ធនាគារ ADB៖ សេដ្ឋកិច្ចកម្ពុជានឹងមានកំណើនរឹងមាំ៧,១% នៅឆ្នាំ២០១៧និង២០១៨
នៅក្នុងរបាយការណ៍ចេញផ្សាយនៅថ្ងៃទី២៦កញ្ញាម្សិលមិញ ធនាគារអភិវឌ្ឍន៍អាស៊ី ADB បានគូសបញ្ជាក់ថា សេដ្ឋកិច្ចកម្ពុជានៅតែបន្តកើនឡើងយ៉ាងខ្លាំងនៅឆ្នាំ២០១៧នេះ។ បើតាមការព្យាករណ៍របស់ ADB សេដ្ឋកិច្ចកម្ពុជានឹងមានកំណើនខ្ពស់ជាងឆ្នាំមុនបន្តិច ពោលគឺ៧,១% សម្រាប់ឆ្នាំ២០១៧ និង២០១៨។
ចុះផ្សាយនៅថ្ងៃ៖
ស្តាប់ - ០២:១៩
តាមរយៈរបាយការណ៍ធ្វើបច្ចុប្បន្នភាពប្រចាំឆ្នាំនៃចក្ខុវិស័យអភិវឌ្ឍន៍អាស៊ី (ADO) លោក Samiuela Tukuafu នាយកប្រចាំប្រទេសរបស់ ADB នៅកម្ពុជា បានលើកឡើងថា សេដ្ឋកិច្ចរបស់កម្ពុជា បន្តមានកំណើនក្នុងសន្ទុះដ៏ខ្លាំងមួយ ដោយសារមានការជំរុញពីការធ្វើពិពិធកម្មការនាំចេញ កំណើនខ្ពស់នៃវិស័យសំណង់និងទេសចរណ៍ ភាពអំណោយផលនៃអាកាសធាតុដល់វិស័យកសិកម្ម ក៏ដូចជាគោលនយោបាយសារពើពន្ធដែលជួយជំរុញកំណើនសេដ្ឋកិច្ច។
យ៉ាងណាក៏ដោយ បើតាមលោក Tukuafu ដដែល ការបន្តរក្សានិរន្តរភាពកំណើនសេដ្ឋកិច្ចឲ្យនៅតែខ្ពស់ប្រកបដោយបរិយាប័ន្ន និងកាត់បន្ថយភាពក្រីក្រនិងភាពងាយរងគ្រោះរបស់ពលរដ្ឋ គឺអាស្រ័យលើលទ្ធភាពរបស់កម្ពុជាក្នុងការបន្តរក្សាសមត្ថភាពប្រកួតប្រជែងរបស់ខ្លួន តាមរយៈការបង្កើនផលិតភាពនៃកម្លាំងពលកម្ម។
ជាការកត់សម្គាល់ របាយការណ៍របស់ ADB ដដែលបានស្រង់ទិន្នន័យរបស់គយក្នុងឆមាសទី១ឆ្នាំ២០១៧។ ទិន្នន័យរបស់គយបង្ហាញថា ការនាំចេញទំនិញរបស់កម្ពុជាកើនឡើង៧,៧% ខណៈការនាំចូលកើនឡើង៨,១%។ ចំណែកឱនភាពគណនីចរន្តសម្រាប់ឆ្នាំនេះនិងឆ្នាំក្រោយ ត្រូវបានព្យាករណ៍ថា នឹងថយចុះពី១០,៨% នៃផលិតផលក្នុងស្រុកសរុបក្នុងឆ្នាំ២០១៦។ យ៉ាងណាក៏ដោយ ការព្យាករណ៍ឱនភាពគណនីចរន្តនេះ នៅតែកើនឡើងបន្តិច លើសការព្យាករណ៍ក្នុងរបាយការណ៍ទស្សនៈវិស័យអភិវឌ្ឍន៍អាស៊ីឆ្នាំ២០១៧។
ដោយឡែក អតិផរណាមានអត្រាជាមធ្យម៣ភាគរយនៅឆ្នាំ២០១៧ ហើយនឹងកើនឡើងតិចតួចដល់៣,២ភាគរយនៅឆ្នាំក្រោយ។ រីឯឱនភាពសារពើពន្ធសម្រាប់ឆ្នាំ២០១៧ នឹងមានអត្រាកៀកទៅនឹងចំណុចដែលបានកំណត់នៅក្នុងច្បាប់ថវិកា ពោលគឺប្រហាក់ប្រហែលនឹង៤,៣% នៃផលិតផលក្នុងស្រុកសរុប។
សូមជម្រាបជូនដែរថា សេដ្ឋកិច្ចកម្ពុជាបានរក្សាអត្រាកំណើន៧% អស់រយៈពេលពីរឆ្នាំជាប់ៗគ្នាមកហើយ គឺនៅឆ្នាំ២០១៥និងឆ្នាំ២០១៦។ អត្រានេះថយចុះបន្តិចបើធៀបនឹងឆ្នាំ២០១៤ដែលមានអត្រា៧,១% និង៧,៤% នៅឆ្នាំ២០១៣។ នេះបើតាមធនាគារអភិវឌ្ឍន៍អាស៊ី ADB៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ