ប្រធានគណៈកម្មការអឺរ៉ុបអំពាវនាវកុំឲ្យមានការរើសអើងសាសនា ទៅលើជនភៀសខ្លួន
ប្រធានគណៈកម្មការអឺរ៉ុប នៅព្រឹកថ្ងៃពុធទី ៩ កញ្ញា ចាប់ប្រកាសបែងចែក ជនភៀសខ្លួន ទៅឲ្យប្រទេសសមាជិកសហភាពអឺរ៉ុប។ នៅសភាអឺរ៉ុប លោកហ្សង់ក្លូត ហ៊្សុងគ័រ ប្រធានគណៈកម្មការអឺរ៉ុបបានថ្លែង ស្នើសុំឲ្យប្រទេសសមាជិកអឺរ៉ុបទាំង ២៨ប្រទេស ពិចារណាគ្នា យ៉ាងយូរ នៅសប្តាហ៍ ដើម្បីធ្វើយ៉ាងណា បែងចែក ទទួលយកជនភៀសខ្លួន ប្រមាណ ១សែន ៦ម៉ឺននាក់ ដែលកំពុងមានវត្តមានរួចហើយ ក្នុងទឹកដីអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
នៅចំពោះមុខអ្នកតំណាងរាស្រ្តសភាអឺរ៉ុប ប្រធានគណៈកម្មការអឺរ៉ុប លោកហ្សង់ក្លូត ហ្ស៊ុងគ័រអំពាវនាវសុំឲ្យប្រទេសសមាជិកអឺរ៉ុប បង្ហាញភាពរឹងមាំ និងសាមគ្គីគ្នាឡើង ដើម្បីទទួលជនភៀសខ្លួន។ តាមលោកហ្ស៊ុងគ័រ សមាជិកទាំង ២៨ របស់សហភាពអឺរ៉ុបត្រូវទទួលយកជនភៀសខ្លួន សរុប ប្រមាណ១សែន ៦ម៉ឺននាក់។ ពោលគឺបន្ថែមពីលើជនភៀសខ្លួន ៤ម៉ឺននាក់ សមាជិកអឺរ៉ុបត្រូវទទួលទទួលជនភៀសខ្លួន ប្រមាណ ១សែន ២ម៉ឺននាក់ផ្សេងទៀត ដែលពេលនេះ កំពុងមានវត្តមានក្នុងប្រទេសអ៊ីតាលី ក្រិក និងហុងគ្រី។ តាមគម្រោង អាល្លឺម៉ង់ នាំមុខគេ ដោយទទួលយកជនភៀសខ្លួន ជាង ៣ម៉ឺននាក់ ប្រមាណ ២៦ភាគរយ នៃចំនួនសរុប បន្ទាប់មក គឺបារាំង ចំនួន ២០ភាគរយ និងអេស្ប៉ាញ ១២ភាគរយ។ លោកស្រី នាយករដ្ឋមន្រ្តីអាល្លឺម៉ង់ អង់ហ្គែឡា ម៉ែរគែលវិញ នៅថ្ងៃពុធនេះ បានបញ្ជាក់ ទាមទារជាថ្មី ឲ្យមានការបែងចែក ជាចាំបាច់ ចំនួនជនភៀសខ្លួន នៅក្នុងចំណោមប្រទេសសមាជិកអឺរ៉ុប។
នៅសភាអឺរ៉ុប ប្រធានគណៈកម្មការអឺរ៉ុប អំពាវនាវផងដែរ សុំកុំឲ្យមានការប្រកាន់ រើសអើង បែងចែកសាសនា នៅក្នុងពេលជ្រើសរើស ទទួលជនភៀសខ្លួន ដែលភាគច្រើន រត់គេចចេញពីសង្រ្គាម និងប្រទេសកាន់សាសនាអ៊ីស្លាម នៅតំបន់ដើមបូព៌ា។ “នៅក្នុងករណីជនភៀសខ្លួន គេមិននិយាយ ពីសាសនា ការនិយមជឿ ឬទស្សនៈវិជ្ជានោះទេ។ យើងគ្មានបែងចែកអ្វីទាំងអស់”។ ប្រតិកម្មរបស់លោកហ្ស៊ុងគ័រ មានឡើង បន្ទាប់ពីសាលាក្រុង មួយចំនួន ក្នុងប្រទេសបារាំង ដែលទាំងអស់សុទ្ធតែមកពីគណបក្សស្តាំនិយម និងជាគណបក្សប្រឆាំង បានប្រកាស កាលពីល្ងាចថ្ងៃអង្គារម្សិលមិញ ថា ពួកគេនឹងយល់ព្រមទទួលជនភៀសខ្លួន ណាដែលកាន់គ្រឹស្តសាសនា តែប៉ុណ្ណោះ។
ជាក់ស្តែង សេចក្តីប្រកាសរបស់សាលាក្រុង Charvieu Chavagneurក្នុងតំបន់Isère ស្ថិតនៅភាគខាងត្បូងបារាំង បានសរសេរថា គេទទួលយកតែជនភៀសខ្លួន ដែលគោរពជឿសាសនាគ្រឹស្ត ព្រោះថា ពួកគេទាំងនោះ មិនចេះកាន់កាំភ្លើងបាញ់សម្លាប់អ្នកកាសែត អ្នកដំណើរលើរថភ្លើង ឬមិនចេះកាត់កប្រធានក្រុមហ៊ុន។ សាររបស់សាលាក្រុងបារាំង ចង់និយាយយោងដល់សកម្មភាពភេរវកម្ម កន្លងមក នៅប្រទេសបារាំង ដែលភេរវជនទាំងអស់សុទ្ធតែជឿ កាន់សាសនាអ៊ីស្លាម។ តំបន់ Isère ស្ថិតនៅប្រមាណតែ១៦គីឡូម៉ែត្រប៉ុណ្ណោះពីSaint Quentin Fallavier ជាទីដែលYassin Salhi ជនអ៊ីស្លាមជ្រុលនិយម កាត់ក្បាល ចៅហ្វាយក្រុមហ៊ុនរបស់ខ្លួន និងដាក់ដោតជាមួយទង់ខ្មៅរបស់ក្រុមជីហាតរដ្ឋអ៊ីស្លាម កាលពីខែមិថុនាឆ្នាំ ២០១៥។
ភ្លាមៗ នាយករដ្ឋមន្រ្តីបារាំង Manuel Vallsបានវាយបក ខ្លាំងៗវិញថា គេមិនជ្រើសរើស ទទួលយកជនភៀសខ្លួន ដោយមើលទៅលើសាសនានោះទេ។ សិទ្ធិជ្រកកោណ គឺជាសិទ្ធិមនុស្សជាសកល។ យើងស្តាប់ លោកManuel Valls៖ “ជនភៀសខ្លួន យើងមិនត្រូវធ្វើការបែងចែកថាមានប្រភពចេញមកពីណាទេ... មិនថាជាអ្នកកាន់គ្រិស្តសាសនា អ្នកកាន់សាសនាអ៊ីស្លាម ឬក៏សាសនាអ្វីផ្សេងទេ គឺយើងត្រូវតែទទួលដោយមិនរើសមុខ។ សិទ្ធិជ្រកកោននយោបាយ គឺជាសិទ្ធិជាសកល គឺជាសិទ្ធិដែលចារទុកនៅក្នុងមនសិការរបស់មនុស្សជាតិ ហើយវាគឺជាតួនាទីរបស់យើងរួមជាមួយនឹងអឺរ៉ុប តាមរយៈគំនិតផ្តួចផ្តើមរបស់លោកប្រធានាធិបតីហូឡង់ និងលោកស្រីមែរកិល យើងត្រូវតែគោរពសិទ្ធិជនភៀសខ្លួន។”
នៅក្នុងស្មារតី សាមគ្គីភាពជាមួយអាល្លឺម៉ង់ បារាំង នៅថ្ងៃពុធនេះដែរ ជាលើកទី ១ ទើបបានទទួលជនភៀសខ្លួន ស៊ីរី និងអ៊ីរ៉ាក់ ប្រមាណ ៥៤នាក់ (ក្នុងចំណោម ២០០នាក់) ដែលធ្វើដំណើរចាកចេញពីទឹកដី អាល្លឺម៉ង់ កាលពីថ្ងៃអង្គារ។ នៅក្នុងដំណើរការបែងចែក ជនភៀសខ្លួន បារាំង យល់ព្រម ទទួលយកជនភៀសខ្លួន ប្រមាណ ២ម៉ឺន ៤ពាន់នាក់ សម្រាប់រយៈពេល ២ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ