«កុមារភាពដែលត្រូវគេដកហូត»ជាសៀវភៅដែលយុវជនគ្រប់រូបគួរអាន ជាពិសេសកុមារ
«កុមារភាពដែលត្រូវគេដកហូត» នេះចំណងជើងនៃសៀវភៅ ដែលនិពន្ធដោយ លោក ហុក សុទ្ធិ ប្រធានអង្គការស៊ីប៉ា។ ជាសៀវភៅដែលរៀបរាប់ពីប្រវត្តិសាស្រ្តតូចនៃជីវិតកុមារម្នាក់ ដែលត្រូវបានកំទេចនៅក្នុងរបបខ្មែរក្រហម ។ ហើយកុមារតូចម្នាក់នោះ គឺជារូបលោក ហុក សុទ្ធិ ផ្ទាល់តែម្តង។ សៀវភៅនេះត្រូវសម្ភោធជាផ្លូវការនៅថ្ងៃទី ១៤ កុម្ភៈ វេលាម៉ោង ៦:៣០នាទីល្ងាចនេះ នៅវិទ្យាស្ថានបារាំង។
ចុះផ្សាយនៅថ្ងៃ៖
ស្តាប់ - ០១:៥៧
លោក ហុក សុទ្ធិ បាននិយាយថា កុមារភាពរបស់លោក ពិតជាត្រូវបានគេដកហូតពិតមែនកាលជំនាន់ខ្មែរក្រហម ។ កុមារ សុទ្ធិ ត្រូវបានគេបំបែកពីគ្រួសារ ខ្វះភាពរីករាយ មានតែការលត់ដំ សំរិតសំរំាងខ្លួន ឱ្យក្លាយជាកុមារបដិវត្តន៍គំរូដ៏ក្លាហានម្នាក់ប៉ុណោ្ណះ។ ដូច្នេះហើយទើបចំណងជើងនៃសៀវភៅគឺបានដាក់ស្របទៅនឹងតថភាពជាក់ស្តែងដែលលោកបានជួបប្រទះកាលពីសម័យនោះ ។
តាមរយៈសៀវភៅនេះ គឺបានរៀបរ៉ាប់ច្រើនពីការមើលឃើញរបស់ក្មេងទៅលើទិដ្ឋភាពសង្គម ការវិវត្តន៍ខួរក្បាល ពិសេសក្មេងដែលត្រូវបានគេបំបែកពីគ្រួសារ ទៅរស់នៅក្នុងកងកុមាររបស់អង្កការ។ ផ្តើមនិយាយចាប់តាំងពីប្រវត្តិកុមារម្នាក់ដែល មានក្តីស្រឡាញ់ចំពោះឱពុកម្តាយ រហូត ស្ទើរតែគ្មានមនោសព្ចោតនាទៅវិញ ដោយសាររយៈពេលនៃការបែកគ្នា។
«កុមារភាពដែលត្រូវគេដកហូត» ជាសៀវភៅដែលយុវជនគ្រប់រូបគួរអាន ជាពិសេសកុមារ, ដើម្បីយល់ពីការពិតរបស់កុមារតូចម្នាក់ដែលបានឆ្លងកាត់ពេលវេលាដ៏លំបាកនៅសម័យខ្មែរក្រហម។ នេះគឺជាការលើកឡើងរបស់ លោក ហុក សុទ្ធិ ។ រឿងនេះ វាសក្ខីកម្មមួយ និង ជាប្រវត្តិពិតរបស់អ្នកនិពន្ធផ្ទាល់ ដែលចង់ចែករំលែក ផ្នែកមួយនៃជីវិតរបស់កុមារតូចមា្នក់កាលនោះ ដល់កុមារដទៃៗទៀត នាសម័យបច្ចុប្បន្ននេះ, ឱ្យពួកគេបានដឹងថា តើកុមារភាពដែលខ្លួនមានសព្វថ្ងៃ ខុសគ្នាយ៉ាងណាខ្លះជាមួយនឹងកុមារនៅសម័យនោះ? ហើយនេះការពិតដែលបានកើតឡើង ។
អ្វីដែលការកត់សម្គាល់ ជាទូទៅរឿងដែលនិយាយពីរបបខ្មែរក្រហម ភាគច្រើនគឺជារឿងកំសត់ ឈឺចាប់ និងការសម្លាប់រង្គាលជាដើម។ ប៉ុន្តែអ្វីទាំងអស់នេះមិនបានលើកឡើងនៅក្នុងសៀវភៅ និង ការចងចាំរបស់អ្នកនិពន្ធនោះទេ ។ ដោយហេតុតែលោកបញ្ជាក់ថា ប្រហែលជា សំណាងរបស់លោកដែលមិនបានជួបហេតុការណ៍ព្រៃផ្សៃទាំងអស់នោះ។ ហើយជាសំណាងមួយទៀត នៅថ្ងៃរំដោះ ៧មករា ក្រុមគ្រួសាររបស់លោកបានជួបជុំគ្នាវិញ ដោយមិនមានបាត់បង់សមាជិកណាម្នាក់នោះទេ ខុសពីគ្រួសារភាគច្រើនដែលបានព្រាត់ប្រាស់គ្នា។
គួរជំរាបជូនថា សៀវភៅនេះ និងដាក់លក់ជាផ្លូវការនៅបន្ទាប់ពី ថ្ងៃសម្ពោធទី ១៤កុម្ភៈតទៅ នៅអង្កការស៊ីប៉ា និង បណ្ណាគារមួយចំនួនក្នុងប្រទេសកម្ពុជា ដែលក្នុង ១ក្បាល មានតំលៃ ១០០០រៀល ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ