តើហេតុអ្វីប្រទេសក្រិកចង់ចេញពីតំបន់អឺរ៉ូ?
ចុះផ្សាយនៅថ្ងៃ៖
ស្តាប់ - ០៥:៥៨
វិបត្តិប្រាក់បំណុលនិងស្ថានភាពនយោបាយនៅប្រទេសក្រិកបានធ្វើឲ្យទីផ្សារហិរញ្ញវត្ថុអន្តរជាតិកើតមានក្តីបារម្ភយ៉ាងខ្លាំង។ ជាពិសេសក្រោយពីការបោះឆ្នោតជ្រើសតាំងសមាជិកសភា ហើយនិងបរាជ័យរបស់អ្នកនយោបាយក្រិកក្នុងការបង្កើតឲ្យមានរដ្ឋាភិបាលមួយសម្រាប់ដឹកនាំប្រទេស។ នៅចំពោះមុខស្ថានភាពសេដ្ឋកិច្ចនិងហិរញ្ញវត្ថុដ៏សែនធ្ងន់ធ្ងរ ហើយនិងគ្មានទស្សនវិស័យវិជ្ជមាន អ្នកដឹកនាំក្រិកភាគច្រើនចង់ឲ្យប្រទេសក្រិកដើរចេញពីតំបន់ចាយប្រាក់អឺរ៉ូ ដែលពួកគេយល់ថា អាចជាមធ្យោបាយជួយរិះរកដំណោះស្រាយឲ្យវិបត្តិសេដេ្ឋកិច្ចនិងវិបត្តិហិរញ្ញវត្ថុក្រិក។
នៅចំពោះមុខអសមត្ថភាពរបស់អ្នកនយោបាយក្រិកក្នុងការបង្កើតឲ្យមានរដ្ឋាភិបាលមួយសម្រាប់ដឹកនាំប្រទេស និងនៅចំពោះមុខកំហឹងរបស់ប្រជាជនក្រិកដែលបានសម្តែងឲ្យដឹងតាមរយៈការបោះឆ្នោតសភានៅថ្ងៃអាទិត្យកន្លងទៅ អ្នកដឹកនាំគណបក្សនយោបាយក្រិកសំខាន់ៗបានថ្លែងឲ្យដឹងថា គេបានត្រៀមលក្ខណៈជាស្រេចនឹងធ្វើការចរចាឡើងវិញជាមួយស្ថាប័នហិរញ្ញវត្ថុអន្តរជាតិសំខាន់ៗដែលជាម្ចាស់បំណុលរបស់ប្រទេសក្រិក មានដូចជាមូលនិធិរូបិយវត្ថុអន្តរជាតិ FMI ធនាគារកណ្តាលអឺរ៉ុប BCE ហើយនិងជាមួយគណៈកម្មការអឺរ៉ុប។
តើអ្នកដឹកនាំក្រិកចរចាឡើងវិញពីបញ្ហាអ្វីជាមួយស្ថាប័នហិរញ្ញវត្ថុអន្តរជាតិខាងលើនេះ?
បញ្ហាដែលត្រូវចរចាហើយសំខាន់សម្រាប់សេដ្ឋកិច្ចនិងហិរញ្ញវត្ថុក្រិកគឺបញ្ហានយោបាយថវិកាត្បិតត្បៀតដែលដាក់បង្ខំដោយស្ថាប័នហិរញ្ញវត្ថុអន្តរជាតិឲ្យរដ្ឋាភិបាលក្រិកអនុវត្ត ដែលអ្នកដឹកនាំក្រិកពុំចង់ឃើញពុំចង់បានសោះឡើយ ដោយហេតុតែនយោបាយត្បតិត្បៀតនេះហើយដែលបានធ្វើឲ្យប្រជាជនក្រិកបាត់បង់ប្រាក់ចំណូលនិងគ្មានPouvoir d’Achat ឬអំណាចទិញគ្រប់គ្រាន់ អាចនឹងធ្វើការចាយវាយទិញដូរហូបចុក។
បើគ្មានកំណើនទិញដូរហូបចុក ធ្វើម្តេចនឹងមានសន្ទុះកំណើនសេដ្ឋកិច្ច?
បើគ្មានសន្ទុះកំណើនសេដ្ឋកិច្ច ធ្វើម្តេចនឹងមានលទ្ធភាពមកជួយរុញច្រានម៉ាស៊ីនសេដ្ឋកិច្ចឲ្យមានសកម្មភាព?
បើម៉ាស៊ីនសេដ្ឋកិច្ចគ្មានសកម្មភាពគ្រប់គ្រាន់ ធ្វើម្តេចនឹងមានលទ្ធភាពមកជួយដោះស្រាយបញ្ហាឥតការងារធ្វើ?
បញ្ហាឥតការងារធ្វើនេះហើយ ដែលបានបណ្តាលឲ្យយុវជននិងប្រជាជនក្រិករាប់លាននាក់បាននាំគ្នាមកបោះឆ្នោតសម្តែងបញ្ចេញកំហឹងរបស់ខ្លួនកាលពីថ្ងៃអាទិត្យកន្លងទៅ ដោយបានផ្តល់សំឡេងឆ្នោតគាំទ្រយ៉ាងច្រើនឲ្យគណបក្សនយោបាយស្តាំនិយមជ្រុល និងឆ្វេងនិយមជ្រុល។ ទាំងនេះសុទ្ធសឹងជាគ្រោះថ្នាក់ដល់លទ្ធិប្រជាធិបតេយ្យដែលស្រឡាញ់ការពារសេរីភាពនិងយុត្តិធម៌។
ដូច្នេះហើយបានជាអ្នកដឹកនាំក្រិកជាច្រើនបានសម្តែងឲ្យដឹងថា គេចង់ឃើញប្រទេសក្រិកចាកចេញពីតំបន់ចាយប្រាក់អឺរ៉ូ។ ដោយហេតុថា៖
-បើប្រទេសក្រិកចាកចេញពីតំបន់ចាយប្រាក់អឺរ៉ូ ទីក្រុងអាថែនលែងជាប់ “ចំណង” នៃ “នយោបាយត្បិតត្បៀត” ដែលចងរឹតរួតម៉ាស៊ីនសេដ្ឋកិច្ចក្រិកទៀតហើតយ។
-ហើយអ្នកដឹកនាំក្រិកអាចមានលទ្ធភាពនឹងអនុវត្ត “នយោបាយកំណើនសេដ្ឋកិច្ច”។
“នយោបាយកំណើនសេដ្ឋកិច្ច” ដែលទាមទារចង់បានដោយអ្នកដឹកនាំក្រិកគឺមានសេចក្តីថា៖
-រដ្ឋាភិបាលក្រិកលែងគោរព “អត្រាឧនភាពសាធារណៈឲ្យតិចជាង៣%នៃផលិតផលដុលសរុប” ទៀតហើយ។ “អត្រាឧនភាពសាធារណៈឲ្យតិចជាង៣%នៃផលិតផលដុលសរុប” ដែលត្រូវតែគោរពដោយប្រទេសជាសមាជិកក្នុងតំបន់ចាយប្រាក់អឺរ៉ូជាដាច់ខាត ដើម្បីធ្វើឲ្យ “ថវិកាជាតិ” នៃប្រទេសនីមួយៗជាសមាជិកក្នុងតំបន់ចាយប្រាក់អឺរ៉ូ មាន “តុល្យភាព”។
-ធនាគារកណ្តាលក្រិកមានសេរីភាពនិងមានលទ្ធភាពអាចនឹងបង្កើតរូបិយបណ្ណជាតិ សម្រាប់ឲ្យប្រជាជនក្រិកធ្វើការចាយវាយទិញដូរហូបចុកក្នុងប្រទេស ដែលជាកត្តាមួយដ៏សំខាន់អាចធ្វើឲ្យម៉ាស៊ីនសេដ្ឋកិច្ចក្រិកមានសកម្មភាពនិងស្គាល់សន្ទុះកំណើនសេដ្ឋកិច្ចឡើងវិញ។ ម៉ាស៊ីនសេដ្ឋកិច្ចក្រិកមានសកម្មភាពនិងស្គាល់សន្ទុះកំណើនសេដ្ឋកិច្ចឡើងវិញនេះហើយ ដែលយុវជននិងប្រជាពលរដ្ឋក្រិកកំពុងតែទន្ទឹងរង់ចាំចង់បាន។
ក៏ប៉ុន្តែ ចៀសពុំផុតទេ “នយោបាយកំណើនសេដ្ឋកិច្ច” ហើយនិង ការបង្កើតឲ្យមានរូបិយបណ្ណជាតិដោយធនាគារកណ្តាលក្រិក ច្បាស់ជាធ្វើឲ្យប្រទេសក្រិកជួបនឹងបញ្ហាអតិផរណាឬបញ្ហាទំនិញឡើងថ្លៃ ហើយនិងបញ្ហាតម្លៃរូបិយបណ្ណក្រិកធ្លាក់ចុះ។
មានបញ្ហាអតិផរណាឬបញ្ហាទំនិញឡើងថ្លៃ ហើយនិងមានបញ្ហាតម្លៃរូបិយបណ្ណជាតិធ្លាក់ចុះ អាចនាំឲ្យម៉ាស៊ីនសេដ្ឋកិច្ចក្រិកមានសកម្មភាពនិងមានកំណើនសេដ្ឋកិច្ច ដែលជាប្រភពនៃការជួយបង្កើតការងារជូនយុវជននិងប្រជាពលរដ្ឋក្រិកដែលកំពុងតែស្រេកឃ្លាន ជាជាងអនុវត្តន៍ “នយោបាយថវិកាត្បិតត្បៀត” ដែលគ្មានកំណើនសេដ្ឋកិច្ចទាល់តែសោះ។
ជាក់ស្តែង រដ្ឋាភិបាលក្រិកបានអនុវត្តជាច្រើនឆ្នាំមកហើយនូវ នយោបាយថវិកាត្បិតត្បៀត” ដែលដាក់បង្ខំឲ្យអនុវត្តដោយស្ថាប័នហិរញ្ញវត្ថុអន្តរជាតិដែលជាម្ចាស់បំណុលរបស់ប្រទេសក្រិក មានដូចជាមូលនិធិរូបិយវត្ថុអន្តរជាតិ FMI ធនាគារកណ្តាលអឺរ៉ុប BCE ហើយនិងគណៈកម្មការអឺរ៉ុប។
ក៏ប៉ុន្តែ គេគ្មានបានឃើញហុចចេញជាផ្លែផ្កាឬកំណើនសេដ្ឋកិច្ចសោះឡើយ ផ្ទុយទៅវិញឃើញមានតែដំណើរសេដ្ឋកិច្ចដើរថយក្រោយ ហើយនិងការកើនឡើងនៃចំនួនអ្នកឥតការងារធ្វើ។
មូលហេតុអស់ទាំងនេះហើយដែលធ្វើឲ្យអ្នកដឹកនាំក្រិកជាច្រើនយល់ស្របតាមលោកប្រធានាធិបតីបារាំង ហ្វ្រង់ស័រហូឡង់ ដែលជាប់ឆ្នោតថ្មីៗ ដែលស្នើឲ្យងាកមកអនុវត្ត “នយោបាយកំណើនសេដ្ឋកិច្ច” ទោះបីជាអាចកើតមានបញ្ហាអតិផរណាឬបញ្ហារូបិយបណ្ណជាតិចុះថ្លៃក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ