តើហេតុអ្វីបានជាអាល្លឺម៉ង់មានចិត្តទូលាយទទួលជនភៀសខ្លួន?
ចុះផ្សាយនៅថ្ងៃ៖
ស្តាប់ - ០៣:៥៧
នៅក្នុងពេលដែលអឺរ៉ុបកំពុងប្រឈមមុខនឹងវិបត្តិជនភៀសខ្លួន ជាពិសេស លំហូរជនភៀសខ្លួនមកពីប្រទេសស៊ីរី គេសង្កេតឃើញថា នៅក្នុងចំណោមប្រទេសសមាជិកសហភាពអឺរ៉ុប មានប្រទេសមួយដែលបើកទ្វារទទួលជនភៀសខ្លួនច្រើនជាងគេ គឺអាល្លឺម៉ង់។ តើហេតុអ្វីបានជាអាល្លឺម៉ង់មានចិត្តទូលាយចំពោះជនភៀសខ្លួនបែបនេះ?
ប្រទេសអាល្លឺម៉ង់គឺជាទិសដៅដ៏ចម្បងមួយរបស់ជនភៀសខ្លួន ដែលកំពុងតែសម្រុកចូលមកកាន់តំបន់អឺរ៉ុប នៅក្នុងពេលបច្ចុប្បន្ន ហើយប្រជាជន និងរដ្ឋាភិបាលអាល្លឺម៉ង់ក៏បានបង្ហាញចិត្តទូលាយបើកទ្វារទទួលជនភៀសខ្លួនច្រើនជាងគេដែរ នៅក្នុងចំណោមប្រទេសសមាជិកសហភាពអឺរ៉ុប។
គ្រាន់តែក្នុងរយៈពេលប៉ុន្មានថ្ងៃចុងក្រោយនេះ អាល្លឺម៉ង់បានទទួលយកជនភៀសខ្លួនស៊ីរីរហូតដល់ទៅរាប់ម៉ឺននាក់ ហើយនៅក្នុងពេលដែលប្រទេសធំៗមួយចំនួន ដូចជា បារាំង និងអង់គ្លេស ជាដើម សុខចិត្តទទួលយកជនភៀសខ្លួនត្រឹមតែប្រមាណ ២ម៉ឺននាក់ក្នុងមួយឆ្នាំ អាល្លឺម៉ង់វិញប្រកាសសន្យាថានឹងទទួលយកជនភៀសខ្លួនរហូតដល់ទៅ ៨០ម៉ឺននាក់ នៅឆ្នាំ២០១៥នេះ ដោយបានបង្កើតកញ្ចប់ថវិកាពិសេស ក្នុងទឹកប្រាក់រហូតដល់ទៅ ៦ពាន់លានអឺរ៉ូ ដើម្បីទុករ៉ាប់រងបន្ទុកជនភៀសខ្លួនទាំងនេះ។ កាលពីថ្ងៃអង្គារ រដ្ឋមន្រ្តីក្រសួងសេដ្ឋកិច្ចអាល្លឺម៉ង់ទើបនឹងបានប្រកាសឲ្យដឹងថា នៅក្នុងរយៈពេលប៉ុន្មានឆ្នាំខាងមុខទៀតនេះ អាល្លឺម៉ង់នៅតែអាចទទួលយកជនភៀសខ្លួនប្រមាណជាកន្លះលាននាក់ក្នុងមួយឆ្នាំៗ។
ចិត្តទូលាយរបស់អាល្លឺម៉ង់ចំពោះជនភៀសខ្លួននេះគឺដោយសារតែកត្តាមួយចំនួន រាប់ចាប់តាំងពីទឹកចិត្តមនុស្សធម៌ លក្ខខណ្ឌប្រជាសាស្រ្ត ស្ថានភាពសេដ្ឋកិច្ចនិងទីផ្សារការងារ ហើយជាពិសេស គឺផលប្រយោជន៍ខាងផ្នែកសេដ្ឋកិច្ចដែលអាល្លឺម៉ង់អាចទាញយកពីជនភៀសខ្លួន។
គេមិនត្រូវភ្លេចទេថា អាល្លឺម៉ង់គឺជាមហាអំណាចសេដ្ឋកិច្ចលំដាប់ទី១នៅអឺរ៉ុប ហើយនៅក្នុងពេលដែលបណ្តាប្រទេសនៅអឺរ៉ុបជាទូទៅកំពុងប្រឈមមុខនឹងបញ្ហាសេដ្ឋកិច្ច និងបញ្ហាប្រជាជនអត់ការងារធ្វើ អាល្លឺម៉ង់វិញគឺជាប្រទេសដែលមានស្ថានភាពសេដ្ឋកិច្ច និងទីផ្សារការងារល្អប្រសើរជាងគេ ជាពិសេស បើប្រៀបធៀបជាមួយនឹងប្រទេសធំៗផ្សេងទៀត ដូចជា បារាំង អង់គ្លេស និងអ៊ីតាលី ជាដើម។
ដូច្នេះ អាល្លឺម៉ង់គឺជាប្រទេសដែលមានសមត្ថភាពខ្ពស់ជាងគេនៅអឺរ៉ុប ក្នុងការទទួលជនភៀសខ្លួន ទាំងសមត្ថភាពខាងហិរញ្ញវត្ថុ ក្នុងការចំណាយលើជំនួយបន្ទាន់ដល់ជនភៀសខ្លួន និងទាំងសមត្ថភាពសេដ្ឋកិច្ច ក្នុងការស្រូបយកជនភៀសខ្លួនក្នុងទីផ្សារការងារ ដើម្បីធ្វើសមាហរណកម្មនៅក្នុងរយៈពេលវែង។
តាមការពិត អាល្លឺម៉ង់មិនមែនគ្រាន់តែមានសមត្ថភាពអាចស្រូបយកជនភៀសខ្លួនចូលក្នុងទីផ្សារការងាររបស់ខ្លួននោះទេ ប៉ុន្តែ អាល្លឺម៉ង់ត្រូវការកម្លាំងពលកម្ម ដែលអាចផ្តល់ដោយជនភៀសខ្លួន។
អាល្លឺម៉ង់គឺជាប្រទេសដ៏កម្រ ដែលមានអត្រាកំណើនប្រជាជនអវិជ្ជមាន ពោលគឺ ចំនួនប្រជាជនសរុបត្រូវថយចុះ។ កាលពីឆ្នាំ២០១៤កន្លងទៅនេះ ចំនួនប្រជាជនសរុបរបស់អាល្លឺម៉ង់ថយចុះរហូតដល់ទៅជិត ២% ហើយគេធ្វើការព្យាករថា នៅឆ្នាំ២០៦០ខាងមុខ ចំនួនប្រជាជនអាល្លឺម៉ង់នឹងត្រូវថយចុះពី ៨១លាននាក់ មកនៅត្រឹមតែប្រមាណជា ៧០លាននាក់ប៉ុណ្ណោះ។ លើសពីនេះទៅទៀត អត្រាមនុស្សចាស់ដែលធ្វើការលែងកើត ហើយដែលរដ្ឋត្រូវចំណាយលុយផ្តល់សោធននិវត្តន៍នឹងមានកាន់តែច្រើន ចំណែកឯប្រជាជនក្មេងៗពេញកម្លាំងការងារនឹងមានកាន់តែតិច ដែលអាចនឹងបង្កបញ្ហាចោទធ្ងន់ធ្ងរដល់សេដ្ឋកិច្ចអាល្លឺម៉ង់។
តាមការពិត នៅក្នុងពេលបច្ចុប្បន្ននេះ អាល្លឺម៉ង់កំពុងតែប្រឈមមុខស្រាប់ទៅហើយទៅនឹងកង្វះកម្លាំងពលកម្មទៅលើវិស័យមួយចំនួន ជាពិសេស កម្មករដែលគ្មានឬមានជំនាញទាប និងកម្លាំងពលកម្មក្នុងវិស័យបច្ចេកទេស ដូចជា វិស្វករ និងអ្នកបច្ចេកទេស ជាដើម។
តួលេខថ្មីៗនេះបង្ហាញថា នយោជកអាល្លឺម៉ង់រហូតដល់ទៅ ៤៦% កំពុងប្រឈមមុខនឹងបញ្ហាលំបាកក្នុងការស្វែងរកបុគ្គលិកមកបំពេញការងារ ហើយទីផ្សារការងារអាល្លឺម៉ង់កំពុងខ្វះខាតវិស្វករ និងអ្នកបច្ចេកទេសរហូតដល់ទៅ១៤ម៉ឺននាក់។
ហេតុដូច្នេះហើយបានជារដ្ឋាភិបាលអាល្លឺម៉ង់បច្ចុប្បន្នសំឡឹងឃើញថា ការទទួលយកជនភៀសខ្លួនមិនមែនគ្រាន់តែជាកាយវិការមនុស្សធម៌ ហើយអាចលើកមុខមាត់ប្រទេសនៅលើឆាកអន្តរជាតិតែប៉ុណ្ណោះទេ ក៏ប៉ុន្តែ ជនភៀសខ្លួនទាំងនេះអាចនឹងក្លាយទៅជាកម្លាំងពលកម្មដ៏សំខាន់មួយ សម្រាប់សេដ្ឋកិច្ចអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ