ក្រសួងសង្គមកិច្ចរកឃើញកន្លែងថែទាំកុមារជាង៦០០កន្លែងនៅទូទាំងប្រទេស
ក្រសួងសង្គមកិច្ច អតីតយុទ្ធជន និងយុវនីតិសម្បទា រកឃើញកន្លែងថែទាំកុមារជាង៦០០កន្លែងនៅទូទាំងប្រទេស ដែលមានកុមារជាង៣ម៉ឺន៥ពាន់នាក់ស្នាក់នៅ។ នេះបើតាមរបាយការណ៍ស្ដីពីការកំណត់ទីតាំងកន្លែងថែទាំកុមារក្នុងរាជធានីខេត្តទាំង២៥ ដែលក្រសួងបានផ្សព្វផ្សាយនៅថ្ងៃព្រហស្បតិ៍នេះ។ ក្រៅពីរបាយការណ៍ ក្រសួងសង្គមកិច្ចក៏បានបង្ហាញពីផែនការពង្រឹងការថែទាំកុមារ និងផែនការសមាហរណកម្មកុមារពីមណ្ឌលថែទាំ ទៅកាន់គ្រួសារវិញផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅក្នុងចំណោមកន្លែងថែទាំកុមារចំនួន៦៣៩កន្លែងដែលក្រសួងសង្គមកិច្ចរកឃើញ មាន៤០៦កន្លែងជាមណ្ឌលថែទាំកុមារ ២៥កន្លែងជាផ្ទះនិងកន្លែងស្នាក់បណ្ដោះអាសន្ន ៧១កន្លែងជាផ្ទះស្នាក់នៅជាក្រុម ៧២កន្លែងជាអន្តេវាសិកដ្ឋាន និងសេសសល់ប៉ុន្មានជាវត្តអារាមនិងអគារសាសនាដទៃទៀតដែលផ្ដល់កន្លែងស្នាក់នៅសម្រាប់កុមារ។ នៅក្នុងកន្លែងថែទាំកុមារទាំងជាង៦០០នោះ មានកុមារជាង៣ម៉ឺន៥ពាន់នាក់ស្នាក់នៅ ក្នុងនោះ៤៥ភាគរយជាកុមារី។ រាជធានីភ្នំពេញ និងខេត្តសៀមរាប ជាកន្លែងប្រមូលផ្ដុំមណ្ឌលថែទាំកុមារច្រើនជាងគេ ស្មើនឹងពាក់កណ្ដាលនៃចំនួនមណ្ឌលថែទាំកុមារសរុប ខណៈខេត្តត្បូងឃ្មុំជាខេត្តតែមួយគត់ដែលគ្មានមណ្ឌលថែទាំកុមារសោះ។
គួរជម្រាបជូនថា ការកំណត់ទីតាំងថែទាំកុមារនេះ ត្រូវបានធ្វើឡើងដោយក្រសួងសង្គមកិច្ច ដោយមានការគាំទ្រពីអង្គការយូនីសែហ្វ និងកម្មវិធីភាពជាដៃគូសម្រាប់កិច្ចការពារកុមារ។
រដ្ឋមន្ដ្រីក្រសួងសង្គមកិច្ច លោក វង សូត្រ ចាត់ទុកការកំណត់ទីតាំងថែទាំកុមារនេះថា ជាការកសាងភស្តុតាងបញ្ជាក់ពីទីតាំងនៃកន្លែងថែទាំផ្សេងៗគ្នា ក៏ដូចជាចំនួនកុមារដែលកំពុងរស់នៅកន្លែងទាំងនោះ ដើម្បីអនុញ្ញាតឲ្យក្រសួងបញ្ចូលទៅក្នុងក្របខណ្ឌគ្រប់គ្រងនិងការត្រួតពិនិត្យរបស់ខ្លួន និងដើម្បីឈានទៅធ្វើសមាហរណកម្មកុមារទៅក្នុងគ្រួសារនិងសហគមន៍វិញ។
ការធ្វើសមាហរណកម្មកុមារនឹងត្រូវធ្វើឡើងតាមផែនការពង្រឹងការថែទាំកុមារនិងសមាហរណកម្មកុមារចំនួន៣០ភាគរយពីមណ្ឌលថែទាំទៅកាន់គ្រួសារប្រកបដោយសុវត្ថិភាព ពីឆ្នាំ២០១៦ ដល់ឆ្នាំ២០១៨ ដែលត្រូវបានចុះហត្ថលេខាក្នុងខែកញ្ញាឆ្នាំ២០១៦។
សម្រាប់ប្រធានអង្គការយូនីសេហ្វនៅកម្ពុជា លោកស្រី ដេបូរ៉ា កូមីនី ការធ្វើសមាហរណកម្មកុមារពីមណ្ឌលថែទាំ គឺ ជាជំហានឆ្ពោះទៅរកកំណែទម្រង់ប្រព័ន្ធថែទាំកុមាររបស់កម្ពុជា ខណៈកន្លងមកការស្រាវជ្រាវបង្ហាញថា ការរស់នៅក្នុងកន្លែងថែទាំកុមារ អាចបង្កគ្រោះថ្នាក់ចំពោះការអភិវឌ្ឍផ្នែកសង្គម ផ្លូវកាយ សតិបញ្ញា និងផ្លូវចិត្តរបស់កុមារ ដែលប៉ះពាល់រយៈពេលវែងទៅលើជីវិតជាមនុស្សពេញវ័យរបស់ពួកគេនាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ