ទណ្ឌកម្មអឺរ៉ុប៖ ឡេតូនីបញ្ជូនជីគីមីដែលចាប់បានពីក្រុមហ៊ុនរុស្ស៊ី ទៅកាន់ប្រទេសកេនយ៉ា
រដ្ឋាភិបាលឡេតូនីបានសម្រេចបញ្ជូនជីគីមីរុស្ស៊ី ដែលរឹបអូសយកបាន នៅក្នុងក្របខ័ណ្ឌនៃការដាក់ទណ្ឌកម្មរបស់សហភាពអឺរ៉ុប ទៅកាន់ប្រទេសកេនយ៉ា។ នៅថ្ងៃសៅរ៍នេះ អ្នកនាំពាក្យរបស់ក្រសួងការបរទេសឡេតូនី បាននិយាយប្រាប់អ្នកកាសែតថា ជីគីមីដែលមានប្រភពមកពីរុស្ស៊ី ជាច្រើនតោន ត្រូវបញ្ជូនទៅកាន់ប្រទេសកេនយ៉ា កាលពីថ្ងៃសុក្រម្សិលមិញ តាមរយៈកម្មវិធីស្បៀងអាហារពិភពលោក របស់អង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០១:៥២
កប៉ាល់ដឹកជីគីមីរុស្ស៊ី ចំនួន ជាង ២សែន ៦ម៉ឺនតោន ត្រូវចាប់ឃាត់ នៅកំពង់ផែ ក្នុងប្រទេសហូឡង់ បែលហ្សិក អេស្តូនី និងឡេតូនី នៅក្នុងក្របខ័ណ្ឌនៃការដាក់ទណ្ឌកម្មសេដ្ឋកិច្ចរបស់សហភាពអឺរ៉ុប ទៅលើប្រទេសរុស្ស៊ី ដោយសារសង្រ្គាមឈ្លានពានប្រទេសអ៊ុយក្រែន
តាមក្រសួងការបរទេសឡេតូនី ជីគីមី ប្រមាណ ២សែនតោន ដែលមានប្រភពមកពីរុស្ស៊ី និងដឹកដោយកប៉ាល់ក្រុមហ៊ុនដែលជាប់ទណ្ឌកម្មរបស់សហភាពអឺរ៉ុប ត្រូវគេចាប់រឹបអូសទុក នៅកំពង់ផែ Riga។ តាមអ្នកនាំពាក្យរបស់ក្រសួងការបរទេសឡេតូនី នៅថ្ងៃសុក្រម្សិលមិញ ជីគីមីមួយភាគនៃជីគីមីសរុប២សែនតោន ដែលគេរឹបអូសយកបានពីក្រុមហ៊ុនរុស្ស៊ី នៅឆ្នាំមុន ត្រូវដឹកជញ្ជូនចេញពីកំពង់ផែ Riga នៅថ្ងៃសុក្រ ទី ២១មេសា សម្រាប់បញ្ជូនទៅកាន់ប្រទេសកេនយ៉ា តាមរយៈកម្មវិធី ស្បៀងអាហារពិភពលោក។ ចំណែកជីគីមីដែលនៅសល់ នឹងត្រូវបញ្ជូនចេញ ជាបន្តបន្ទាប់ទៅកាន់ប្រទេសផ្សេងទៀត ដែលជួបវិបត្តិស្បៀងអាហារ ដោយសារឥទ្ធិពលនៃសង្រ្គាមរុស្ស៊ីឈ្លានពានអ៊ុយក្រែន។
ការប្រកាសរបស់ក្រសួងការបរទេសឡេតូនី ធ្វើឡើងនៅមួយថ្ងៃក្រោយ ដែលអនុរដ្ឋមន្រ្តីការបទេសរុស្ស៊ី និយាយប្រាប់ទូរទស្សន៍រុស្ស៊ី Rossiya 24 ថា រុស្ស៊ីកំពុងរៀបចំត្រៀមបញ្ជូនកប៉ាល់ដឹកជីគីមីរុស្ស៊ី ចំនួន ២កប៉ាល់ ទៅកាន់ប្រទេសកេនយ៉ា និងនីហ្សេរីយ៉ា។ អនុរដ្ឋមន្រ្តីការបរទេសរុស្ស៊ីចង់សំដៅ ដល់ជីគីមី របស់ក្រុមហ៊ុនរុស្ស៊ី ដែលប្រទេសអឺរ៉ុបចាប់ឃាត់ទុក នៅក្នុងក្របខ័ណ្ឌនៃការដាក់ទណ្ឌកម្មសេដ្ឋកិច្ចរបស់សហភាពអឺរ៉ុបទៅលើរុស្ស៊ី។
នៅក្រោយ កប៉ាល់ដឹកជីគីមីរុស្ស៊ី ត្រូវចាប់ឃាត់ទុក ដោយសារការដាក់ទណ្ឌកម្មរបស់អឺរ៉ុប ប្រធានាធិបតីរុស្ស៊ី លោកពូទីនធ្លាប់អះអាងថា រុស្ស៊ីត្រៀមខ្លួន ដើម្បីបញ្ជូន ដោយឥតគិតថ្លៃ ជីគីមីទាំងនោះ ទៅកាន់ប្រទេសក្រីក្រ ប៉ុន្តែ តាមលោកពូទីនប្រទេសនៅសហភាពអឺរ៉ុបបានបដិសេធ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ