អូស្ត្រាលីគ្រោងចង់ចូលរួមក្នុងធនាគារហេដ្ឋារចនាសម្ព័ន្ធអាស៊ី របស់ចិន
បន្ទាប់ពីប្រទេសធំៗនៅអឺរ៉ុប ដូចជាបារាំង អាល្លឺម៉ង់ អ៊ីតាលី អង់គ្លេស និងរុស្ស៊ី អូស្ត្រាលីនៅថ្ងៃអាទិត្យបានប្រកាសពីគម្រោងចង់ចូលរួមដាក់ទុន ក្នុងធនាគារវិនិយោគ ហេដ្ឋារចនាសម្ព័ន្ធអាស៊ី ដែលចិនជាអ្នកផ្តួចផ្តើមគំនិតបង្កើតឡើង។
ចុះផ្សាយនៅថ្ងៃ៖
ស្តាប់ - ០២:២៦
គម្រោងរបស់ចិន ដែលចង់បង្កើតធនាគារវិនិយោគ ហេដ្ឋារចនាសម្ព័ន្ធអាស៊ី បានទាក់ទាញប្រទេសជាច្រើន។ ប្រទេសធំៗនៅអឺរ៉ុប ដូចជាអង់គ្លេស បារាំង អាល្លឺម៉ង់ និងចុងក្រោយ មានប្រទេសរុស្ស៊ី បានប្រកាស ជាបន្តបន្ទាប់ ពីឆន្ទះ ចង់ចូលរួមជាមួយចិន ការបង្កើតធនាគារមួយសម្រាប់វិនិយោគទៅលើហេដ្ឋារចនាសម្ព័ន្ធអាស៊ី។ នៅថ្ងៃអាទិត្យនេះ ដល់វេនប្រទេសអូស្ត្រាលីដែលចង់ចូលសហការ ជាមួយចិន ក្នុងនាមជាស្ថាបនិកមួយដែររបស់ធនាគារ វិនិយោគ ហេដ្ឋារចនាសម្ព័ន្ធអាស៊ី។
នៅក្នុងសេចក្តីប្រកាសព័ត៌មានមួយរបស់រដ្ឋាភិបាលអូស្ត្រាលី ចេញផ្សាយនៅថ្ងៃអាទិត្យនេះ ទីក្រុងកង់បេរ៉ា បានបង្ហាញចេតនាចង់ចរចាឲ្យបានច្បាស់លាស់ នៅមុនពេលដែលអូស្ត្រាលីត្រូវសម្រេចចូលរួមក្នុងធនាគារវិនិយោគហេដ្ឋារចនាសម្ព័ន្ធ។ សម្រាប់អូស្ត្រាលី នៅមានបញ្ហាមួយចំនួនដែលអូស្ត្រាលីចង់ដឹងនោះ គឺ អំណាចរបស់ក្រុមប្រឹក្សារដ្ឋបាលធនាគារ ទៅលើការសម្រេចផ្តល់ទុនវិនិយោគ។ ហើយអ្វីដែលអូស្ត្រាលីចង់បានជាងគេ គឺនឹងគ្មានប្រទេសណាមួយដែលនឹងមានអំណាច ផ្តាច់មុខ គ្រប់គ្រងធនាគារតែម្នាក់ឯងនោះទេ។
អូស្ត្រាលីចង់បញ្ជាក់ឲ្យច្បាស់ពីលក្ខខណ្ឌនេះ មុននឹងបោះទុនវិនិយោគ ក្នុងនាមជាស្ថាបនិកមួយដែររបស់ធនាគារដែលចិនបានផ្តួចផ្តើមគំនិតបង្កើតឡើង ជាមួយនឹងប្រទេសនៅអាស៊ីជាង ២០ទៀត កាលពីខែតុលា ឆ្នាំ ២០១៤។ តាមកិច្ចព្រមព្រៀង ពិធីការ ទីក្រុងប៉េកាំង បានយល់ព្រម ត្រៀមចូលហ៊ុនពាក់កណ្តាល នៃទុនសរុបរបស់ធនាគារ ប្រមាណ ៥០ពាន់លានដុល្លារ។
នៅថ្ងៃអាទិត្យ ទីក្រុងប៉េកាំងបានស្វាគមអូស្ត្រាលី ដែលចង់ចូលរួមជាមួយខ្លួន នៅក្នុងធនាគារវិនិយោគហេដ្ឋារចនាសម្ព័ន្ធអាស៊ី។ យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ចចិន អូស្ត្រាលី និងដាណឺម៉ាក នឹងក្លាយជាសមាជិកស្ថាបនិករបស់ធនាគារ ចាប់ពីថ្ងៃទី ១២មេសាខាងមុខ។
អូស្ត្រាលីជាសម្ព័ន្ធមិត្តមួយទៀតរបស់អាមេរិក បន្ទាប់ពីកូរ៉េខាងត្បូង ដែលបានប្រកាស នៅថ្ងៃព្រហស្បតិ៍ ពី គម្រោងចង់ចូលរួមជាមួយធនាគារបង្កើតឡើងដោយចិន។ អាមេរិក ដែលជាម្ចាស់ ធនាគារពិភពលោក និងចូលហ៊ុនក្នុងធនាគារអភិវឌ្ឍអាស៊ីជាមួយជប៉ុនបានព្យាយាមនិយាយបញ្ចុះបញ្ចូល សម្ព័ន្ធមិត្តរបស់ខ្លួនកុំឲ្យចូលរួមជាមួយចិន ក្នុងហេតុផលថា ចិន តាមរយៈ ការបង្កើតធនាគារវិនិយោគហេដ្ឋារចនាសម្ព័ន្ធ មានផែនការបំផ្លាញ គំរូបទដ្ឋានអន្តរជាតិ ដែលធ្លាប់មានកន្លងមក។ សម្រាប់អ្នកវិភាគ ធនាគារវិនិយោគហេដ្ឋារចនាសម្ព័ន្ធអាស៊ី ត្រូវបានចិនបង្កើតឡើងដើម្បីប្រជែង ដណ្តើមឥទ្ធិពល ពីធនាគារពិភពលោក និងធនាគារអភិវឌ្ឍអាស៊ី របស់អាមេរិក និងជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ