្រាប់ថា លោកស្រីគ្រាន់តែសួរសំណួរលោកម៉ាក្រុងប៉ុណ្ណោះ ទាក់ទងព័ត៌មានទាំងនេះ។ លោកស្រីប្រាប់ថា លោកស្រីក៏គ្មានភស្តុតាងបញ្ជាក់ការចោទប្រកាន់នេះដែរ។
លោកម៉ាក្រុងបានចោទលោកស្រីឡឺប៉ែនថា ធ្វើអោយរាលដាលព័ត៌មានភូតកុហក។ ជាដំណឹងចុះផ្សាយតាមវេបសៃត៍មួយចំនួន ដែលពាក់ព័ន្ធនឹងផលប្រយោជន៍រុស្ស៊ី។ ទាក់ទងរុស្ស៊ី គេនៅចាំថា ប្រធានាធិបតីពូទីន បានទទួលជួបលោកស្រីឡឺប៉ែន មុនការបោះឆ្នោតជុំទី១នៅបារាំង។
ទាក់ទងនឹងរុស្ស៊ីដែរ ក្រុមជំនាញព័ត៌មានវិទ្យារបស់ជប៉ុន ធ្លាប់សង្ស័យថា ក្រុមចោរព័ត៌មានវិទ្យាស៊ីឈ្នួលអោយរុស្ស៊ី ប៉ុនប៉ងលុកលុយទិន្នន័យអ៊ីនថឺនេតរបស់គណបក្សលោកម៉ាក្រុង។ ក្រោយលោកម៉ាក្រុងដាក់ពាក្យប្តឹង តុលាការបារាំងសម្រេចបើកការអង្កេតបឋម ពីបទចុះផ្សាយព័ត៌មានមិនពិត ដើម្បីបង្វែរសន្លឹកឆ្នោតនៅបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ