អ.ស.ប. សុំដាក់បញ្ហាសិទ្ធិមនុស្សនៅក្នុងរបៀបវារៈនៃកិច្ចចរចាជាមួយកូរ៉េខាងជើង
អ.ស.ប. នៅថ្ងៃពុធម្សិលមិញ បានសុំអោយដាក់បញ្ហាសិទ្ធិមនុស្សនៅក្នុងរបៀបវារៈនៃកិច្ចចរចាក្នុងជំនួបកំពូលទាំងពីរដែលគ្រោងធ្វើជាមួយកូរ៉េខាងជើង បើពុំនោះសោតទេ រាល់កិច្ចព្រមព្រៀងស្តីអំពីការរំសាយអាវុធនុយក្លេអ៊ែរនៅឧបទ្វីបកូរ៉េនឹងមានលក្ខណៈផុយស្រួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
នៅក្នុងសេចក្តីប្រកាសព័ត៌មានមួយរបស់ខ្លួន លោក Tomas Ojea Quintana អ្នករាយការណ៍ពិសេសរបស់អ.ស.ប. ស្តីពីស្ថានភាពសិទ្ធិមនុស្សនៅកូរ៉េខាងជើង បានសរសេរថា “សន្តិភាពនិងសន្តិសុខ ពុំមែនទទួលបានដោយគ្រាន់តែមាន កិច្ចព្រមព្រៀង រវាងរដ្ឋាភិបាលមួយមុខគត់នោះទេ ។ ចំពោះរូបលោក អ្វីដែលសំខាន់ខ្លំាងនោះ គឹ បញ្ហា នយោបាយផ្ទៃក្នុង ដែលនឹងអាចធានាបានយ៉ាងពេញលេញនៅលើបញ្ហាសិទ្ធមនុស្សនិងដោយគ្មានប្រកាន់ការរើសអ៊ើង។
នៅថ្ងៃសុក្រខាងមុខនេះ ប្រមុខដឹកនាំកូរ៉េខាងជើង លោក គឹម ជុងអ៊ុន នឹង ត្រូវជួបប្រាស្រ័យគ្នាជាមួយប្រធានាធិបតីកូរ៉េខាងត្បូងលោក Kim Jae-In នៅតំបន់គ្មានដាក់កងទ័ព ដែលខ័ណ្ឌចែកប្រទេសកូរ៉េទាំងពីរ។ ម្យ៉ាងទៀត នៅចុងខែឧសភា ឬ ក៏ នៅដើមខែមិថុនាខាងមុខ លោក គឹម ជុងអ៊ុននឹង ត្រូវចូលរួមនៅក្នុងជំនួបកំពូលជាប្រវត្តិសាស្ត្រមួយ ជាមួយប្រធានាធិបតីអាមេរិក លោក Donald Trump នៅក្នុងទីកន្លែងមួយដែលគេពុំទាន់បញ្ជាក់ប្រាប់។
គួរបញ្ជាក់ដែរថា គោលដៅដ៏សំខាន់នៃកង្វល់កិច្ចការទូតនេះ គឺ ដើម្បីរិះ រកវិធីបញ្ចុះបញ្ចូលអោយទីក្រុងព្យុងយ៉ាង សុខចិត្តបោះបង់ចោល សព្វាវុធនុយក្លេអ៊ែរ របស់ខ្លួន។ ទន្ទឹមគ្នានេះដែរ រដ្ឋមន្ត្រីការបរទេសកូរ៉េខាងត្បូង លោកស្រី Kang Kyung-Wha ក៏បានគូសបញ្ជាក់ប្រាប់រួចជាស្រេចហើយដែរថា “បញ្ហាសិទ្ធិមនុស្ស នឹងពុំមានលើកយកមកជជែកគ្នាទេនៅក្នុងជំនួបកំពូលនេះ។
អ្នករាយការណ៍ពិសេសរបស់អ.ស.ប. បានរៀបរាប់ប្រាប់ទៀតថា “បញ្ហាមួយចំនួនធំដែលពុំសូវមានភាពចម្រូងចម្រាសនោះ អាចនឹងមានដាក់បញ្ចូលនៅក្នុងមាតិការនៃកិច្ចចរចា ដូចយ៉ាង បញ្ហា ការបង្រួបបង្រួមក្រុមគ្រួសារកូរ៉េ ទាំងពីរ ដែលបានបែកបាក់ពា្រត់បា្រស់គ្នា តាំងពីជំនាន់សង្គ្រាមកូរ៉េ រវាងឆ្នាំ១៩៥០-១៩៥៣ បញ្ហាការដោះលែង ជនបរទេសដែលត្រូវជាប់ឃុំឃាំងដោយការរំលោភបំពាន ឬ ក៏បញ្ហាផលប៉ះពាល់ជាអវិជ្ជមាននៃទណ្ឌកម្មទៅលើប្រជាជនកូរ៉េខាងជើង។
អ្នករាយការណ៍ពិសេសរបស់អ.ស.ប. បានបញ្ចប់ការរៀបរាប់របស់ខ្លួន ដោយសុំស្នើជាថ្មីម្តងទៀតដល់អាជ្ញាធរទីក្រុងព្យុងយ៉ាង ដើម្បី អោយរូបលោកអាចទៅបំពេញទស្សនកិច្ចជាផ្លូវការមួយនៅក្នុងប្រទេសកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ