បារាំង អាល្លឺម៉ង់ អ៊ីតាលី និងអង់គ្លេសចង់ចូលហ៊ុនក្នុងធនាគារបង្កើតដោយប្រទេសចិន
ប្រទេសអឺរ៉ុបធំៗ ចំនួន ៤ ក្នុងនោះមានបារាំង អង់គ្លេស អ៊ីតាលី និងអាល្លឺម៉ង់បានប្រកាសកាលពីថ្ងៃអង្គារ ទី ១៧ មីនា ពីចេតនារបស់ខ្លួន ចង់ចូលហ៊ុនក្នុងធនាគារវិនិយោគ ហេដ្ឋារចនាសម្ព័ន្ធអាស៊ី ដែលផ្តួចផ្តើមគំនិតដោយប្រទេសចិន។ កាលពីខែតុលាឆ្នំាមុន ប្រទេសចិន និងប្រទេសផ្សេងទៀត ចំនួន ២០ ដែលមកពីអាស៊ី និងដើមបូព៌ា បានចុះកិច្ចព្រមព្រៀង រួមគ្នា ដើម្បីបង្កើតធនាគារមានទិសដៅ ដូចនឹងឈ្មោះ របស់ធនាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
នៅតែក្នុងមួយសប្តាហ៍ ប្រទេសអឺរ៉ុបចំនួន ៤ បានប្រកាសចង់ចូលរួមវិនិយោគជាមួយចិន ក្នុងវិស័យធនាគារ។ បារាំង អាល្លឺម៉ង់ និងអ៊ីតាលីបានដើរតាមផ្លូវរបស់ប្រទេសអង់គ្លេស ដែលបានប្រកាស កាលពីថ្ងៃព្រហស្បតិ៍មុនពីគម្រោងរបស់ខ្លួន ចង់ចូលរួមនៅក្នុងធនាគារវិនិយោគហេដ្ឋារចនាសម្ព័ន្ធ អាស៊ី ដែលចិន និងប្រទេស២០ផ្សេងទៀត ( ភូមា កម្ពុជាឡាវ ម៉ាឡស៊ី វៀតណាម កូវ៉ែត ព្រុយណេ បង់ក្លាដែស នេប៉ាល់ អូម៉ង់ ប៉ាគីស្ថាន ឥណ្ឌា ហ្វីលីពីន កាហ្សាក់ស្ថាន កាតារ) ចុះកិច្ចព្រមព្រៀងកាលពីខែតុលាឆ្នាំមុន។ ស្ថាប័នហិរញ្ញវត្ថុមួយនេះ ត្រូវមានទុន ដំបូង ៥០ពាន់លានដុល្លារ ដែលនៅក្នុងនោះ ចិនត្រៀមចូលរួមចំណែក ៥០ភាគរយ។
នៅក្នុងសេចក្តីប្រកាសព័ត៌មានដាច់ ដោយឡែកពីគ្នា កាលពីថ្ងៃអង្គារ ក្រសួងហិរញ្ញវត្ថុរបស់អ៊ីតាលី និងអាល្លឺម៉ង់បានប្រកាសថា បារាំង អាល្លឺម៉ង់ និងអ៊ីតាលីមានចេតនាចង់ចូលរួមធ្វើជាស្ថាបនិក ដ៏សំខាន់ នៅក្នុងធនាគារវិនិយោគហេដ្ឋារចនាសម្ព័ន្ធដែលបង្កើតឡើងដោយប្រទេសចិន។
តាមអ្នកនាំពាក្យរបស់ក្រសួងការបរទេសចិន ទីក្រុងប៉េកាំងស្វាគមគ្រប់ ប្រទេស មិនថា ប្រទេស នៅក្រៅតំបន់អាស៊ី ឲ្យចូលរួមនៅក្នុងធនាគារវិនិយោគហេដ្ឋារចនាសម្ព័ន្ធអាស៊ី។ អ្នកនាំពាក្យរបស់ក្រសួងការបរទេសចិន នៅបានបញ្ជាក់ថា ប្រទេសដទៃ ទៀត ដែលចង់ចូលរួមដែរនោះ នៅមានពេលរហូតដល់ចុងខែមីនា ដើម្បីដាក់បេក្ខភាពរបស់ខ្លួន។
ការចូលរួមកាន់តែច្រើនរបស់បណ្តាប្រទេសអឺរ៉ុប ទៅក្នុងស្ថាប័នហិរញ្ញវត្ថុ ផ្តួចផ្តើមបង្កើតដោយចិន នឹងអាចជាសញ្ញាមិនសូវល្អសម្រាប់សម្ព័ន្ធមិត្តអាមេរិក ព្រោះថា ធនាគារវិនិយោគ ហេដ្ឋារចនាសម្ព័ន្ធ អាស៊ី របស់ចិន នឹងក្លាយជាគូប្រជែង ដ៏សំខាន់នឹងធនាគារពិភពលោក ដឹកនាំដោយអាមេរិក និងធនាគារអភិវឌ្ឍន៍អាស៊ី ដែលចូលហ៊ុនដោយជប៉ុន និងអាមេរិក។
ជប៉ុន និងអាមេរិក បានបដិសេធមិនចូលរួមជាមួយចិន និងចាត់ទុកគម្រោងបង្កើតធនាគាររបស់ចិន ថា គ្មានប្រយោជន៍ ព្រោះស្ថាប័នហិរញ្ញវត្ថុប្រភេទនេះ មានរួចទៅហើយ ដូចជាធនាគារអភិវឌ្ឍន៍អាស៊ីជាដើម។ ម្យ៉ាងទៀត ទីក្រុងវ៉ាស៊ីនតោនបារម្ភថា ធនាគាររបស់ចិន នឹងផ្តល់ប្រាក់កំចី ដោយងាយស្រួល ដោយមិនខ្វល់ថា ប្រទេសអ្នកខ្ចីកំពុងជួប រំលោភ សិទ្ធិមនុស្សទេ។ ទីក្រុងប៉េកាំងវិញ ធ្លាប់បានប្រកាស ពីភាពចាំបាច់របស់ធនាគារវិនិយោគ ហេដ្ឋារចនាសម្ព័ន្ធអាស៊ី ព្រោះថា កន្លងមក ដោយសារការដាក់លក្ខខ័ណ្ឌតឹងតែង ពី ម្ចាស់បំណុល ដូចជា ធនាគារពិភពលោក របស់អាមេរិក ធនាគារអភិវឌ្ឍន៍អាស៊ីរបស់ជប៉ុន ឬ មូលនិធិរូបិយវត្ថុអន្តរជាតិរបស់អឺរ៉ុប ប្រទេសនៅអាស៊ី ជាច្រើនមិនបានទទួលជំនួយសម្រាប់ការអភិវឌ្ឍន៍ក្នុងស្រុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ