ជនភៀសខ្លួន៖សហភាពអឺរ៉ុប និង ONU កំពុងស្វះស្វែងរកដំណោះស្រាយ
ជាថ្មីម្តងទៀត លោកប្រធានគណកម្មការអឺរ៉ុប និងលោកស្រី អង់ហ្គេឡា មែគែល បានទាមទារឲ្យប្រទេសសមាជិកសហភាពអឺរ៉ុប ទាំងអស់ ទទួលយកកូតា បែងចែកចំនួនជនភៀសខ្លួន ឲ្យស្មើភាពគ្នា ក្នុងចំណោមជនភៀសខ្លួន ទាំងអស់ ១៦ម៉ឺននាក់ ដែលបានធ្វើដំណើរមកដល់អឺរ៉ុប។ ដោយឡែក ក្រុមប្រឹក្សាសន្តិសុខអង្គការសហប្រជាជាតិ កំពុងតែជួបប្រជុំ ដើម្បីធ្វើសេចក្តីសម្រេចចិត្តមួយ ស្តីពីការអនុញ្ញាតិឲ្យសហភាពអឺរ៉ុប ចេញប្រតិបត្តិការ ចាប់ឆែកឆេរទូក រឺនាវា នៅក្នុងសមុទ្រមេឌីទែរ៉ាណេ ដែលគេសង្ស័យថាជាទូកឈ្មួញ ដឹកជនភៀសខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
ដំណោះស្រាយទាំងពីរផ្នែក ផ្នែកទីមួយការទទួលទំនុកបំរុងជនភៀសខ្លួន ដែលមកដល់ និងផ្នែកទីពីរ ការបោសសម្អាតបណ្តាញជួញដូរដឹកជញ្ជូនជនភៀសខ្លួន កំពុងតែត្រូវបានគិតគូរ ពីសំណាក់សហភាពអឺរ៉ុប និងអង្គការសហប្រជាជាតិ។
លោក ហ្សង់ក្លូដ ជុងកឺ ប្រធានគណកម្មការអឺរ៉ុប និងលោកស្រី អង់ហ្គេឡា មែគែលអធិការបតីអាល្លឺម៉ង់ បានអំពាវនាវ ម្តងហើយម្តងទៀត ឲ្យប្រទេសសមាជិកសហភាពអឺរ៉ុបទាំងអស់ នាំគ្នាសុខចិត្ត ទទួលយកការបែងចែកកូតា ចំនួនជនភៀសខ្លួន ដែលម្នាក់ៗត្រូវទទួល ឲ្យស្មើភាពគ្នា មិនមែនទុកឲ្យបារាំង រឺអាល្លឺម៉ង់ ទទួលតែម្នាក់ឯងទេ។
សូមបញ្ជាក់ថា ដោយមិនមានកាតព្វកិច្ចទទួលយកជនភៀសខ្លួន ប្រទេសសមាជិកនីមួយៗ ធ្វើទៅតាមលទ្ធភាព និងឆន្ទៈរបស់ខ្លួន។ ប៉ុន្តែប្រឈមមុខនឹងស្ថានភាពអាសន្ន នៃការមកដល់ របស់ជនភៀសខ្លួនយ៉ាងគំហុក ប្រមាណជា១៦ម៉ឺននាក់ ក្នុងខែសីហាកន្លងទៅនេះ ប្រទេសសមាជិកអឺរ៉ុបទាំងអស់ ត្រូវតែបញ្ចេញកាយវិការសាមគ្គី ជួយគ្នាទៅវិញទៅមក។ លោក ហ្សង់ក្លូដ ជុងកឺ បានមានប្រសាសន៍នៅសភាអឺរ៉ុប កាលពីថ្ងៃពុធម្សិលមិញថា៖ “ពេលនេះ មិនមែនជាពេលដែលគ្រប់គ្នា ត្រូវមានការខ្លាចរអារនោះទេ តែជាពេល ដែលគ្រប់គ្នាត្រូវបើកភ្នែកមើលការពិតជាក់ស្តែង ហើយបង្ហាញពីសេចក្តីក្លាហានរបស់ខ្លួន”។
អាល្លឺម៉ង់ ដែលក្នុងឆ្នាំ២០១៥នេះ បានទទួលជនភៀសខ្លួន ដល់ទៅ៤៥ម៉ឺននាក់ បានបរិហារថា ការបែងចែកកូតាគ្នា ក្នុងចំណោមជនភៀសខ្លួន ១៦ម៉ឺននាក់ គឺវាស្តួចស្តើងណាស់ទៅហើយ បើប្រៀបធៀបទៅនឹងចំនួនដែលអាល្លឺម៉ង់ បានទទួលក្នុងឆ្នាំនេះ។ លោក ចន ឃែរី រដ្ឋមន្ត្រីការបរទេសសហរដ្ឋអាមេរិក បានបញ្ជាក់ថា សហរដ្ឋអាមេរិក និងព្យាយាមទទួលយកជនភៀសខ្លួនស៊ីរី ឲ្យបានចន្លោះពី ៥ពាន់ ទៅ ៨ពាន់នាក់ ពីនេះរហូតដល់ចុងឆ្នាំ២០១៦។
ដោយឡែក ក្រុមប្រឹក្សាសន្តិសុខអង្គការសហប្រជាជាតិ កំពុងតែប្រជុំដើម្បីចេញសេចក្តីសម្រេចចិត្តមួយ អនុញ្ញាតឲ្យកម្លាំងចម្រុះរបស់សហភាពអឺរ៉ុប ចេញប្រតិបត្តិការឆែកឆេរទូក នៅក្នុងសមុទ្រម៉េឌីទែរ៉ាណេ ដែលអាចជាទូករបស់ឈ្មួញដឹកជញ្ជូនជនភៀសខ្លួន។
ការបង្រាបបណ្តាញឈ្មួញដឹកជញ្ជូនជនភៀសខ្លួន គឺជាដំណោះស្រាយមួយ ដើម្បីទប់ស្កាត់ការមកដល់ របស់ជនភៀសខ្លួន ក៏ដូចជាបង្ការគ្រោះថ្នាក់លិចទូក។ ប៉ុន្តែកិច្ចការនេះ បានជួបការលំបាក ដោយសារតែកម្លាំងចម្រុះរបស់សហភាពអឺរ៉ុប មិនអាចចេញប្រតិបត្តិការ ត្រួតពិនិត្យ រឺចាប់ក្រុមជនទុច្ចរិត នៅក្នុងដែនដី និងដែនទឹក របស់ប្រទេសលីប៊ីបានទេ បើសិនជារដ្ឋាភិបាលប្រទេសនេះ មិនអនុញ្ញាត។ លីប៊ីដែលកំពុងតែហែកហួរដោយវិបត្តិនយោបាយ មិនអាចធ្វើការសម្រេចអ្វីបានទាំងអស់។ ដូច្នេះ សេចក្តីសម្រេចចិត្ត របស់អង្គការសហប្រជាជាតិ នឹងផ្តល់ភាពស្របច្បាប់ ដល់កម្លាំងចម្រុះរបស់អឺរ៉ុប ក្នុងការធ្វើប្រតិបត្តិការ នៅក្នុងដែនទឹកអន្តរជាតិ ជាប់នឹងដែនទឹក របស់លីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ